Hawa hampulo
20
1 Pue Ala mopahawe ngkoraNa, node: 2 “Ikomi Pue, Pue Ala au nipenombai, au moninimokau mesuwu hangko i Masiri, tampo karapohawiami.3 Ineekau mampenombai anitu: batena pea Iriko.
4 Ineekau mobabehi lengge apa pea au ara i langi i wongko, au ara i tampo i woi, ba au maida i lalu owai i woi tampo hai nipenombai. 5 Hai ineekau menomba i apa pea, lawi Iko Pue, Pue Ala au nipenombai au mohiri, au mohurungi salanda ope-ope tauna au mokahihiNa, hawe i pemuleana katalu hai i kaibana lapina, 6 agaiana mopatongawaNa ahiNgku au bara mokahopoa i isabuna tauna au mopokaahiNa hai au mekingki liliu i hinangka parentaKu.
7 Ineekau mouli-uli mbero hangana Pue, Pue Ala au nipenombai, lawi Pue ina mopakisala tauna au mampopowoo-woo hangaNa.
8 Inee mpuu naliu inaomi alo kapitu hai hangangaa nipamalelaha. 9 Ini alona kamahaena mampobagokau hinangka bagomi, 10 agaiana alo kapitu iami alo penombaa i Pue, Pue Ala au nipenombai. Mewali ineekau mampobago bago apa pea, oio ba anamu tobalilo, anamu towawine, hawimu tobalilo, hawimu towawine, pinatuwomu ba tohandarena au maida i tampomu. 11 Lawi ini alona kamahaena, Pue mobabehi langi hai tampo, tahi hai hinangka ihina, hai mengkaroo i alo kapitu. Idomi hai alo iti Nawati hai Napamalelaha.
12 Bila umamu hai inamu bona matinuwuko i tampo au naweikau Pue, Pue Ala au nipenombai.
13 Ineekau mepapate.
14 Ineekau mebualosi.
15 Ineekau manangka.
16 Ineekau mohowara dongko kana i hangka rangami.
17 Ineekau mampokaelu souna rangami, inee nipokaelu towawinena, hawina au tobalilo ba towawine, japina ba kalidena ba apa pea au ara i hangka rangami.”
To Isaraeli langahe moita kahawena Pue
18 Ope-ope to Isaraeli mohadihe gumpata hai moitahe kila mombembehangke, pomoni tatamburu hai bulu morambu. Mewali moradamohe anti kalanganda hai meangkahe kakarao. 19 Roo nodo, mololitamohe i Musa, rauli, “Oio peami au mololita irikami, ina kipehadingito hai kipeulai. Inee Pue Ala au mololita irikami, matengkai pae.”
20 Mehana Musa i to Isaraeli, nauli, “Ineekau langa, lawi tunggaiana Pue Ala mai irikamu Napetandakau bona ara kalangami Iria hai datipokau mobabehi dosa.” 21 To Isaraeli iti, meangka peahe kakarao, agaiana Musa lao mohungkuki gawu makaindi au nakaarai Pue Ala.
Atura mpenomba i Pue Ala
22 Hangko indo, mongkorami Pue i Musa, Nauli, “Nuuliangaahe to Isaraeli node, ‘Nihadi ntalingami hai niita matami, noumba kaKupololitaami hangko i langi. 23 Ineekau mobabehi lengge hangko i salaka ba bulawa hai nipenombai. 24 Hangangaa nibabehi meja pointua popenomba iriKo au hangko i tampo. I wongko meja pointua popenomba iti, nihuhumi popenomba rahuwe hai popenomba katehoremami, iami towau, dimba hai japi. Iumba pea paidaa au Kupatokami mewali paidaa penombaami Iriko, inditi woriNa ina hawe hai Kuwatikau. 25 Agaiana ane mobabehikau meja pointua popenomba hangko i watu, inee watu au rapaa ba au rabika hai owahe, lawi ane watu au nodo nipake, ina matanta kamalelahana. 26 Ane nubabehi, inee nupamapangka dati nutukai hai mengkaheko lao i wongko, bona dati raita kirana watamu au bara peisa raita.’ ”