Pehuku kaualu: kakomba
10
1 Mongkorami Pue i Musa, Nauli, “Laoko i Pirao, lawi ia hai topobagonahe Kupamatuami lalunda bona mopaaraNa tanda-tanda au melangaki i olonda. 2 Hai bona peisa wori nupololita i pemuleamu, noumba kamampopowadi-wadiNgku to Masiri hai mampopengaa tanda-tanda melangaki au Kubabehi i olonda bona niisa kaIkonami Pue.3 Lao mpuumohe Musa hai Haruni i Pirao rauliangaa node, Pue, Pue Ala au rapenombai to Ibarani mongkora: hangkia mani kamahaena barako mengkoru Iriko? Paliuhe taunaNgku padu bona menombahe Iriko. 4 Lawi ane bara maniko mopaliu taunaNgku padu, kahalo ina mopaaraNa kakomba i tampomu. 5 Kakomba iti ina motabungihe humalele tampo alana tampo iti barapi raita tauna. Kakomba iti ina moandehe hinangka tuda-tuda au napentara mani uda mowua hai ina mopaope hinangka kau au tuwo i pada. 6 Kakomba iti ina bukehe i sou kadatuamu, i sounda topobagomu hai sounda to Masiri, nodo au bara mani hambela raita tosaemu hai totuamuhe, hungka pesupanda hawe alo ide.” Roo nodo, menggolimi Musa hai mopalehi Pirao.
7 Mololitamohe topobagona Pirao iria, rauli, “Hangkia mani haenda tauna ide mopakaparike? Palikangaamohe padu bona menombahe i Pue, Pue Ala au rapenombai. Bara pae naisa datu tampo Masiri ide marugimi?”
8 Hangko indo, Musa hai Haruni raantihe lao i Pirao, hai mololitami Pirao irihira, “Laomokau, menomba i Pue, Pue Ala au nipenombai. Katouana hema haha au ina lao?”
9 Mehana Musa, “Ope-opengkai, maroa au mangura ba totosae, hai anangkihe tobalilo hai towawine; towau, dimba hai japingki, lawi ina mamposusai mahilengkai Pue.” 10 Agaiana nauli Pirao irihira, “Pue hangangaa mamporangaikau ane kupaliu hahakau padu hai anamihe. Kadake mpuu tunggaiami. 11 Bara nodo! Peisakau padu, agaiana tobalilo pea. Laomokau menomba i Pue, lawi itimi au nitunggai.” Roo nodo, Musa hai Haruni rawuramohe hangko i lindona Pirao.
12 Mongkorami Pue i Musa, Nauli, “Ona taiemu i wongko tampo Masiri bona maihe kakomba mobukehi tampo Masiri hai moandehe hinangka tuda-tuda au mentara hangko i uda mowua.” 13 Roo indo, natindorami Musa laina i wongko tampo Masiri, hai Pue mopaarami himburu au hangko i Mata alo au mewui hangaloa hai hambengia. Kahalona madondo, himburu iti moantihe mai kakomba. 14 Hawemohe kakomba au rumihi kabosanda mobukehi humalele tampo Masiri; bara mani hambela ara kakomba au nodo kabosanda, hai barapi ina hambela mewali nodo.
15 Humalele tampo tetabungimi hai kakomba alana tampo Masiri makaindi raita. Kakomba iti moandehe hinangka tuda-tuda, wuangkau au napentara uda mowua alana kau hai tuda-tuda i pada au ara i humalele tampo Masiri barapi motawe.
16 Mewali hoholigami Pirao mokakiohe Musa hai Haruni hai nauli, “Madosamona i Pue, Pue Ala au nipenombai, nodo wori irikamu. 17 Ido hai, kuperapi, hambela ide pea nuampungi dosangku hai mekakaekau i Pue, Pue Ala au nipenombai bona pehuku au mepapate ide Napakarao hangko iriko.” 18 Roo indo, mesuwumi Musa mopalehi Pirao hai mekakae i Pue. 19 Kaliliuana, Pue mogoli himburu au kebuu mewui hangko i Katampua alo hai mohimbarokahe kakomba toa i Tahi Teberau. Barapi huba hambaa au mentara i tampo Masiri. 20 Agaiana Pue mopamatua laluna Pirao alana bara mopaliu to Isaraeli padu.
Pehuku kahahio: motupa
21 Mongkorami Pue i Musa, Nauli, “Tindora taiemu i langi bona tampo Masiri nabalungkuhi kamakaindi alana kamakaindi iti nodo ina peisami rakingki.” 22 Natindorami Musa taiena i langi, hai hawe mpuumi kamakaindi i humalele tampo Masiri talu alona kamahaena. 23 Bara ara to Masiri au peisa moita rangana hai bara wori ara au peisa padu hangko i paidaanda i lalu talu alona; agaiana i paidaanda to Isaraeli mia-mia mabaa.
24 Roo indo Pirao mokakio Musa hai mololita, nauli, “Lao hahamokau menomba i Pue au nipenombai; agaiana towau, dimba hai japimi hangangaa nipalehi.”
25 Mehana Musa, nauli, “Katouana hangangaa nuweiringkai binata popenomba au rasambale hai rahuwe bona kipopenomba i Pue, Pue Ala au kipenombai. 26 Pinatuwongki hangangaa kiantihe ope-ope, lawi hangko i pinatuwo itihe ina kiala kipopenomba i Pue, Pue Ala au kipenombai. Hai mogalori hambaa bara ina kipentara lawi bara mani kiisa, umba au ina kipopenomba i Pue ane bara maningkai hawe indo.”
27 Pue mopamatua laluna Pirao alana bara mopaliu to Isaraeli padu. 28 Roo nodo, Pirao mololita i Musa, nauli, “Kapadumide hangko iriko; nulambi rai ane kuitako lawi ane hawe kuita mani lindomu, batemu ina mateko.”
29 Nauli Musa, “Hintoto hai au nuhowara iti! Barapi ina kuita lindomu.”