Kaopeana dakena Pirao i to Isaraeli
14
1 Mongkorami Pue i Musa node, 2 “Nuuliangaahe to Isaraeli bona mesulehe hai mobambaruhe i lindo wanua Pi-Hahirot i olo Migdol hai tahi Gelaga hungku i wanua Baal-Sefon. 3 Mewali ina napehangu Pirao to Isaraeli iti puhahe i pada wungi hai molinto-lintohe i paidaa ide. 4 Iko ina mopamatua laluna Pirao alana nawulaikau. Agaiana kamakuasaNgku ina kupatongawa i Pirao hai i surodadona alana raisa to Masiri Ikomi Pue.” Mewali rababehi mpuumi to Isaraeli hintoto hai au nahawaahe Pue.5 I kanahadina datu Masiri iti, to Isaraeli padu ngkandiimohe, tebalikimi laluna hai topobagonahe, ido hai mololitahe rauli, “Apari dide tababehi pane tapogiangaahe to Isaraeli iti padu alana barapohe ara hawinta?” 6 Roo nodo, Pirao mopasilolongami kareta pombeala hai moanti wori taunana. 7 Meangkami moanti kareta au i Masiri, tepesua ini atuna kareta au tepilei hai rapesawiihe tadulako surodadona. Pirao moanti ini atuna kareta au tepilei. Kareta-kareta iti moanti tadulako pombeala. 8 Nodemi rarana Pue mopamatua laluna Pirao, datu Masiri iti, alana mowulaihe to Isaraeli au tanganda molumao mopalehi tampo Masiri i lalu pekampaina Pue. 9 Mewali to Masiri, ope-ope dara karetana Pirao, topodara hai surodadonahe, mowulaihe to Isaraeli hai ralambihe i pobambaruanda i wiwi ntahi, hungku i Pi-Hahirot i lindo Baal-Sefon.
10 I tempona Pirao hai taunana hungkumohe, membalilimohe to Isaraeli hai raita ina ralambimohe, rumihimi kalanganda. Ido hai, merararoahe merapi tulungi i Pue. 11 Mololita worihe i Musa, rauli, “Bara pae ara popatawua i Masiri pane nuantingkai mai mate i pada wungi ide? Apa au nubabehiangkai ide pane nupopesuwungkai hangko i tampo Masiri? 12 Bara pae roomoko kiuliangaa hangkoia i tampo Masiri: ineemongkai nukendo-kendo, pogiangaamongkai rapobatua to Masiri lawi agingkimi rapobatua to Masiri panengkai mate i pada wungi ide.” 13 Agaiana mehana Musa, nauli, “Ineekau langa, nipakaroho lalumi! Ina niita noumba pehoremana Pue irikamu i alo ide, lawi to Masiri au niitahe alo ide barapohe ina niita i hae-haena. 14 Pue au ina mombeala mamperuruikau, hai ikamu roo-roo peamokau.”
Powetanda to Isaraeli i tahi Teberau
15 Mongkorami Pue i Musa, Nauli, “Moapari hai merararoako merapi tulungi iriKo? Nuuliangaahe to Isaraeli lumao liliuhe. 16 Tindora laimu hai nuona taiemu i wongko tahi hai nupopogaa owaina bona to Isaraeli peisahe molumao i tampo bangi. 17 Agaiana ina mopamatua ntepuuNa lalunda to Masiri, alana mowulai liliuhe to Isaraeli, hai kamakuasaNgku ina Kupatongawa i datu Masiri, surodadonahe, karetanahe hai tauna au modara. 18 Mewali ane mopatongawamoNa kamakuasaNgku i Pirao, karetana hai surodadonahe ina raisa to Masiri, Ikomi Pue.”
19 Roo nodo, malaekana Pue Ala hai lai gawu au lumao iorunda surodadonda to Isaraeli melimba lao i taleu. 20 Lai gawu iti meangka i olonda surodado to Masiri hai surodado to Isaraeli. Gawu iti mopaara kamakaindi, ido hai hambengia iti surodado to Masiri hai to Isaraeli barahe peisa mombehungkuki.
21 Roo nodo, Musa moona taiena i wongko tahi hai Pue mopaara himburu kebuu hangko i Mata alo au mopamausu tahi. Himburu iti mewui hambengia alana tegaami tahi, ido hai arami tampo au bangi i tanga. 22 Mewali molumaomohe to Isaraeli i tanga tahi i tampo au bangi iti, hai owai i koana hai i kabeonda mewalimi bentenda.
23 To Masiri, ope-ope surodadonda, topodara hai kareta pombeala mowulai liliuhe to Isaraeli hawe i tanga-tanga tahi. 24 Hungku mabaa, Pue au ara i lai gawu hai lai api mototokihe surodadonda to Masiri hai Napamagunegohe. 25 Karetanda Napadumbe, ido hai mapari rahadi mewulai alana mololitahe, rauli, “Pueri wei dide au mampombealaake; Ia mamperuruihe to Isaraeli. Agintari melangka hangko inde. Maikau, palehihe to Isaraeli.”
26 Roo nodo, mongkorami Pue i Musa, Nauli, “Ona taiemu i wongko tahi bona owai au tegaa hidupa hule hai mobalumbangihe to Masiri, kareta-kareta pombeala hai ope-ope surodado au modara.” 27 Naona mpuumi Musa taiena i wongko tahi. Mewali hungku mabaa, mohidupa hulemi tahi i paidaa amina au tangana raporarai to Masiri melangka. Nodemi Pue mopamalisohe to Masiri i tanga-tanga tahi. 28 Tahi iti hidupa hulemi hai mobalumbangihe to Masiri, kareta-kareta pombeala hai ope-ope surodadona Pirao au mowulaihe to Isaraeli i tanga tahi. Mewali to Masirihe iti, bara mpuu huba hadua au tuwo. 29 Agaiana i temponda to Isaraeli moweta tahi, lumaohe i kabangiana hai owai au i koananda hai au i kabeonda mewali bentenda.