Atura kana i ana towutu
13
1 Mongkorami Pue i Musa, Nauli, 2 “Ope-ope ananda to Isaraeli au towutu nupopenombahe Iriko, nodo wori ulu ana pinatuwonda. Ope-ope iti, Iko ampuna.”Atura kana i alo mahile paande roti au bara raragii
3 Hangko indo, mololitami Musa i to Isaraeli, nauli, “Niposusaimide alo ide, lawi alo idemi pesuwuami hangko i tampo Masiri tampo karapohawiami. Anti kamakuasana Pue, Naninimokau mesuwu hangko i tampo Masiri. Ido hai, roti apa pea au raragii bara peisa raande. 4 Alo ide i wula Abib, mesuwumokau. 5 Ina naninimokau Pue lao i tamponda to Kanaa, to Heti, to Amori, to Hewi, hai to Yebusi, tampo au Nadandimi hai sumpaNa i toiorumi. Hai ane Naweimokau tampo au marudu hai pebuku iti, hangangaa mobabehikau posusa penomba i wula ide. 6 Niandemi roti au bara raragii pitu alona kamahaena hai i alo kapitu hangangaa mosusakau menomba i Pue. 7 Mewali roti au bara raragii hangangaa niande i lalu pitu alona iti; hai i humalele tampomi inee mpuu ara hampaka au keragi.
8 I alo iti hangangaa nituntuahe anami: posusa hai penomba ide iami pokatuinao kamakuasaNa Pue irikami i kaNaniningki mesuwu hangko i tampo Masiri. 9 Posusa ide hangangaa mewali pepopainga irikamu nodo tanda i taiemu hai i wingkemu bona mohowara liliukau aturana Pue hai nipailalu, lawi Naninimokau mesuwu hangko i tampo Masiri hai kuasaNa au mahile. 10 Atura ide hangangaa nikingki hai niposusai i tempo au tepatokami i pare-parena.”
Pampopenomba ana towutu
11 Mololita mbulimi Musa i to Isaraeli, nauli, “Ina naninikau Pue mesua i tampo Kanaa nodo au Nadandimi hai sumpa irikamu hai i toiorumihe. Hai ane tampo iti Nakiraiamokau, 12 hangangaa nipopenomba i Pue anami au towutu hai ope-ope ulu ana pinatuwo au balilo, lawi ope-ope iti Pue ampuna. 13 Ope-ope ulu ana kalide au balilo hangangaa nipahuru hai ana dimba. Ane bara nipahuru, hangangaa nitepo tambolona. Agaiana dua-duana anami tobalilo au towutu, hangangaa nipahuru. 14 Ane mekunehe anami hangalo irikamu, ‘Ope-ope ide apa lempona?’ Mewali hangangaa nihanaihe node, ‘Anti kamahilena kuasana Pue, Naninimoke mesuwu hangko i tampo Masiri, tampo karapohawianta. 15 Lawi i tempona Pirao matua laluna hai barake napaliu padu hangko i tampo Masiri, Pue mopapate ananda to Masiri tobalilo au towutu hai ulu ana pinatuwonda au balilo. Idomi hai paka mampopenombana ulu ana pinatuwo au balilo i Pue, agaiana anangku tobalilo au towutu hangangaa kupahuru hai ana dimba.’ 16 Atura ide hangangaa mewali tanda i taiemu hai i wingkemu, lawi hai kamarohona taiena Pue, moninike mesuwu hangko i tampo Masiri.”
Pue Ala monini to Isaraeli
17 I kanapaliundami Pirao to Isaraeli padu, barahe nanini Pue Ala moula rara au melempo i tamponda to Pelisiti, nauri rara iti hungku; lawi napekiri Pue Ala, “Menosohe pae ane molindohe pombeala alanda mesule hulehe i tampo Masiri.” 18 Agaiana naninirihe Pue Ala moula rara i pada wungi monontohi tahi Teberau. I peangkanda hangko i tampo Masiri, nodohe surodado au ina lao mombeala.
19 Musa moanti buu rangkana Yusupu, lawi i tempona mani Yusupu tuwo, motudumohe anana Isaraeli mosumpa node: “Ikamu batemi Nanini Pue Ala mesuwu hangko i tampo Masiri ide. Mewali buu rangkaku hangangaa nianti hangko inde.”
20 Meangka mpuumohe to Isaraeli hangko i Sukot hai mobambaruhe i Etam i wiwi pada wungi. 21 Mabaa Pue mampoioruahe to Isaraeli nodo lai gawu hai kaindi nodo lai api mopamabaa raranda. Ido hai peisahe molumao mabaa hai kaindi. 22 Alo-alona hai wengi-wengina, lai gawu hai lai api iti ara liliu iorunda to Isaraeli.