7
1 Mongkorami Pue i Musa, Nauli, “Oio ina Kupopewaliko nodo Pue Ala i lindona Pirao, hai halalumu Haruni ina mololita iria nodo nabimu. 2 Nupahawe i Haruni hinangkana au Kuuliangaako. Nutudu Haruni mololita i Pirao bona mopaliuhe to Isaraeli padu hangko i tampo Masiri. 3 Agaiana Pirao ina Kupamatua laluna hai ina Kubabehi ngkaia tanda-tanda au meringkui i tampo Masiri. 4 Ane barakau napehadingi Pirao, ina Kupatongawa kamakuasaNgku i to Masiri hai pehuku au mantimi, hai ina moniniNa taunaNgku to Isaraeli mesuwu hangko i tampo Masiri. 5 Mewali ina raisa to Masiri kaIkonami Pue, ane Kuhukuhe hai moniniNa to Isaraeli hangko i tampo Masiri.” 6 Nodomi rababehi Musa hai Haruni hintoto hai hawana Pue irihira. 7 I temponda lao molindo Pirao, tinuwuna Musa ualu pulona parena, hai Haruni ualu pulona hai talu parena.8 Pue mongkora i Musa hai Haruni, Nauli, 9 “Ane nauli Pirao, nitudungiana hampaka tanda au mewulungai, mewali hangangaa nuuliangaa Haruni: ala laimu hai nutende i lindona Pirao. Lai iti ina mewali ile.” 10 Lao mpuumohe Musa hai Haruni molindo Pirao, hai rababehimi nodo au nahawaahe Pue: Haruni motende laina i lindona Pirao hai topobagonahe; lai iti mewali ile. 11 Hangko indo, Pirao mokakiohe topangisa hai topobalimata. Hai kapangisanda iti rababehi wori nodo. 12 Hadua-haduahe motende lainda, hai ope-ope lainda iti mewali ile: agaiana ope-ope lainda naame laina Haruni. 13 Agaiana nauri nodo Pirao mia-mia matua laluna, hai bara mampeulai lolitanda Musa hai Haruni, nodo au nauliangaa amimohe Pue.
Pehuku Kaisa: owai mewali wahe
14 Mongkorami Pue i Musa, Nauli, “Pirao matua laluna, ia bara mopaliu to Isaraeli padu. 15 Laoko i Pirao madondo-dondo, i tempona lao i owai Nil. Nupegia i wiwi owai Nil hai mokingkiko lai au peisa mobali mewali ile. 16 Nuuliangaa node, ‘Pue, Pue Ala au rapenombai to Ibarani, motuduna mai irio mopahawe lolitaNa node: nupaliuhe taunaNgku padu bona laohe menomba Iriko i pada wungi. Kehapiri nodo, hawe ide-ide bara nupehadingi. 17 Mewali node ngkorana Pue: hangko i apa au ina Kubabehi ina nuisa, Ikomi Pue. Peita! Hai lai au kukingki ide, ina mowombena owai Nil, hai owai iti ina mobali mewali wahe, 18 hai ope-ope ikane i lalu owai Nil ina mate, alana owai Nil bangka hai to Masiri barahe peisa moenu owai Nil ide.’ ”
19 Pue mongkora i Musa, Nauli, “Nuuliangaa Haruni: ala laimu hai nuona taiemu i wongko ope-ope owai au ara i tampo Masiri bona mewali haha wahe. Hai humalele tampo Masiri ina nakaarai wahe tepesua ope-ope pambolianda owai au rababehi hangko i kau hai watu.”
20 Nodomi parentana Pue au rababehi Musa hai Haruni; raita-ita mata datu hai topobagonahe, Haruni moangka laina hai nahepeka i wongko owai Nil, liliu owaina mewali wahe. 21 Ope-ope ikane i owai Nil iti matehe, alana owaina mewali bangka hai owai Nil iti barapi peisa raenu to Masiri; hai i humalele tampo Masiri ara wahe. 22 Agaiana ope-ope to Masiri au pangisa mobabehi worihe nodo, pane matua laluna datu hai bara mampehadingi apa au rauli Musa hai Haruni, nodo au napahawe amimi Pue irihira. 23 Mesuleri Pirao i sou kadatuana, hai apa au mewali iti bara nahahaile. 24 Agaiana ope-ope to Masiri mokaehe kalolu i wiwi owai Nil rapohaokii owai raenu, lawi owai Nil barapi peisa raenu.
25 Nodemi Pue mogane owai Nil pitu alona kamahaena.