3
1 I tempo iti, Musa mamporewuhe dimba hai towaunahe Yitro pengantina, hadua tadulako mpenomba i tampo Midea. I tempona Musa moeri dimba hai towau i hambali pada wungi, hawemi i bulu Sinai, bulu au malelaha. 2 Inditi malaekana Pue mopatongawa watana i Musa i lalu rore api au mesupa hangko i tanga-tanga lopo. Naita Musa, lopo iti rore agaiana bara naande api. 3 Mololitami Musa, nauli, “Mewulii! Lopo iti bara naande api. Agina lao kupeita hungku-hungku.”4 I kanaitana Pue Musa mohungkuki paidaa iti, mongkorami Pue hangko i tanga-tanga lopo iti, Nauli, “Musa, Musa!”
Mehana Musa, nauli, “Idetona.”
5 Hangko indo, mongkorami Pue Ala, nauli, “Ineeko mai hungku-hungku. Wosui kandupamu lawi tampo au nupeangkai iti, iami tampo au malelaha. 6 Ikomi Pue Ala au rapenombai totuamuhe Burahima, Isaki hai Yako.” Ido hai Musa motabungi lindona, lawi bara bai mototoki Pue Ala.
7 Hangko indo, mongkorami Pue, Nauli, “Kuitami pantodihanda taunaNgku i tampo Masiri, hai kuhadimi perapinda rakabaha hangko i tauna au mampohawihe. Kuisami noumba pantodihanda. 8 Idomi hai mendauluNa mokabahahe hangko i taienda to Masiri hai Kuninihe mesuwu hangko i tampo iti monontohi tampo au maemba hai marudu, paidaandahe to Kanaa, to Heti, to Amori, to Feris, to Hewi hai to Yebusi. 9 Ide-ide, peraraoanda to Isaraeli Kuhadimi hai Kuita womi noumba karapopeahi-ahinda to Masiri. 10 Mewali ide-ide Kutuduko lao i Pirao bona moniniko taunaNgku, to Isaraeli, mesuwu hangko i tampo Masiri.”
11 Agaiana Musa mololita i Pue Ala, Nauli, “Hemana pae dide hai baina lao i Pirao hai moninina to Isaraeli mesuwu hangko i tampo Masiri?”
12 Mongkora Pue Ala, Nauli, “Iko au ina motulungiko. Hai ane nuninimohe mesuwu hangko i tampo Masiri, ikamu ina menombakau Iriko i bulu ide. Itimi tandana Iko au motuduko.”
13 Mehana Musa i Pue Ala, nauli, “Agaiana ane kupombelambiamohe hai mololitana irihira: Pue Ala au rapenombai toiorumi au motuduna mai irikamu, hangangaa mekunehe rauli hema hangana. Mewali noumbami kakuhanainda?”
14 Pue Ala mongkora i Musa, Nauli, “IKO iami IKO. Idemi au hangangaa nupopohanaihe to Isaraeli: Ia au rauli IKO ARA, Iami au motuduna mai irikamu.” 15 Kaliliuana, mongkora mbuli Pue Ala i Musa, Nauli, “Nupahawea worihe to Isaraeli node: Ikomi Pue, Pue Ala au rapenombai toiorumi Burahima, Isaki hai Yako, Ikomi au motuduko lao irihira. Ikomi Pue hai itimi hangangKu hawe i hae-haena. Itimi au rapopokakioNa hawe i pemuleanda.” 16 Laomoko, nuguluhe totosaenda to Isaraeli, hai nuuliangaahe node: Pue, Pue Ala au rapenombai totuami Burahima, Isaki hai Yako mopatongawami watana iriko hai mongkora, node: Kuhailemokau hai Kuitami noumba karapopeahi-ahimi i tampo Masiri. 17 Roomi Kubotusi: Ina Kuninikau padu hangko i kapari i tampo Masiri lao i tamponda to Kanaa, to Het, to Amori, to Feris, to Hewi hai to Yebusi i hambua tampo au maemba hai marudu.
18 Hai ane mohadihe lolitamu, oio hai totosaendahe to Isaraeli hangangaa laokau i datu Masiri hai mololitakau iria, niuli: Pue, Pue Ala au rapenombai to Ibarani, mopatongawami wataNa irikami. Mewali ide-ide kiperapi bona Nupaliungkai lao i pada wungi au kakaraona talu alona talumaohi bona mohuhungkai popenomba i Pue, Pue Ala au kipenombai. 19 Agaiana Kuisami barakau ina napaliu datu Masiri padu, ba tauli ane napari-pari hai kuasa au maroho. 20 Agaiana Iko ina mopatongawaNa kamakuasangKu, hai mohukuNa Masiri, hai hinangka kapari rumihi ina Kupatoa irihira. Roo nodo, hangko napaliurikau padu.
21 Hai Iko ina mopaarana ahi lalunda to Masiri irikamu bona ane meangkamokau bara ina soa taiemi. 22 Ido hai hadua-hadua towawine to Ibarani hangangaa merapihe bulawa, salaka hai hampinda hangko i towawine to Masiri, maroa hintonggimi ba au hasou-soumi bona nipopohampiihe anami tobalilo hai towawine. Nodomi rarana ikamu morampakihe to Masiri.