Nanina Musa hai to Isaraeli
15
1 I tempo iti, Musa hihimbela hai to Isaraeli mamponanihe nani ide i Pue:Monanina motoia Pue,
lawi Ia menangi anti kamakuasaNa;
dara hai au mampesawii
Natendehe i tahi.
2 Pue iti rohongku, iriami petoiangku;
Iami katehoremangku.
Iami Pue au kupenombai, kutoia Ia;
Iami Pue Ala au natoia umangku,
kupomahile Ia.
3 Pue iami tadulako i pombeala;
Pue, itimi hangaNa.
4 Karetana Pirao hai surodadona,
Natendemohe i lalu tahi;
tadulako pombeala au tepilei
Natimbingimohe i lalu tahi Teberau.
5 Nabalumbangimohe tahi au maemba;
tirihe i owai au kaladu nodo watu.
6 Taie koanamu Pue, meawa anti kamakuasaMu;
taie koanamu Pue, moropui iwali.
7 Hai peawaMu au mahile,
Nudungkahe ope-ope tauna au meewa Irio;
karumpuMu au rore Nuhoparaka,
au mopapumpuhe nodo patoa deami.
8 Anti pewuina inaoMu, owai tahi mengkahe tewiwilolo;
hinangka au moili tetaha nodo patompo;
owai au melaboa baku i tanga-tanga tahi.
9 Rauli iwali, “Ina kuwulaihe hai ina kulambihe,
ina kukira-kira pamuru;
ina kupengkahuhungihe anti karumpuku,
ina kuwuka pihongku;
taiengku ina mopaonehe.”
10 Hambela pea alimuruMu mewui,
ihira ope nabalumbangi tahi;
nodohe tamoro ihira tiri;
malisohe i lalu owai au melangaki.
11 O Pue, hema au nodo Oio i olonda anitu?
Hema hasimbelaMu meawa anti kamalelahaMu,
au melangaki anti bagoMu au tolele?
Oiomi topobabehi tanda au metingkarai.
12 Taie koanaMu Nuona;
mewali tunamohe iwali naame tampo.
13 Hai ahiMu au bara mokahopoa,
Nupoteteahe taunaMu au Nuhoremamohe;
hai kamarohoMu,
Nuninihe lao i paidaaMu au malelaha.
14 Humalele tauna au mohadi, langahe hai moradahe;
kalanga molelehi to Pelisiti.
15 I tempo iti, tadulakonda to Edom tingkarahe;
morada-radahe tauna au makuasa
anti kalanganda;
ope-ope to Kanaa morada-radahe.
16 Kawulunga hai kalanga morumpahe,
moita kamarohona kuasaMu,
barahe mokale-kale,
nodo pearaihe watu,
hawe wetahe taunaMu, O Pue;
duunda wetahe taunaMu au Nuhorema.
17 Nuninihe hai Nupopaidahe
i wowo bulu au Nupileimi;
maidahe i bulu paidaaMu au malelaha, O Pue,
i sou au Nuaro haduduaMu, O Pue.
18 Pue moparenta i hae-haena.
Nanina Miriam
19 I tempona darana Pirao hai karetana hai taunana au modara hai surodadona mesuamohe i lalu tahi, Pue mampopohidupa hule tahi mobalumbangihe alanda maliso, agaiana to Isaraeli lumaotohe i tampo au bangi. 20 Mewali Miriam, hadua nabi towawine, wutuna Haruni moala rebana, hai ope-ope towawine meulahe mokanda rebana hai motarohe. 21 Roo nodo, monanimi Miriam mampoioruahe,
“Monanimoke motoia Pue,
lawi Ia menangi anti kamakuasaNa.
Dara hai au mampesawii
Natendehe i lalu tahi.”
I Mara hai i Elim
22 Roo nodo, Musa moninihe to Isaraeli hangko i tahi Teberau laohe i pada wungi Syur. I lalu talu alona polumaonda i pada wungi iti, barahe molempo owai. 23 Hawemohe i Mara, agaiana inditi owaina bara peisa raenu lawi mapai minana. Idomi hai paidaa iti rahanga Mara. 24 Mewali to Isaraeli mohume-humemohe i Musa hai mekunehe, rauli, “Apami au ina taenu?” 25 Mekakaemi Musa i Pue, ido hai Natudungia kau hantepo. Naalami Musa kau iti hai natende i owai, ido hai owai iti matamami raenu. Inditimi Pue moweihe to Isaraeli atura-atura, hai inditi worimi Pue mampetandakahe. 26 Nauli, “Ane tou-tou mpuukau mampehadingi lolitaNgku hai mobabehi apa au maroa i peitaNgku, nipehadingi hinangka parentaKu hai mampeulaikau atura-aturaNgku, barakau ina Kuhuku hai haki apa pea au Kupoparumpaamohe to Masiri, lawi Ikomi Pue au mopakaohakau.”
27 Roo nodo, hawemohe to Isaraeli i Elim. Inditi ara hampulo hai rombua pentumbua owai hai pitu pulona poana kau korma. Mewali mobambarumohe to Isaraeli i wiwi owai iti.