Manna hai Alo Pengkarooangaa
16
1 I peangkanda to Isaraeli hangko i Elim, hawemohe i pada wungi Sin au i olo Elim hai bulu Sinai i alo kahampulo hai lima wula kadua mepongka i popalehinda tampo Masiri. 2 I pada wungi iti, to Isaraeli mohume-humehe i Musa hai Haruni, 3 rauli, “Agingkimi napapate Pue i tampo Masiri. Nauringkai rapohawi, batengki maande bau hai roti hawengkai mabuhu. Agaiana niantiringkai mai i pada wungi ide bona matengkai laloara.” 4 Roo nodo, mongkorami Pue i Musa, Nauli, “Ide-ide ina mampopendauluNa paandemi au ngkaia nodo uda hangko i langi. Mewali alo-alona hangangaa mesuwukau hangko i bambarumi hai laokau motima paande iti i sukana niande hangaloa. Itimi rara au Kubabehi mampetandaka taunaNgku bona Kuisa ba tou-tou mpuuhe mampeulai hawaNgku ba bara. 5 I alo kaini hangangaa morampuhe paande i sukana rongalo.” 6 Hangko indo, mololitamohe Musa hai Haruni i to Isaraeli, rauli, “Kalumba ide ina niisa kaPuenami au moninikau mesuwu hangko i tampo Masiri. 7 Hai kahalo madondo, ina moitakau peawana Pue, lawi Nahadimi pohume-humemi Iria. Moapari hai nipohumeingkai? Hemangkai pae dide?” 8 Nauli mbuli Musa, “Kalumba ina Naweikau Pue bau, hai madondo Napaandekau roti alami mabuhu, lawi Nahadimi pohume-humemi Iria. Katouana ane rumpukau irikami, himbela peakau rumpu i Pue.”9 Hangko indo, mololitami Musa i Haruni, nauli, “Nuuliangaahe ope-ope to Isaraeli node: Maimokau hungku-hungku i lindona Pue, lawi Nahadimi pohume-humemi.” 10 Tangana mani Haruni mololita i to Isaraeli, mogolirihe lindonda ntanda i pada wungi, mewali unga peahe moita peawana Pue i lalu gawu. 11 Hangko indo, mongkorami Pue i Musa, Nauli, 12 “Kuhadimi pohume-humenda to Isaraeli, mewali nuuliangaahe: Kalumba ina maandehe bau, madondo maandehe roti hawe mabuhu. Mewali indomi raisa Ikomi Pue, Pue Ala au rapenombai.”
13 I kalumbana, hawe mpuumohe tadasi pipiko au bosa hai mobukehihe humalele pobambarua, hai madondo mendaulumi langalo mantoleli pobambarua. 14 Ane mengkaoremi langalo iti, raitami i wongko pada wungi ara hampaka au manete-nete nodo ruke hai maluha nodo langalo au baku. 15 Karaitana to Isaraeli, mombekunemohe hadua hai hadua, rauli, “Apahe dohou?” Mewali nauliangaahe Musa, “Oloumi paandemi au Naweikau Pue. 16 Node ngkorana Pue: nitimami hadua-hadua hintoto hai kaparaluuami hantambi-hantambi, moula kabosami, hadua hagomer.”a 17 Mewali itimi au rapeulai to Isaraeli, ara au mogulu ngkaia, hai ara wori au motima haodi. 18 Ane rahokami hai hoka au rauli gomer, tauna au motima ngkaia bara melabi; au motima haodi bara wori makura. Hadua-hadua mogulu moula sukana au naparaluu. 19 Musa mololita i to Isaraeli, nauli, “Inee mpuu ara hadua au mampentara paande iti hawe madondo.” 20 Agaiana ara au bara mampehadingi lolitana Musa, hai mampentara paande iti hawe madondo. Kahopoana paande iti keuli hai mawai, ido hai rumpumi Musa irihira.
21 Alo-alona madondo hadua-hadua morampu i sukana au naparaluu; agaiana ane mapanami alo magonumi paande iti. 22 I alo kaini to Isaraeli motimahe paande au rombela kangkaiana iami rogomer hadua. Hai ope-ope tadulakonda to Isaraeli maihe mampopaisaa Musa apa au rababehi to Isaraeli. 23 Mewali mololitami Musa irihira, nauli, “Idemi parentana Pue: kahalo Alo Pengkarooangaa iami alo au napamalelahami Pue mewali alo penombaa Iria. Alo ide roti au paraluu nitunu, nitunumi hai apa au paraluu nidaka, nidakami, hai pelabiana hangko i alo ide nipatani hai niwoli niande kahalo.” 24 Pelabiana paande iti rawoli kahalona, moula hawana Musa; paande iti bara mawai hai bara keuli.
25 Kaliliuana Musa mololita, nauli, “Niandemi paande iti i alo ide, lawi alo ide Alo Pengkarooangaa hai penombaa i Pue. Paande ide bara ina nihumba i pada wungi. 26 I lalu ini alona motimakau roti iti, agaiana i alo kapitu, iami Alo Pengkarooangaa, mewali paande iti bara ara i alo iti.”
27 I alo kapitu iti, arahe bahangkia to Isaraeli au laohe mohaoki paande iti, agaiana bara ralambi. 28 Idomi hai Pue mongkora i Musa, Nauli, “Hangkia mani kamahaena barakau mampeulai hinangka parentaKu? 29 Nikatuinao! Kuweimokau hangaloa nipengkaroongi. Idomi hai i alo kaini Kuweimokau paandemi sukana rongalo. I alo kapitu iti maidamokau i bambarumi hai inee ara hadua au mesuwu.” 30 Mengkaroo mpuumohe to Isaraeli i alo kapitu, hai barahe mobago.
31 Paande iti rahanga to Isaraeli ‘manna’. Paande iti moleogu, kokoi hai bula. Minana nodo roti au ragalo tinaha. 32 Nauli Musa, “Ikita Natuduke Pue moala roti ide hagomer hai tawoliahe pemuleanta bona raita paande au naweike Pue i pada wungi i kaNanininta mesuwu hangko i tampo Masiri.” 33 Idomi hai Musa mololita i Haruni, nauli, “Ala hambua pahalo, hai nuihii manna hagomer, hai nuhuhu i lindona Pue, hai tawoli bona raita pemuleanta.” 34 Mewali nawoli mpuumi Haruni pahalo iti i lindo peti pambolia atura-aturana Pue moula parentana Pue i Musa. 35 Manna iti raande to Isaraeli iba pulona parena kamahaena, alanda hawe i tampo Kanaa, paidaa roonda au Nadandiamohe Pue Ala. 36 Hagomer himbela hai hangkira hampulo efa au hokana hintoto hai roliter.