Karapoanakana Musa
2
1 I tempo iti, hadua tobalilo pemuleana Lewi motambi hai hadua towawine pemuleana wori Lewi. 2 Mewali mantimimi towawine iti hai moanami tobalilo. I kanaitana anangkoi iti makara, nawunimi talu wulana. 3 Agaiana bara nabuku inana mowuni anangkoi iti mahae-hae, ido hai inana moala haogu rota au rababehi hangko i nahe hai nataru dati peisa napesuangi owai. Anangkoi iti napopesua i lalu rota hai lao nawoli i tanga-tanga ngkolo i wiwi owai Nil. 4 Hai wutuna anangkoi iti au towawine meangka kakarao, mampepeita apa au ina mewali i adina iti.5 Bara mahae hangko indo, maimi anana Pirao au towawine mendoi i owai Nil hai topekadipurana molulumaohe i wiwi owai Nil. Anana Pirao au towawine iti unga pea moita rota i tanga-tanga ngkolo, ido hai motudu hadua topekadipurana moala rota iti. 6 Nahungkami rota iti, naitari ara anangkoi i lalu au tangana teria. Ido hai maahimi laluna hai mololita, nauli, “Anangkoi ide manoto ananda to Ibarani.”
7 Mewali laomi wutuna anangkoi iti mekune i anana Pirao, nauli, “Ba taunde ane kuhaokiake hadua ina to Ibarani bona mokadipuraake hai mopatomiake anangkoi iti?”
8 Mehana anana Pirao, “Maroa!” Mewali laomi anantowawine iti mokakio inana anangkoi iti. 9 Mewali mololitami anana Pirao i ina iti, nauli, “Anangkoi ide nuanti hai nupatomiana, kuwei raiko saromu.” Mewali naantimi anangkoi iti hai napatomi. 10 Mangisaami anangkoi iti, laomi naanti i anana Pirao au mampoanami anangkoi iti hai nahangami Musa lawi nauli, “Ia au kuhore mai hangko i owai.”
Musa mesila lao i tampo Midea
11 Manginaomi Musa, laomi mampombelambiahe halaluna bona naita noumba karapohawinda. Indo naitami hadua to Masiri mopahai hadua to Ibarani, hadua hangko i olonda halalunahe iti. 12 Musa membalili i koana, i kabeo hai i taleu naita bara ara tauna, pane napapatemi to Masiri iti hai natawumi hoholiga i wungi. 13 Kahalona mesuwu mbuli Musa, molambi mbulihe rodua to Ibarani tanganda mombetie. Liliu mekune Musa i to Ibarani au masala, nauli, “Moapari hai mopahaiko rangamu?”
14 Mehana, nauli, “Hema au moangkako mewali tadulakongki hai topebotusingki? Moapari, ba ina nupapate worina, nodoko mopapate to Masiri imaindi?” Mewali langami Musa, lawi napekiri, “Manoto babehiangku iti kewami.” 15 Kanaisanami Pirao au mewali iti, nahaokimi rara bona mopapate Musa. Agaiana Musa mesilami lao i tampo Midea. Kahawena inditi, ia mohuda-huda i hola tibubu.
16 Ara hadua tadulako mpenomba i Midea, anana pituhe towawine haha. Anana iti maihe mantambu, moihiihe dula bona mopaenuhe towau hai dimbana umanda. 17 Agaiana ara bahangkia toporewu au mowuragahe anantowawine iti. Liliu Musa mamperuruihe hai mopaenuhe dimba hai towaunda. 18 I pesulenda anantowawine iti, mekunemi Rehuel, umanda, nauli, “Moapari alo ide polo mesulekau?”
19 Mehanahe, rauli, “Ara hadua to Masiri au mamperuruingkai hangko i toporewu au ntanina. Bara peangkai naperurui, agaiana natambua woringkai owai kangkaia hai binatangki napaenuhe ope-ope.”
20 Roo nodo, mekune mbuli umanda, nauli, “Ia iumbami ide-ide? Moapari nipalehi mai tauna iti? Lao mai nikakio bona maande sambelake.”
21 Madotami Musa maida i sou iti, ido hai Rehuel motauna anana au rahanga Sipora hai Musa.
22 Mewali moanami towawine iti hadua tobalilo, hai Musa mohanga anangkoi iti Gersom, lawi nauli, “Iko mewalimona torare i tampo tohandarena.”
Musa natudu Pue
23 Bahangkiami parena hangko indo, matemi datu to Masiri. Agaiana to Isaraeli merararoahe anti karapohawinda, hai peraroanda iti hawemi i Pue Ala. 24 Nahadimi Pue Ala peraroanda, Nakatuinaomi podandiNa i Burahima, Isaki hai Yako. 25 Naita mpuumohe to Isaraeli iti rapohawi, ido hai Nabotusimi hangangaa Nahoremahe.