Pue Ala motudu Musa
6
1 Kaliliuana mongkorami Pue Ala i Musa, Nauli, “Ikomi Pue. 2 Kupatongawami i Burahima, Isaki hai Yako kaIkonami Pue Ala Au Makuasaa, agaiana bara manihe Kupatongawaa kaPuenab hangaNgku. 3 Bara peahe Kupodandia ina Kuwei tampo Kanaa au rapaidaimi hangkoia nodohe topolilo, 4 agaiana Kuhadimi peraroanda to Isaraeli au rapohawihe to Masiri, hai Kukatuinaomi dandiKu. 5 Mewali nuuliangaahe to Isaraeli, ‘Ikomi Pue; ina Kukabahakau hangko i karapohawimi to Masiri. Ina Kuhoremakau i kamakuasaNgku, hai pehuku au mantimi ina Kupatoa i to Masiri.6 Ikamu ina Kupopewalikau taunaNgku hai Iko mewali Pue Ala au nipenombai bona niisa kaIkonami Pue, Pue Ala au mohoremakau hangko i pepohawinda to Masiri. 7 Ina Kuantikau lao i tampo au Kudandimi hai sumpa ina Kuweihe Burahima, Isaki hai Yako. Tampo iti ina Kuweikau mewali tampomi; Ikomi Pue.’ ” 8 Mewali ope-ope ngkorana Pue napahawemi Musa i to Isaraeli, agaiana bara rapailalu, lawi barapi ara peharunganda anti karumihina gagami pepohawi au rahalea.
9 Roo nodo, mongkora mbuli Pue i Musa, Nauli, 10 “Laomoko i Pirao, datunda to Masiri, nuuliangaa hangangaa mopaliuhe to Isaraeli padu hangko i tampo Masiri.”
11 Agaiana nauli Musa i Pue, “To Isaraeli haduduanda barana rapehadingi; noumbami kanapehadingingku Pirao? Iko barana mapande mololita!”
12 Nodomi ngkorana Pue i Musa hai Haruni, hai Natuduhe lao i to Isaraeli hai i Pirao, hai moanti hawa bona to Isaraeli raninihe mesuwu hangko i tampo Masiri.
Tuntukana ulububuna Musa hai Haruni
13 Idemohe ulububunda hantina-hantina: Rube, anana Yako au towutu, moana ibahe tobalilo: Heno, Palu, Hesron hai Karmi; itimohe pemuleana Rube hantina-hantina. 14 Ananahe Simeo inihe tobalilo: Yemuel, Yamin, Ohad, Yakin, Sohar hai au hanginana iami Saulu, anana hangko i hadua towawine to Kanaa; itimohe pemuleana Simeo hantina-hantina. 15 Idemi hanganda anana Lewi moula pombeusuna pesupanda: Gerson, Kehat hai Merari. Tinuwuna Lewi, hangatu talu pulona hai pitu parena. 16 Ananahe Gerson: Libni hai Simei, moula tinanda. 17 Ananahe Kehat: Amram, Yisar, Hebrom hai Usiel. Tinuwuna Kehat, hangatu talu pulona hai talu parena. 18 Ananahe Merari: Mahli hai Musi. Itimohe pemuleana Lewi hantina-hantina.
19 Hai Amram mampotambia Yokebe, halaluna umana. Ananda iami Musa hai Haruni. Tinuwuna Amram hangatu talu pulona hai pitu parena. 20 Ananahe Yisar: Korah, Nefeg, hai Sikri. 21 Ananahe Usiel: Misael, Elsafan hai Sitri.
22 Hai Haruni mampotambia Eliseba, anana Aminadab. Eliseba iti, halaluna Nahason, au mampopesupamohe Nadab, Abihu, Eleasar hai Itamar. 23 Ananahe Korah: Asir, Elkana hai Abisaf; itimohe tinana Korah. 24 Eleasar, anana Haruni, motambi hai hadua towawine anana Putiel. Ananda iami Pinehas. Itimohe umanda to Lewi hantina-hantina.
25 Haruni hai Musa, ihirami au Napohawaa Pue, Nauli, “Mampopesuwu to Isaraeli hangko i tampo Masiri.” 26 Ihirami au mololita i Pirao, datu Masiri, bona moninihe to Isaraeli mesuwu hangko i tampo Masiri.
Pue motudu Musa hai Haruni lao i Pirao