Pehuku au kadua: seo
8
1 Mongkorami Pue i Musa, Nauli, “Laoko i Pirao hai nuuliangaa node, Pue, Pue Ala au rapenombai to Ibarani mongkora: palikangaahe taunaNgku padu bona menombahe Iriko. 2 Ane barahe nupaliu padu, humalele tampo ide ina Kubukehi hai seo mewali pehuku. 3 Owai Nil ina buke seo, alana mesuwuhe mai hangko i owai Nil hai mesuahe i sou kadatuamu hai i paturuamu hawe-hawe i sounda topobagomu hai taunamu, nodo wori i poguntaa hai i potunua rotimu. 4 Seo iti ina mendai-ndaihe i watamu, i taunamu hai i ope-ope topobagomu.”5 Mongkorami Pue i Musa, Nauli, “Nuuliangaa Haruni: ulu taiemu hai laimu i wongko owai, i wongko lao hai i wongko wuhu bona mesupahe mai seo inditi alanda mobukehi tampo Masiri.” 6 Mewali naulumi Haruni laina iti i wongko ope-ope owai i tampo Masiri, liliu mesupamohe seo hai mobukehihe tampo Masiri. 7 Agaiana ope-ope topangisa mobabehi worihe nodo moula kapangisanda, alanda seo iti mesupahe mobukehi tampo Masiri.
8 Roo indo, Pirao mokakiohe Musa hai Haruni hai nauliangaahe, “Mekakaemokau i Pue bona ope-ope seo ide Napatunahe hangko iriko hai i taunangkuhe. Ane nibabehi nodo, hangko kupaliuraihe to Isaraeli padu bona laohe mohuhu popenombanda i Pue.”
9 Nauli Musa i Pirao, “Nuuliangaana impirako kupekakaea, topobagomu hai taunamuhe bona ope-ope seo ide Napatunahe hangko irio hai i ope-ope soumi, mentara pearai i owai Nil.”
10 Mehana datu, nauli, “Kahalo.” Nahanai Musa, “Mewalimi nodo pangulimu iti bona naisa datu, bara ara au himbela hai Pue, Pue Ala au kipenombai. 11 Ope-ope seo iti ina Napakaraohe hangko irio, hangko i soumu, sounda topobagomu hai sounda taunamu; hai mentara pearaihe i owai Nil.”
12 Hangko indo, Musa hai Haruni mopalehimohe Pirao, hai mekakaemi Musa i Pue bona Napatunahe seo au Napoparumpaa datu. 13 Pue mopabukei pekakaena Musa, pane matemohe seo au mobukehi sounda to Masiri, tabangaanda hai bondenda. 14 To Masiri morampuhe seo au matemohe iti hahalunggunga alana humalele tampo Masiri moengaa bangka. 15 Agaiana kanaitana Pirao seo iti opemohe mate, mia-mia pea matua laluna, hai bara mampeulai lolitanda Musa hai Haruni, nodo au nauliangaa amimohe Pue.
Pehuku au katalu: hani
16 Mongkorami Pue i Musa, Nauli, “Nuuliangaa Haruni: ulu laimu hai nuhepeka i awu tampo bona awu tampo iti mewali hani i humalele tampo Masiri.” 17 Rababehi mpuumi nodo; Haruni moulu taiena hai laina nawombeka i tampo, hai ope-ope awu au i tampo Masiri mewali hani hai mentakahe i tauna hai i binata. 18 Ope-ope topangisanda to Masiri mopari-pari wori mopaara hani moula kapangisanda, agaiana bara rabuku. Nodomi ope-ope hani iti mentaka i tauna hai i binata. 19 Mewali mololitamohe ope-ope topangisa iti i Pirao, “Idemi au Nababehi Pue Ala.” Agaiana Pirao mia-mia pea matua laluna hai bara mampeulai lolitanda Musa hai Haruni, nodo au nauliangaa amimohe Pue.
Pehuku Kaiba: Dale
20 Mongkorami Pue i Musa, Nauli, “Mearoko madondo-dondo hai laoko mampegia Pirao bona nupombelambia tempona lao i owai hai nupahawea ngkorana Pue node, ‘Palikangaahe taunaNgku padu bona menombahe Iriko. 21 Lawi ane barako mopaliu taunaNgku iti padu ina mopaaraNa dale i topobagomuhe, taunamu hai soumu hai sounda to Masiri nodo wori i humalele tampo, iumba pea paidaanda ope-ope napentakai dale. 22 Agaiana i alo iti, tampo Gose au rapaidaihe taunaNgku ina kupantanina alana bara ara dale indo bona niisa: Iko Pue, araNa i tampo ide. 23 Lawi ina mampopontaniNa taunaNgKu hai taunamu. Tanda au melangaki ide mewali kahalo.’ ”
24 Nababehimi Pue nodo, mewali hawe mpuumohe dale au bosa i lalu kadatuana Pirao, i lalu sounda topobagonda hai i humalele tampo Masiri alana to Masiri iti mantodihahe kapari anti kangkaiana dale.
25 Hangko indo, Pirao mokakiohe Musa hai Haruni hai nauliangaahe, “Laomokau mohuhu popenombami i Pue Ala au nipenombai i tampo ide.” 26 Agaiana nauli Musa, “Bara peisa kibabehi nodo, lawi popenomba au kihuhu i Pue, Pue Ala au kipenombai, rapokarika to Masiri. Ane rapana mohuhungkai popenombaki iti i lindonda to Masiri, barangkai pae rawatui? 27 Ikami hangangaa laongkai i pada wungi au kakaraona talu alona polumaonta bona mohuhungkai popenombaki i Pue, Pue Ala au kipenombai, nodo au Naparentaiamongkai.”
28 Mehana Pirao, “Bara moapa, ina kupaliukau lao i pada wungi mohuhu popenombami i Pue, Pue Ala au nipenombai. Agaiana inee gagakau karao. Nipekakaea worina.”
29 Nauli Musa, “Ide-ide ina mopalehina datu hai laona mekakae i Pue bona kahalo dale iti padumohe hangko i Pirao, i topobagona hai i taunana. Agaiana inee napodongkoa pea mbulingkai Pirao, alana to Isaraeli bara mbulihe napaliu padu lao mohuhu popenombanda i Pue.”
30 Roo nodo, padumi Musa mopalehi datu, lao mekakae i Pue. 31 Hai Napabukei mpuumi Pue pekakaena Musa: Napakaraomohe dale iti hangko i datu, i topobagona hai i taunanahe. Barapi ara au mentara mogalori hambaa. 32 Agaiana hambela ide, Pirao mia-mia pea mbuli matua laluna hai bara mopaliu to Isaraeli padu.