Pue mopatongawa watana i bulu Sinai
19
1-2 Roo nodo, melingkamohe to Isaraeli hangko i Rafidim. I alo kaisa wula katalu i kapadunda mai hangko i tampo Masiri, hawemohe i pada wungi Sinai hai mobambarumohe i biti bulu iti. 3 Mempanaimi Musa i bulu iti lao mampohidupaa Pue Ala.Mewali mongkorami Pue i Musa, Nauli, “Nuuliangaahe pemuleana Yako, nupahaweahe to Isaraeli node, 4 ‘Niitami haduduami apa au Kubabehiahe to Masiri hai noumba kaKuninimi mai Iriko, alami hawe i paidaa ide hai kuasa au mahile nodo tadasi rajawali mampembaroa anana. 5 Mewali ide-ide, ane tou-tou mpuukau mampehadingi lolitaNgku hai mekingkikau i dandiKu, ina Kupopewalikau taunaNgku au Kupokakaia hangko i olonda humalele tauna, lawi langi hai tampo ide Iko ampuna. 6 Ikamu ina Kupopewalikau tauna malelaha hai tadulako mpenomba au mampopolumao bago penomba i lalu kadatuaNgku.’ Parenta idemi au nupahawe i to Isaraeli.” 7 Hangko indo, mendaulumi Musa hangko i bulu Sinai hai mopateruhuhe totosaenda to Isaraeli hai napahaweahe ope-ope parentana Pue iria. 8 Mewali ope-ope to Isaraeli iti mehana hihimbela, rauli, “Ope-ope parentana Pue iti kipeulai haha.” Mewali pehananda to Isaraeli iti napahawe wori Musa i Pue. 9 Hangko indo, mongkora mbuli Pue i Musa, Nauli, “Tou-tou ina maiNa irio i lalu gawu au makumba. TunggaiaKu bona rahadi to Isaraeli iti ane mololitaNa hai oio. Hai ihira ina mepoinalai liliuhe irio.” Napahawe wori Musa lolitanda to Isaraeli iti i Pue.
10 Mongkora mbulimi Pue i Musa, Nauli, “Laoko i to Isaraeli iti hai nutuduhe mopamalelaha watanda mepongka alo ide hai kahalo, hai hangangaa mobahoihe hampinda. 11 Nepua hangangaa masilolongamohe, lawi i alo iti ina mendauluNa i wowo bulu Sinai bona raitaNa ope-ope to Isaraeli. 12 Ido hai mantoleli bulu iti hangangaa nuwoli tanda au bara peisa raliungi to Isaraeli. Inee mpuuhe mempanai bulu iti ba laohe meangka i bitina, lawi hema mpuu au moliungi tanda iti hangangaa rapapate. 13 Mogalori ratobo, bara mpuu peisa. Hema au motobo, hangangaa rawatui ba rapana alana mate; hema au moiho bara ina rapogiangaa tuwo, maroa binata ba tauna. Ane momonimi tatamburu mahae-hae, hangko peisarihe mempanai bulu iti.”
14 Mewali mendaulumi Musa hangko i bulu Sinai mai mampombelambiahe to Isaraeli. Natudumohe mopamalelaha watanda hai mobahoi hampinda. 15 Hangko indo, mololitami Musa i to Isaraeli, nauli, “Mampasilolongakau hawe i alo katalu hai ineekau mohungkuki towawine.”
16 I alo katalu madondo-dondo, kegumpatami hai kekila. Tangana nodo, mesupami gawu makumba i wowo bulu hai tehadimi pomoni tatamburu au mehana-hana, alanda ope-ope to Isaraeli au i bambarunda morada-rada anti kalanganda. 17 Mewali napopesuwumohe Musa to Isaraeli hangko i bambarunda bona laohe mampohidupaa Pue Ala hai napopeangkahe i biti bulu iti. 18 Humaogu bulu Sinai nabalungkuhi rambu, lawi Pue mendaulu nodo api i wowona. Rambuna moramuku nodo rambu topehuwe, hai bulu iti rumihi poenggo-enggona. 19 Pomoni tatamburu kamasisimbukuari. Mololitami Musa i Pue Ala, hai Nahanai i lalu gumpata. 20 Hangko indo, mendaulumi Pue i wowo bulu Sinai iti, hai mokakio Musa lao i wowo bulu. Mewali mempanai mpuumi Musa. 21 Roo nodo, mongkorami Pue i Musa, Nauli, “Pempanaulu nou hai nupopaingaahe to Isaraeli datihe moliungi pariolo bona raitaNa. Lawi ane rapari-pari pea moliungi pariolo iti, hangangaa bosahe au ina mate. 22 Nodo worihe tadulako mpenomba ane maihe hungku-hungku iriKo, hangangaa mopamalelahahe watanda. Ane bara, batenda Kuropui.”
23 Hangko indo, mololitami Musa i Pue, nauli, “Barahe mai ina mempanai, lawi Nupopaingamongkai node, ‘Nuwoli tanda mantoleli bulu Sinai hai nupakanotoahe bulu iti iami paidaa au malelaha.’ ”
24 Roo nodo, mongkora mbulimi Pue i Musa, Nauli, “Pempanaulumide nou hai mempanai huleko mai hai Haruni, agaiana tadulako-tadulako mpenomba hai tauna bosa ineehe moliungi pariolo au nupatokami. Ane rapari-pari pea moliungi pariolo iti bona raitaNa, batenda ina Kuropui.” 25 Mewali mempanaulu mpuumi Musa lao mampombelambia to Isaraeli hai mopahawe hinangka parentana Pue irihira.