Pehuku kalima: pinatuwonda to Masiri mate
9
1 Mongkorami Pue i Musa, nauli, “Laoko i Pirao hai nuuliangaa node, Pue, Pue Ala au rapenombai to Ibarani mongkora: palikangaahe taunaNgku padu bona menombahe Iriko. 2 Ane bara manihe nupaliu padu hai nutaha manihe, 3 pinatuwomi au i pada nodo dara, kalide, onta, japi, towau hai dimba ina kanahe pehukuna Pue, iami haki tumpi au rumihi. 4 Agaiana pinatuwonda to Isaraeli hai to Masiri ina napopontanihe Pue, alana pinatuwonda to Isaraeli bara huba hambaa au mate.” 5 Kaliliuana napakanotomi Pue tempona, Nauli, “Kahalomi Kupopewali apa au Kupakanotomi i tampo ide.”6 I kahalona Napopewali mpuumi Pue apa au Napakanotomi; hinangka pinatuwonda to Masiri iti mate, agaiana pinatuwonda to Isaraeli bara huba hambaa au mate. 7 Mewali, natudumohe Pirao tauna lao mampeita apa au mewali, hai bara mpuu ara pinatuwonda to Isaraeli au mate. Agaiana Pirao mia-mia pea matua laluna hai bara mopaliu to Isaraeli padu.
Pehuku kaini: bihu
8 Mongkorami Pue i Musa hai Haruni, Nauli, “Alamide hangkaku awu hangko i rapu, hai hangangaa nahawuka Musa i laerawa naita-ita mata Pirao. 9 Mewali awu iti ina mangulele i tampo Masiri hai kanahe to Masiri hai pinatuwonda, liliu mewali bihu au monana hai motananta.” 10 Mewali raala mpuumi Musa hai Haruni awu hangko i rapu hai meangkahe i lindona Pirao. Roo nodo, awu iti nahawuka Musa i laerawa, liliu mewali bihu au monana hai motananta i manusia hai i pinatuwo. 11 Topangisanda to Masiri barapi rasauru molindo Musa lawi napentakai worihe haki iti hihimbela hai ope-ope to Masiri. 12 Agaiana Pue mopamatua laluna Pirao, alana Pirao bara mampehadingi Musa hai Haruni, nodo au nauli amimi Pue i Musa.
Pehuku kapitu: uda mowua
13 Mongkorami Pue i Musa, Nauli, “mearoko madondo-dondo hai laoko i Pirao nuuliangaa node, Pue, Pue Ala au rapenombai to Ibarani mongkora: palikangaahe taunaNgku padu bona menombahe Iriko. 14 Lawi hambela ide ane barahe nupaliu padu, ina mopatoaNa pehukuNgku bara pea i topobagomu hai i taunamu, agaiana hai irio wori. Tunggaiana bona nuisa, bara ara au nodo Iko i humalele dunia. 15 Ane rapana mauNa mohukuko hai taunamu hai haki tangga, manoto barapokau ara i wongko dunia. 16 Agaiana itimi pongkana Kupalikangaakau tuwo bona Kupatongawa irio kamakuasaNgku, hai hangaNgku rapatolele i humalele dunia. 17 Kehapiri nodo, mampemahile maniko. Nuhombokihe taunaNgku hai barahe nupaliu padu. 18 Bona nuisa, kahalo nodo jaa ide, ina mopatoaNa uda mowua au kebuu, au bara mani hambela mewali i Masiri hungka i karaarona hawe ide-ide. 19 Idomi hai ope-ope pinatuwomu hai apa pea anu-anumu au ara i pada nutuduahe taunamu raanti i paidaa au baonga. Ope-ope tauna hai hinangka pinatuwo au ara i pada, au barahe mesule i sounda ba i peongaanda ina matehe narumpa uda mowua.” 20 Hema pea topobagona Pirao au langa i ngkorana Pue, moantihe hawinda hai pinatuwonda melangka lao i sou. 21 Agaiana hema au bara moholoi ngkorana Pue, mopalehi hawinda hai pinatuwonda i pada.
22 Mongkorami Pue i Musa, Nauli, “Tindora taiemu i langi bona toa uda mowua i humalele tampo Masiri, morumpa ope-ope tauna, binata hai tuda-tuda i pada i tampo Masiri.” 23 Roo indo, natindorami Musa laina i langi, mewali Pue mopaara gumpata hai uda mowua hai kila mehangke-hangke, hai Pue mopatoa uda mowua i tampo Masiri. 24 Hai toami uda mowua au kebuu, hihimbela hai kila mombehangke-hangke, nodo au bara mani hambela mewali i humalele tamponda to Masiri, hungka i karaarona kadatua Masiri. 25 Uda mowua iti mopakarugi hinangka au ara i pada i humalele tampo Masiri, mepongka i manusia hawe i pinatuwo; nodo wori hinangka tuda-tuda au ara i pada, opehe marugi narumpa uda mowua iti hai ope-ope kau i pada mapoka haha. 26 I tampo Gose pea, paidaanda to Isaraeli au bara nakatoangi uda mowua.
27 Mewali Pirao mokakiohe Musa hai Haruni, hai nauliangaahe, “Hambela ide madosamona, Pue iti au tou; ikomi hai taunangku au masala. 28 Mekakaeko i Pue; handami gumpata hai uda mowua ide. Ina kupaliumokau padu, datipokau mahae inde.”
29 Hai mololitami Musa i Pirao, nauli, “Ane padumona hangko i wanua ide, ina motindorana taiengku hai mekakaena i Pue. Mewali gumpata ina mengkaroo hai uda mowua ina ombo bona nuisa, tampo hai langi ide Pue ampuna. 30 Agaiana oio hai topobagomuhe, kuisa bara manikau langa i Pue, Pue Ala.”
31 Tuda-tuda rami hai jelai marugimohe, lawi rami tangana mowombo hai jelai mowuami. 32 Agaiana pare hai sekoi bara marugi lawi bara mani howu.
33 Mewali padu mpuumi Musa hangko i wanua iti mopalehi Pirao, natindorami taiena hai mekakae i Pue. Tempo iti peami, gumpata mengkaroomi hai uda mowua liliu ombo hai barapi toa uda.