Yitro mosondaki Musa
18
1 Nahadimi Yitro, pengantina Musa, tadulako mpenomba i Midea, kana i hinangka au nababehimi Pue Ala i Musa hai to Isaraeli, taunaNa, i tempona Pue moninihe to Isaraeli mesuwu hangko i tampo Masiri. 2 Mewali meangkami Yitro lao mosondaki Musa hai moanti Sipora, towawinena Musa au hangkoia natudu mesule i tampo Midea, 3 hai rodua anana Sipora au tobalilo. Au towutu nahanga Gersom, lawi nauli Musa: “Iko mewalimona tohandarena i tampo rare.” 4 Au toadi nahanga Elieser, lawi nauli Musa, “Pue Ala au napenombai umangku iami topetulungingku au mokabahamona hangko i mata mpihona Pirao.” 5 Hawemohe Yitro, pengantina Musa, Sipora towawinena hai ananahe i pada wungi, pobambaruana Musa hungku i bulu malelaha. 6 Mewali Yitro motudumi hadua tauna lao mopahawe i Musa, node, “Iko, pengantimu maina irio, moantina mai towawinemu hai anamuhe rodua.” 7 Roo indo, mesuwumi Musa hangko i bambaru lao mampohidupaa pengantina, motumpami hai meangki. Roo nodo, mombekunemohe noumba bambarinda hadua-hadua hai mesuamohe i lalu bambaru. 8 Napololitami Musa hinangka au nababehi Pue i Pirao hai i to Masiri anti pamperuruiNa to Isaraeli. Napololita wori hinangka kapari au morumpa to Isaraeli i polumaonda hai noumba kanahoremanda Pue. 9 Matana mpuu laluna Yitro mohadi kamaroana Pue au Nababehimi i to Isaraeli, i kaNakabahanda hangko i taienda to Masiri. 10 Mewali nauli Yitro, “Tetoiami Pue au mohoremamokau hangko i taiena Pirao hai to Masiri. 11 Ide-ide kuisa mpuumi, Pue au mahile kuasaNa hangko i ope-ope anitu, lawi Ia mohoremahe to Isaraeli ide hangko i taienda to Masiri au mampempemahilehe irihira.” 12 Roo nodo, Yitro pengantina Musa, mohuhu popenomba rahuwe hai popenomba rasambale i Pue Ala. Mewali Haruni hai ope-ope totosaenda to Isaraeli mai worihe maande sambela hai pengantina Musa i lindona Pue Ala.Musa molantihe tadulako-tadulako
13 Kahalona Musa mobotusi kara-karanda to Isaraeli mepongka madondo hawe kaindi. 14 Kanaitana Yitro ope-ope au nababehi Musa i to Isaraeli mekunemi, nauli, “Apa haha au nubabehi i to Isaraelihe ide? Moapari hai haduduamu pea mohuda molindo to Isaraeli au meangkahe i lindomu mepongka madondo hawe kaindi?”
15 Mehana Musa, nauli, “Tauna iti maihe iriko, mampekune tunggaiana Pue Ala. 16 Ane mosisalahe hangangaa maihe iriko bona kubotusi kara-karanda hai kupahaweahe ope-ope parentana hai atura-aturana Pue Ala.” 17 Agaiana nahanai pengantina, nauli, “Bara maroa ane nubabehi nodo. 18 Ina rumihi kamalengemi maroa oio maroa taunamuhe ide, lawi bago ide mantimi. Bara nubuku ane haduduamu pea mampobago. 19 Mewali ide-ide nupehadingi lolitangku; ina kupaturoko hai batemu ina natulungi Pue Ala. Maroa ane oio mewaliko sarungkoronda to Isaraeli hai kara-karanda nupahawe i Pue Ala. 20 Nupaturoa worihe hinangka parentana Pue Ala hai nupaturoahe rara ngkatuwo hai bago apa au hangangaa rababehi. 21 Agaiana hangangaa nupilei worihe bahangkia tobalilo au matopa hai mengkoru i Pue Ala, au peisa rapoinalai hai au mokahihi pepaimpohi. Nuwolihe motadulakoi tauna au hasabu, au hangatu, au lima pulona hai au hampulo. 22 Hai ihira hangangaa mebotusihe i olonda to Isaraeli au ratadulakoimohe hadua-hadua. Ngkalinari kara-kara mahile hangangaa rapahawe irio, agaiana ane kara-kara koi, ihirami au mobotusi. Mewali ope-ope iti ina mopamangaami bagomu, lawi hihimbelakau ina mampobago bago iti. 23 Ane nubabehi nodo, hai babila naparentaiamokau Pue Ala, mewali ina nubuku mantaha, hai ope-ope to Isaraeli ina matana-matanahe mesule i paidaanda.”
24 Napeulai mpuumi Musa lolitana pengantina hai nababehimi hinangka au nauli. 25 Hangko i olonda to Isaraeli, Musa mopileimohe tauna au matopa hai naangkahe mewali tadulako i hasabu tauna, hangatu, lima pulona hai hampulo. 26 Hambela-hambela, ihira mobotusi kara-karanda to Isaraeli. Kara-kara au mapari hangangaa rapahawe i Musa agaiana kara-kara au koi rabotusimi haduduanda. 27 Hangko indo, Musa mampopelingkami pengantina mesule i tampo Midea.