Kana i posusa Pasa
12
1 Mongkorami Pue i Musa hai Haruni i tampo Masiri, Nauli, 2 “Wula idemi au mewali wula kaisa irikamu i pare-parena.a 3 Nipahawe i ope-ope to Isaraeli, ‘I alo kahampulo wula ide, hadua tobalilo i hantambi-hantambi hangangaa moalahe hambaa ana dimba rapahintoto hai kabosanda. 4 Agaiana ane tohantambi iti barahe bosa hai bara rabuku moande ope-ope hambaa ana dimba, peisahe mogulu hai hintongginda moala hambaa ana dimba au rapahintoto hai pesauruanda moande. 5 Peisa nipilei dimba ba towau agaiana hangangaa au laki, bara mohaki hai au hangko hampare tinuwuna, 6 hai hangangaa nitaka hai nikadipura maroa hawe i alo kahampulo hai iba wula ide. I kalumbana alo iti, ope-ope to Isaraeli hangangaa mosambalemohe ana dimba ba towau au rapasilolongami iti.b 7 Roo indo, wahena hangangaa raala hai rapariha i rombali sobo baba hai i wongkona, i ogu-ogu sou au rapaidai hai rapaandei. 8 I kaindi iti peawomi, bau iti hangangaa ratunu hai raande hihimbela hai roti au bara raragii hai halo mapai. 9 Inee niande mata ba ninahuki; hangangaa nitunu pea hihimbela hai waana, bitina hai ihi laluna. 10 Mogalori haodi, inee nipopentara hawe madondo. Ane ara au mentara, hangangaa nihuwe. 11 I tempomi maande, hangangaa masilolonga amimokau molumao: nibokemi pekomi, mekandupamokau hai melaimokau. Maandekau hoholiga. Itimi posusa Pasac i Pue. 12 Lawi i wengi iti, ina molumaohiNa tampo Masiri hai ope-ope ulu ana maroa tauna ba pinatuwo ina Kupapate hahahe. Hai ope-ope anitunda to Masiri ina Kuhukuhe lawi Ikomi Pue. 13 Hai wahe au nipariha i baba soumi, itimi au mewali tanda i ogu-ogu sou paidaami. Ane Kuitami wahe iti, ina moliu peana irikamu. Mewali barakau ina molambi pehuku kapate ane mohukumoNa to Masiri. 14 Alo ide ina mewali alo pepopainga irikamu. Alo iti, hangangaa niposusai mewali alo mahile i Pue hawe i pemuleami. Alo iti tepakanotomi hangangaa niposusai liliu i pare-parena hawe i hae-haena.’ ”Posusa roti au bara raragii
15 Pue mongkora mbuli i to Isaraeli, Nauli, “Niandemi roti au bara raragii, pitu alona kamahaena. I alo kaisa, ope-ope ragi i soumi hangangaa nitendemi, lawi hema pea au moande paande au raragii, mepongka i alo kaisa hawe i alo kapitu, tauna iti hangangaa rawura hai barapi raimba to Isaraeli. 16 Hangangaa mopaarakau poteruhu au malelaha i alo kaisa hai i alo kapitu. I alo iti barakau peisa mobago nauri hampaka; ba tauli ane mopasilolongakau paandemi, hintoto hai au naparaluu hadua-hadua. 17 Mewali posusa paande roti au bara raragii, hangangaa niposusai liliu pare-parena, hawe i pemuleami. Lawi i alo itimi, moniniNa to Isaraeli mesuwu hangko i tampo Masiri. Mewali itimi hampaka atura hawe i hae-haena. 18 I wula kaisa, mepongka i alo kahampulo hai iba kalumba, niandemi roti au bara raragii hawe i kalumbana alo karompulo hai isa. 19 Pitu alona kamahaena ragi bara peisa ara i soumu, lawi hema au moande paande au raragii, tauna iti hangangaa rawura hai barapi raimba to Isaraeli, maroa tohandarena ba to Isaraeli. 20 Apa pea au keragi bara peisa niande; niandemi roti au bara raragii iumba pea paidaami.”
Pasa au nguru-nguruna
21 Kaliliuana Musa mokakiohe ope-ope tadulakonda to Isaraeli hai nauliangaahe, “Laomokau nialami ana dimba ba towau hantambi-hantambi hai nisambale i posusa Pasa. 22 Roo indo, hangangaa niala hisop hambokea hai nieme i lalu loia au kehi wahe ana dimba iti hai nipariha i sobo baba soumi pontimali hai i wongko. Inee mpuukau ara hadua au mesuwu hangko i lalu soumi hawe madondo. 23 Pue ina molumaohi tampo ide hai mopaara pehuku. Ane Pue moita wahe i sobo baba soumi pontimali hai i wongkona, ina Naliukau hai bara mopaliu malaeka au mepapate mosuaki soumi. 24 Atura ide hangangaa nikingki liliu i hae-haena hawe i pemuleamihe. 25 Ane hawemokau i tampo au naweimokau Pue, nodo au Nadandiamokau, ada posusa ide hangangaa nibabehi liliu. 26 Hai ane mekunehe anami irikamu, ‘Apa lempona posusa Pasa ide?’ 27 Hangangaa nihanaihe, node, ‘Idemi alo pohuhu popenomba Pasa i Pue, lawi sou to Isaraeli i tampo Masiri Naliu pea i tempoNa mopapate ananda to Masiri tobalilo au towutu. Agaiana ikita napalikangaake tuwo!’ ” Liliu to Isaraeli motumpahe menomba i Pue. 28 Roo nodo, laomohe to Isaraeli iti hai mobabehihe nodo apa au naparentai Pue i Musa hai Haruni.
Pehuku au kahampulo: ananda to Masiri au towutu mate
29 Tanga kaindi iti Pue mopapatehe ananda to Masiri tobalilo au towutu, mepongka i anana Pirao au mohuda i kadera kadatuana hawe i ana towutunda toratawani au ara i lalu tarunggu hai ope-ope ulu ana pinatuwo. 30 Mewali mearomi Pirao i kaindi iti, hihimbela hai ope-ope topobago hai ope-ope to Masiri; hai tehadimi pandawi-ndawi i tampo Masiri, lawi bara ara sou au bara ketomate. 31 Mewali i wengi iti peawomi, Pirao mokakio Musa hai Haruni, nauliangaahe, “Padumokau hangko i olonda taunangku, ikamu hai ope-ope to Isaraeli. Laomokau menomba i Pue au nipenombai hintoto hai pamperapimi. 32 Niantihe ope-ope japi, dimba hai towaumi hai laomokau! Niperapia worina pewati.”
33 Mewali to Masiri mopari-pari worihe to Isaraeli bona padumohe hoholiga hangko i tampo Masiri, lawi rauli, “Opengkai pae mate ane barakau padu hangko inde.” 34 Roo nodo, to Isaraeli moalamohe loia au kehimi roti au bara mani raragii au roomi ragunta, rabungku komo hai rahaleami. 35 Rababehi wori, apa au nauliangaamohe Musa iami: merapihe parewa bulawa, salaka hai bana hangko i to Masiri. 36 Pue mopamalulu lalunda to Masiri i to Isaraeli iti, alana hinangka pamperapinda to Isaraeli rapabukei. Nodemi rarana to Isaraeli morampakihe to Masiri iti.
Pesuwunda to Isaraeli hangko i tampo Masiri
37 Hangko indo, meangkamohe to Isaraeli hangko i wanua Ramses laohe i wanua Sukot. Kabosanda ini atuna sabuna tobalilo, barahe tepesua anangkoi. 38 Bosa worihe tohandarena au meula irihira. Moanti worihe ngkaia japi, dimba hai towau. 39 Ratunumi roti au bara raragii au roomi ragunta au raanti mai hangko i tampo Masiri, lawi rawura ngkasarahe mai alana barahe mampaka mampasilolonga bakunda. 40 Kamahaenda to Isaraeli maida i tampo Masiri, iba atuna hai talu pulona parena. 41 Handami iba atuna hai talu pulona parena, hintoto hai alo iti, ope-ope taunana Pue padumohe hangko i tampo Masiri. 42 Kaindi iti, Pue mokampaihe to Isaraeli hai Naninihe mesuwu hangko i tampo Masiri. Wengi iti mewali wengi penombaanda i Pue i hae-haena, tanda pebilanda i Pue hai wengi kamainga-inganda to Isaraeli.
Atura posusa Pasa
43 Mongkorami Pue i Musa hai i Haruni, Nauli, “Idemi atura kana i posusa Pasa: tohandarena, bara peisa moande paande posusa Pasa. 44 Agaiana hawi au niholo peisa moande ane ratilemi. 45 Torare ba tauna au laohe masaoki irihira, bara peisa moande. 46 Bau ana dimba Pasa hangangaa raande ope-ope i lalu sou, mogalori haodi bara peisa raanti i raoa. Inee mpuu ara buuna au nitepo. 47 Ope-ope to Isaraeli hangangaa mamposusai alo Pasa iti. 48 Ane ara hadua tobalilo tohandarena au maidami irikamu hai naunde mamposusai Pasa i Pue, tauna iti hai ope-ope tobalilo au hihimbela hai ia hangangaa ratile, hangko peisari mamposusai alo Pasa hai ia teimbami to Isaraeli. Agaiana bara mpuu huba hadua au peisa moande Pasa ane bara mani ratile. 49 Hinangka atura i to Isaraeli, iti wori atura au hangangaa rapeulai tohandarena au maida roohe hai ihira.” 50 Ope-ope to Isaraeli mobabehimohe nodo moula parentana Pue i Musa hai Haruni. 51 Mewali alo iti peawomi, Pue moninihe to Isaraeli mesuwu hangko i tampo Masiri moula tina-tinanda.