Atura kana i anu-anu
22
1 Ane hadua mopanangka hambaa japi ba dimba hai nasambale ba napobalu, hangangaa napahuru: hambaa japi napahuru lima baana japi, hambaa dimba napahuru iba baana dimba. 2-4 Ia hangangaa mopahuru au napanangka. Ane bara ara au napopopahuru, ia hangangaa rapobalu mewali hawi mopahuru au napanangkami iti. Ane au napanangka iti japi, kalide ba dimba hai ralambi i tauna iti tuwo mani, hangangaa napopesule, hai ratambai dendana rombela kangkaiana.Ane i tempo kaindi hadua topanangka ralambi tonto manangka i lalu haogu sou hai rapahai alana mate, tauna au mepapate iti bara masala. Agaiana ane topanangka iti manangka i tempo mabaa hai rapahai alana mate, tauna au mepahai iti raimba masala.
5 Ane ara hadua au mamporewu pinatuwona i bondena ba i bonde anggorona hai napogiangaa peahe, alanda moandehe tuda-tudana to haduana, ampu pinatuwo iti hangangaa mobaiari tuda-tuda au marugimi hai wua tuda-tudanda au tepamaroa hangko i bondena ba au i bonde anggorona.
6 Hema au mopatuwo api i bondena hai molelehi lopo alana hawe i bondena rangana hai moande pare au bara mani rahambe ba au ralunggumi, tauna au mopaara patingkeru kanaandena api tuda-tuda iti hangangaa nabaiari ope-ope.
7 Ane ara hadua au mamboli doina ba anu-anuna i rangana hai rapanangka i souna tauna au napambolii hai topanangka iti ralambi, hangangaa napahuru rombela kangkaiana. 8 Ane topanangka iti bara rahumba, ampu sou iti hangangaa raanti i paidaa penombaa i Pue Ala, hai mosumpa inditi kadana ia au mopanangka doina ba parewana rangana.
9 Idemi atura i paka-pakana kara-kara mampobungkai anu-anu, maroa hambaa japi, hambaa kalide, hambaa dimba, hantonga badu, ba anu-anu apa pea au matanta. Ane hadua-haduahe manguli: ide, iko ampuna, mewali kara-karanda tauna rodua iti hangangaa raanti i paidaa penombaa i Pue Ala. Hema au napatongawa tuduana Pue Ala masala, hangangaa mobaiari rombela kangkaiana i ampuna.
10 Ane hadua mowoli i rangana hambaa kalide ba hambaa japi ba hambaa dimba ba pinatuwo apa pea hai pinatuwo iti mate ba marugi ba rapanangka tauna hangko i taiena hai bara ara tauna au moita, 11 tauna au rapambolii pinatuwo iti hai ampu pinatuwo iti hangangaa roroduahe lao i paidaa penombaa i Pue Ala. Hangangaa mosumpahe i lalu hangana Pue kadanato tauna au rapambolii pinatuwo iti au mopanangka pinatuwo iti. Mewali ampu pinatuwo iti hangangaa modoko sumpa iti hai tauna iti barapi mopahuru pinatuwo au rapanangkami. 12 Agaiana ane pinatuwo iti natanta, hangangaa napahuru i ampuna. 13 Ane pinatuwo iti nahaka binata maila, buuna hangangaa naanti hai napopaitaa ampuna. Mewali barapi ina nabaiari.
14 Ane hadua mampebolo hambaa pinatuwo i rangana hai matepo bitina ba mate hai bara indo ampuna, au mebolo hangangaa mopahuru. 15 Agaiana ane arato ampuna inditi, pinatuwona au rapebolo iti barapi rapahuru. Ane pinatuwo iti rasaro, pahuruna teimbami i sarona.
16 Ane hadua tobalilo monena-nena towawine au bara mani naisa momanu hai napoluhimi, hangangaa napotambia hai nabaiari holona. 17 Agaiana ane umana anantowawine iti bara mopaliu tobalilo iti motambi hai anana, tobalilo iti hangangaa mobaiari wori hintoto hai holona hadua anantowawine.
Atura kana i dosa au merikai
18 Hema pea towawine au mokantu hangangaa rapapate. 19 Hema au mamposamboko binata hangangaa rahuku mate. 20 Hema au mohuhu popenombana i anitu, bara Iriko, Pue, batena rapapate.
Atura kana i tauna au bara nabuku tuwo
21 “Ineekau mampopeahi-ahi tohandarena, lawi ikamu hangkoia tohandarena worikau i tampo Masiri. 22 Ineekau mampopeahi-ahi to bemba ba to ilu. 23 Ane nipopeahi-ahihe, batena Kupehadingi peraroanda, ane merapi tulungihe Iriko. 24 Mewali ina rumpuNa hai Kupapatekau hai mata mpiho, alanda towawinemi bembahe hai anami iluhe.
25 Ane mokirakau doimi napebolo hadua taunaNgku au meahi-ahi i olomi, ineekau nodo topesingara au mampopoana doina. 26 Ane moalakau kumbana rangami au mewali pekikingkiami i poindana, hangangaa nipopesulea hangko bara tampu alo, 27 lawi batena pea hantau-ntauna iti kumbana. Apami woia pae au napembalungkui ane maturu? Mewali ane merararoa Iriko, ina Kupehadingi, lawi maahiNa.
Mampopengaa atura
28 Ineeko mohohowara lolita au bara mobila Pue Ala, hai ineeko motunda-tunda hadua tadulako i olomi to Isaraeli.
29 Inee naliu inaomu mampopenomba hangkira hangko i wua paremu hai anggoromu. Nihuhuhe Iriko anami tobalilo au towutu. 30 Nodo wori ulu ana japimi, towaumi hai dimbami au laki, hangangaa nipopenombahe Iriko. Agaiana ana pinatuwomi iti, nipogiangaahe hampai irinanda pitu alona hai i kaualuna alona nuhuhumohe Iriko.
31 Ikamu hangangaa mewalikau taunaNgku au malelaha. Mewali binata au nahaka binata maila bara peisa niande, agaiana hangangaa niweihe dike.