Musa hai Haruni laohe i Pirao
5
1 Roo indo, laomohe Musa hai Haruni i Pirao, hai mololitahe i datu, “Node ngkorana Pue, Pue Ala au rapenombai to Isaraeli: Palikangaamohe taunaNgku padu bona peisahe menomba Iriko i pada wungi.”2 Agaiana mekune Pirao, nauli, “Pue iti hema, hai hangangaa kupehadingi parentaNa bona mopaliuna to Isaraeli padu? Pue iti bara kuisa, hai to Isaraeli bara worihe kupaliu padu.”
3 Rauli mbuli Musa hai Haruni, “Napombelambiamongkai Pue Ala au rapenombai to Ibarani. Nupaliungkai padu lao i pada wungi au kakaraona ralumaohi talu alona bona mohuhungkai popenombakia i Pue, Pue Ala au kipenombai, lawi ane barangkai menomba Iria narumpangkai haki tangga ba pombeala.”
4 Agaiana nauli datu Masiri irihira, “Musa hai Haruni, moapari hai mosasalemporikau tauna idehe alanda barapohe mobago. Laomodekau mobago.” 5 Mololita mbuli Pirao, nauli, “Nipeita, taunami iti bosa gagamohe i tampo ide, hai ina nipopengkaroohe hangko i pobagonda!”
6 I alo iti peawomi, ope-ope topekampai au hangko i to Masiri hai ope-ope mandoro hangko i to Isaraeli, molambihe parenta hangko i datu, 7 “To Isaraeli iti Ineemohe niwei deami, ane mobabehihe watu tela. Palikangaa lao rahaoki haduduanda. 8 Agaiana ide-ide, hangangaa nituduhe mobabehi watu tela au himbela imbana hai au rababehimi alo-alo au liu, itimi au nipahaleangiahe lawi ihira iti lohehe. Idomi hai meraroa liliuhe, rauli: nipaliumongkai padu hangko inde bona laongkai mohuhu popenombaki i Pue Ala au kipenombai. 9 Tauna idehe rapamantimi ntepuu bagonda bona iti au motakahe, dati ara temponda mampehadingi lolita dongko.”
10 Mewali, laomohe ope-ope topekampai au hangko i to Masiri hai ope-ope mandoro au hangko i to Isaraeli, hai mololitahe i to Isaraeli, rauli, “Node nauli Pirao: ikamu barapokau kiwei deami. 11 Ba iumba nilambi, nihaokimi haduduami, hai imbana watu tela au nibabehi bara peisa makura.” 12 Roo nodo, mahawumohe to Isaraeli i humalele tampo Masiri laohe mopahiruru patoa deami. 13 Hai ope-ope topekampai mopari-parihe, rauli, “Watu tela au nibabehi i lalu hangalo hangangaa himbela imbana nodo i tempona mani rapasilolongaakau deami.” 14 Hangko indo, taunanahe Pirao au mekampai mopahaihe to Isaraeli au rapomandoro hai mekunehe, “Moapari alo ide hangka to Isaraelimi mobabehihe watu tela bara handa imbana nodo au rababehimi alo-alo au liu?”
15 Roo nodo, ope-ope to Isaraeli au rapomandoro laohe meraroa i Pirao, rauli, “Moapari hai datu mobabehi nodo irikami hawimungkai ide? 16 Ikami barapongkai rawei deami, agaiana nauri nodo rapari-pari peangkai mobabehi watu tela. Hai i tangangki mobago rapahaingkai, mole taunanari datungki au masala.”
17 Agaiana mehana datu, “Katolohemi gaga, barakau mau mobago! Idomi pongkana hai metompakau iriko bona laokau mohuhu popenombami i Pue au nipenombai. 18 Mewali ide-ide laomokau mobago, ikamu barapokau rawei deami, agaiana watu tela au nibabehi hangangaa inee makura imbana.” 19 Hangko raisari mandoro to Isaraeli iti, ihira arahe i lalu kapari, lawi rauliangaahe, “Barakau peisa mopamakura imbana watu tela i alo-alona.”
20 I pesuwunda mai hangko i sou kadatuana Pirao, mampohidupaamohe Musa hai Haruni au mampegiamohe. 21 Mewali mololitamohe mandoro iti i Musa hai Haruni, rauli, “Kiperapi Pue mampeita babehiami, hai Nahukukau, lawi nipakadakemi hangangki i Pirao hai i mandoronahe. Babehiami iti himbela pea moweikau piho irihira bona rapapatengkai.”
22 Lao mbulimi Musa mampohidupaa Pue, nauli, “Pue, moapari hai Nupamapari gagarihe tauna ide? Moapa wori hai ikori au Nutudu? 23 Lawi mepongka i kalaongku mopahawe NgkoraMu i Pirao, rumihiri pampopeahi-ahina to Isaraeli. Agaiana barahe Nuhaile hai barahe Nukabaha.” 24 Agaiana Pue mongkora i Musa, Nauli, “Ide-ide ina nuita apa au ina Kubabehi i Pirao; ia ina Kupari-pari bona mopaliuhe taunaNgku padu. Ami Kupari-pari mpuu mowurahe to Isaraeli hangko i tampo ide.”