Pue Ala mowei Musa kuasa mobabehi tanda au mewulii
4
1 Hangko indo, mehana Musa i Pue, nauli, “Noumba ane barana rapoinalai to Isaraeli hai barahe mampehadingi lolitangku, agaiana mololitarihe rauli, ‘Pue barato mopatongawa wataNa irio’?”2 Mekune Pue i Musa, Nauli, “Apa au ara i taiemu?” Mehana Musa, nauli, “Lai.”
3 Nauli Pue, “Nukabaha lai iti i tampo.” Kanakabahana lai iti i tampo, liliu mewali ile, ido hai melangkami Musa. 4 Agaiana Pue mongkora i Musa, nauli, “Tandoa taiemu hai nukingki ikuna.” Natandoami Musa taiena mopakala ile iti hai mewali hulemi lai i taiena. 5 Mongkora mbuli Pue i Musa, nauli, “Nubabehi nodo bona rapoinalai to Isaraeli, lawi Ikomi Pue au rapenombai Burahima, Isaki hai Yako, mopatongawamoNa wataNgku irio.”
6 Mongkora mbuli Pue i Musa, “Pusa taiemu i lalu badumu.” Napopesuami Musa taiena i lalu baduna. Kanadiina, bulami taiena nodo gawu, lawi kana haki tangga. 7 Roo indo mongkora mbuli Pue, “Popesua mbuli taiemu i badumu.” Napopesua mbuli Musa taiena i baduna, hai kanadiina mbuli i raoa, taiena iti maohami, himbela hulemi hai watana. 8 Mongkora mbuli Pue i Musa, Nauli, “Ane rapana barako rapoinalai, hai barahe mohaile tanda kaisa au mewulii, agaiana ina mampoinalaihe tanda au kadua. 9 Hai ane barahe mampoinalai tanda au rompaka ide hai bara rapehadingi lolitamu, hangangaa laoko motambu owai hangko i owai Nil hai hangangaa nubumbuha i tampo au bangi, hai owai iti ina mewali wahe.”
10 Hangko indo, Musa mololita i Pue, nauli, “O Pue, barana mapande mololita, maroa hangkoia, maroa ide-ide i pepongkaMu mongkora iriko. Lawi bara gagana matopa mololita.”
11 Agaiana Pue mongkora i Musa, “Hema au mobabehi dila manusia? Hema au mampopewali tauna wowo ba bongo? Hema au mampopewali tauna meita ba bilo? Bara pae Iko, Pue? 12 Ide-ide laomide! Ina Kutulungiko mololita hai Kupaturoako apa au hangangaa ina nuhowara.”
13 Agaiana mehana Musa, “O Pue Ala, kuperapi Nutudumi hema au hintoto Nutudu.”
14 Mewali, rumpumi Pue i Musa hai mongkora, “Inditi bara pae ara Haruni to Lewi, wutumu? Kuisa ia iti mapande mololita. Ide-ide tanganami molumao mai mampohidupaako hai ane naitamoko, hangangaa matanami laluna. 15 Mewali mololitako iria hai nuuliangaa apa au hangangaa napololita. Iko ina motulungikau hai Kupaturoakau apa au ina nibabehi. 16 Ia hangangaa mewali sarungkoromu mopaliliu lolitamu i to Isaraeli, hai oio ina mewaliko nodo Pue Ala iria. 17 Hai nuantimi lai au nukingki iti bona nupopobundu mobabehi tanda-tanda au mewulii.”
Musa mesule i tampo Masiri
18 Roo nodo, mesulemi Musa i Yitro pengantina hai mololita iria, nauli, “Nupaliuna hampai lao i tampo Masiri mampeitahe halalungku ba tuwo manihe.” Mololitami Yitro i Musa, nauli, “Laomide, maroa-roako i polumaoamu.”
19 Hai Pue roo worimi mongkora i Musa i tampo Midea, “Mesulemoko i tampo Masiri, lawi matemohe ope-ope tauna au mampeinao mopapateko.” 20 Hangko indo, Musa mowawaha towawinena hai ananahe, napopesawihe i kalide hai mesulemi i tampo Masiri, hai laina Pue Ala iti naanti.
21 Pue mongkora i Musa, Nauli, “I pesulemu i tampo Masiri, nukatuinao bona ope-ope tanda au mewulii au Kuweimoko i lalu taiemu, nubabehi haha i lindona Pirao. Agaiana Iko ina mopamatua laluna, alana bara mopaliu to Isaraeli padu. 22 Oio hangangaa mololitako i Pirao: Node ngkorana Pue: To Isaraeli anaNgkuhe, anaNgku au towutu: 23 idomi hai mongkoraNa irio: Palikangaamohe anaNgku iti padu bona menombahe Iriko, agaiana ane barahe nupaliu padu, ina Kupapate anamu, anamu tobalilo au towutu.”
24 Agaiana i tanga polumaonda, i pohambengianda, Pue mampombelambia Musa, tunggaiaNa ina mopapate Musa. 25 Sipora, towawinena Musa, moala haogu watu au mataru napopotile anana, hai potileana iti napopaihoa bitina Musa. Nauli Sipora, “Hai potilea ide mopakanoto kaoionami tobalilongku.” 26 Au nababehi Sipora iti, anti pokatuinaona ada mpetile. Idomi hai Pue Ala barapi mewali mopapate Musa.
27 Mongkorami Pue i Haruni, “Laomoko i pada wungi mampohidupaa Musa.” Lao mpuumi Haruni mampohidupaa Musa i bulu au malelaha hai naangki. 28 Ope-ope au napahawe Pue napololitami Musa i Haruni i tempona ratudu mesule i tampo Masiri, nodo wori hinangka tanda-tanda au mewulii au hangangaa nababehi. 29 Hangko indo, laomohe Musa hai Haruni i tampo Masiri hai mopateruhuhe ope-ope tadulakonda to Isaraeli. 30 Ope-ope au napahawe Pue i Musa, iti wori au napahawe Haruni, hai nababehimi Musa tanda-tanda au mewulii i lindonda tadulakonda to Isaraeli. 31 Mewali rapoinalaimi, hai i karahadina Pue mohailemi to Isaraeli hai Naitami hinangka pantodihanda, molingkudumohe hai motumpahe menomba i Pue.