I Masa hai i Meriba
17
1 Hangko indo, meangkamohe ope-ope to Isaraeli hangko i pada wungi Sin, hai melimba-limbahe hangko i paidaa hambua hai laohe i paidaa au ntanina, lawi nodomi parentana Pue. Hambela tempo mobambarumohe i Rafidim, agaiana i paidaa iti bara ara owai. 2 Mepongkamohe mampombehehea Musa, rauli, “Nuweingkai owai kienu.” Mehana Musa, nauli, “Moapari hai nipombeheheana? Moapa wori hai mampetandakakau Pue?”3 Mangkadou ntepuumohe to Isaraeli iti, ido hai mampohumei liliuhe Musa, rauli, “Moapari hai nupopesuwungkai hangko i tampo Masiri bona ikami, anangkihe hai binatangkihe matengkai mangkadou?” 4 Mewali meraroami Musa i Pue, nauli, “Apa au ina kubabehi i to Isaraelihe ide? Ina rawatuimona.”
5 Mongkorami Pue i Musa, Nauli, “Kakiohe bahangkia totosaenda to Isaraeli hai molumaokau iorunda to Isaraeli iti. Hai nuanti wori laimu au nuhepeka i wongko owai Nil. 6 Ina meangkaNa i lindomu i wongko bulu watu i Horeb. Bulu watu iti hangangaa nuwombe bona mesuwu mai owai hangko i laluna alana maenumohe to Isaraeli iti.” Nodomi nababehi Musa i lindonda totosaenda to Isaraeli.
7 Rahangami paidaa iti Masaa hai Meribab, lawi inditimohe to Isaraeli mombehehe hai mampetandaka Pue, rauli, “Ara pae Pue i olonta ba bara?”
Penanginda to Isaraeli mombeala hai to Amale
8 Hangko indo, maimohe to Amale mampombealaa to Isaraeli i Rafidim. 9 Musa mololita i Yosua, nauli, “Pileihe bahangkia tauna bona laohe mampombealaa to Amale. Kahalo meangkana i wowo bulu mokingki lai au Nauliangaana Pue kuanti.” 10 Nababehi mpuumi Yosua apa au nauliangaa Musa hai laomi mampombealaa to Amale, agaiana Musa, Haruni hai Hur mempanaimohe lao i wowo bulu. 11 Mewali ane natindora Musa taiena, marohohe to Isaraeli, agaiana ane napopendaulu taiena, to Amalehe au maroho. 12 Mangingimi taiena Musa, mewali Haruni hai Hur moalahe haogu watu napohudai Musa; Haruni hai Hur meangkahe i kabeo hai i koana, mohugahe taiena Musa bona teangka liliu hawe tampu alo. 13 Nodomi Yosua monangihe to Amale hai mata mpiho.
14 Roo nodo, mongkorami Pue i Musa, Nauli, “Penangi ide nuuki i hambua sura bona rakatuinao liliu. Hai nuuliangaa Yosua, ina mopatunaNa to Amale datipohe rakakatuinao i wongko dunia.” 15 Mewali Musa moaro haogu watu pohuwea popenomba i Pue au nahanga, “Puemi panji-panjiku.” 16 Nauli Musa, “Tindora mapangka-pangka panji-panjina Pue! Pue mampombealaa to Amale i hae-haena.”