Pehuku kahampulo rapopaisa
11
1 Mongkorami Pue i Musa, Nauli, “Iko ina mopaara mbuliNa hampaka pehuku i Pirao hai i to Masiri. Roo indo, ina napaliumokau padu hangko inde. Ane napaliumokau padu, tou-tou mpuu ina nawuramokau hangko inde. 2 Mewali, nuuliangaahe to Isaraeli bona hadua-hadua tobalilo hai towawine merapihe anu-anu bulawa hai salaka i hintongginda.” 3 Kaliliuana, Pue mopamalulu lalunda to Masiri i to Isaraeli; apa mani Musa iami hadua au raadai hai rabila topobagonahe Pirao hai ope-ope to Masiri.4 Mololitami Musa, nauli, “Node ngkorana Pue: ‘I tanga kaindi ina molumaoNa mantoleli tampo Masiri. 5 Mewali ope-ope anangkoi tobalilo au towutu i tampo Masiri ina mate, mepongka i anana Pirao au mohuda i kadera kadatuana hawe i ananda hawi towawine au mogilihe pare, nodo wori ope-ope ulu ana pinatuwo. 6 Hai pandawi-ndawi au rumihi ina rahadi i humalele tampo Masiri, au bara mani hambela mewali, hai barapi ina mewali. 7 Agaiana i to Isaraeli maroa tauna ba pinatuwo, batenda tuwo i lalu kalene. Bara huba hambaa dike au bai mololohe bona niisa kaIkonami Pue au mampopontani to Isaraeli hai to Masiri.’ 8 Hai ope-ope topobagomu ide ina maihe iriko hai molingkuduhe, rauli: padumoko hai ope-ope tauna au meula irio. Roo nodo, ina mesuwuna.” Hangko indo, padumi Musa mopalehi Pirao lawi rumihi karumpuna.
9 Mongkorami Pue i Musa, Nauli, “Ikamu barakau ina napehadingi Pirao bona tanda-tanda melangaki au Kubabehi i tampo Masiri, tetambai kangkaiana.” 10 Musa hai Haruni mobabehimohe hinangka tanda au melangaki i lindona Pirao. Agaiana Pue mopamatua laluna Pirao, idomi hai pane bara mopaliu to Isaraeli padu hangko i tampo Masiri.