Atura kana i hawi to Ibarani
21
1 Pue mongkora i Musa, Nauli, “Idemi atura-atura au hangangaa nupahaweahe to Isaraeli: 2 Ane moholoko hadua hawi hangka to Ibaranimu, hangangaa napobagoako ini parena kamahaena. Agaiana i kapituna parena, hangangaa nupaliumi padu bona tekabahami hangko i kahawina hai bara paraluu mobaiari apa-apa. 3 Ane i kanuholona wata loa mani pea, padu hangangaa wata loa pea wori. Ane arami towawinena, hangangaa mesuwu wori hihimbela hai towawinena. 4 Ane hawi iti, napopotambi tuana alanda moana tobalilo ba towawine, sambokona iti hai ananahe batenda mewali kirana tuana. Hai ane hawi tobalilo iti rakabahami hangko i karapohawina, batena ia pea au peisa padu. 5 Agaiana ane hawi iti mopatongawa ihi laluna hai mololita i tuana: iko ide mokatiwai mpuuna tuangku, sambokongku hai anangkuhe, barana mau tekabaha hangko i kahawingku, 6 mewali hawi iti hangangaa naanti tuana i paidaa penombaa i Pue Ala. Roo indo, naanti tuana hungku i baba hai napopempaisare i sobo baba hai natohu talingana, bona hawi iti mobago liliumi i tuana liana mani tuwo.7 Ane ara hadua towawine to Ibarani au napobalu umana mewali hawi, ia iti bara peisa rakabaha kehapiri inimi parena, nodo karapopesuwuna hawi tobalilo. 8 Ane hawi towawine iti barapi naunde tuana, hawi iti hangangaa nakira tuana naholo hule tosaena. Tuana bara peisa mampobalu i tohandarena, lawi tuana iti bara mopabukei dandina i towawine iti. 9 Ane hawi towawine iti naholo tuana hai nahuhua anana tobalilo nakadipura, hawi towawine iti hangangaa napahimbela nodo wata anana au towawine. 10 Ane ara hadua tobalilo mampotambia hawina towawine, hai moala hadua towawine ntanina napotambia, towawinena au kaisa iti mia-mia napaande, nahampii hai paka-pakana i tohamboko. 11 Ane tuana iti bara mopabukei au talu pakana iti, towawine iti hangangaa rapopesuwu agaiana bara mobaiari apa-apa.”
Atura kana i rara ngkatuwo tauna
12 Hema pea au mopahai hangka rangana alana mate, hangangaa rapapate. 13 Ane pepapatena iti bara naoaka hai pepapate iti Kupalikangaami mewali, Iko, Pue Ala, ina motudungia hambua paidaa au peisa napelangkai bona raperurui. 14 Agaiana ane hadua rumpu hai natunggaimi mopapate hangka rangana, hai melangka lao mengkatuwo i meja pohuwea popenomba Iriko, tauna iti hangangaa rapopesuwu hai rapapate.
15 Hema au mopahai umana ba inana, batena rahuku mate.
16 Hema au mampelangkaha hadua tauna, maroa napobalumi ba arato mani iria, ia hangangaa rapapate.
17 Hema au motunda-tunda umana ba inana, ia hangangaa rapapate.
18 Ane ara tauna au mobungka hai hadua mepahai hai watu ba timbaluna hawe napohai alana napaturua agaiana bara napomate, 19 hai nabuku mani mearo hai lumao meintoko, tauna au mepahai iti tekabaha hangko i pehuku. Agaiana ia hangangaa mobaiari karugiana tauna au napahai, hai naongkosoi hawe maoha lawi bara peisa mobago.
20 Ane ara hadua mowombe hawina tobalilo ba towawine pane mate, topewombe iti hangangaa rahuku. 21 Agaiana ane hawi iti tuwo mani hangalo, rongalo, inee rahaoki pehuruana. Tuana itito au marugi lawi matantami parewana.
22 Ane ara bahangkia tobalilo tanganda mombetie hai hadua i olonda mopaara kamaingihina hadua towawine au tangana mantimi, agaiana i watana bara ara rugi ntanina, tauna iti hangangaa radenda hintoto hai pamperapina tobalilona moula popakanotona topebotusi. 23 Agaiana ane towawine iti molambi rugi ntanina, pehuku i babehia iti iami kapate rahurungi kapate, 24 mata rapahuru mata, ngihi rapahuru ngihi, taie rapahuru taie, biti rapahuru biti, 25 mawosu rahurungi mawosu, bela rahurungi hai bela, mawae rahurungi mawae.
26 Hema au mopahai matana hawina tobalilo ba towawine alana bilo, hawina iti hangangaa nakabaha kamba pahuruna matana iti. 27 Ane ara hadua au mopahai hawina tobalilo ba towawine alana maoru ngihina, hawina iti hangangaa nakabaha kamba pahuruna nghina au maoru iti.
28 Ane hambaa japi motandu hadua tobalilo ba towawine alana mate, japi iti hangangaa rawatui hawe mate hai bara peisa raande, agaiana ampu japi iti tekabaha hangko i pehuku. 29 Ane japi iti bosami belana metandu hai rapopaingaami ampuna agaiana bara nakadipura maroa, hai japi iti motandu hadua tobalilo ba hadua towawine alana mate, japi iti hangangaa rawatui hawe mate, hai ampuna batena wori rapapate. 30 Ane ampu japi iti rapahaleangia doi podame hangangaa mobaiari hinangka au rapahaleangia kamba pahuruna watana. 31 Ane au natandu japi iti hadua anangkoi tobalilo ba towawine, hangangaa atura iti wori au mewali i ampuna. 32 Agaiana ane japi iti motandu hadua hawi tobalilo ba towawine alana mate, ampu japi iti hangangaa mobaiari talu pulona doi pera i tuana hawi iti, hai japi iti hangangaa rawatui hawe mate.
33 Ane ara hadua au moingihi popetabungi tibubu ba mokae tibubu hai bara natabungi hai nakanawoi hambaa japi ba kalide, 34 ampu tibubu iti hangangaa mobaiari pinatuwo iti i ampuna, agaiana pinatuwo au matemi iti iriami. 35 Ane japina hadua motandu japi tohaduana alana mate, japi au tuwo iti hangangaa rapobalu hai holona ragaa, nodo wori japi au mate iti hangangaa rabika. 36 Agaiana ane japi au mopapate rangana iti hangkokoianami tebambari petanduna hai nauri nodo, ampuna bara mau mokadipura, hangangaa napahuru hai japi au tuwo mani hai japi au mate iti naalami.