Pesuwunda
To Isaraeli rapohawihe i tampo Masiri
1
1 Yako au rahanga wori Isaraeli lao i Masiri hihimbela hai ananahe hai ope-ope tinanda. Hanganda anana iti iamohe: 2 Rube, Simeo, Lewi, Yehuda, 3 Isakar, Sebulo, Benami, 4 Dan, Naptali, Gad, Asyer.5 Pemuleanahe Yako iti, pitu pulona kabosanda. Agaiana Yusupu ara amimi i tampo Masiri. 6 Hangko indo, matemi Yusupu hai halalunahe, hihimbela hai hasinumpanahe. 7 Memule-mulemohe to Isaraeli iti alana tetambai kabosanda, ido hai tampo Masiri iti rabukehimi.
8 Roo indo, hadua datu au wou au bara mokaisanga Yusupu, mepongka moparenta i tampo Masiri. 9 Mewali mololitami datu iti i taunana, nauli, “To Isaraeli iti melumbumi kabosanda hangko irikita. 10 Ane rapana mewali pombeala, peisahe mampohintuwua iwalinta hai rapombealaake alanda paduhe hangko i tampo ide. Hangangaa tahaoki rara bona barapi tetambai kabosanda.” 11 Mewali to Masiri motudohe mandoro mokampai to Isaraeli bona rapamantimi bagonda hai rapari-parihe mampoaroa Pirao wanua Pitom hai Ramses, au ina rapambolii paande hai parewa. 12 Agaiana nauri rumihi karapohawinda, katetetambaiari kabosanda, ido hai to Isaraeli rapokalangamohe tauna. 13 Hangko indo, to Masiri mampohawi ntepuumohe to Isaraeli, 14 katuwonda rapamapari hai bago au mantimi. Rapopoluntehe tampo polo hai rapopoteruhe watu tela. Hai mampopengaa mani bago i pada hai hinangka bago mantimi, rapari-pariahe rapobago.
15 Datu Masiri moparentai wori rodua sando au mampopoanahe towawine to Ibarani, hanganda Sifra hai Pua, nauliangaahe, node, 16 “Ane mampopoanakau towawine to Ibarani, hangangaa nipeita maroa-roa: ane tobalilo hangangaa nipapate, agaiana ane towawine nipalikangaa peamohe tuwo.” 17 Agaiana sando au rodua iti langahe i Pue Ala, pane barahe bai mobabehi apa au nauliangaahe datu Masiri, idomi hai ope-ope analei rapalikangaahe tuwo. 18 Mewali datu Masiri mokakiohe sando au rodua iti hai nakunehe, nauli, “Moapari hai Nipogiangaahe tuwo ope-ope analei iti?”
19 Mehanahe sando iti, rauli, “Towawine to Ibarani barahe nodo to Masiri, lawi marohohe. Hangko damani hawe sando, mesupami ananda.” 20 Mewali sando au rodua iti nawatihe Pue Ala, hai to Isaraeli katetetambaiari kabosanda hai karoho-rohoarahe. 21 Anti kalanganda i Pue Ala, ido hai sando au rodua iti, nawatihe Pue Ala bona memule-mulehe. 22 Roo indo, Pirao moparentaihe taunana, nauli node, “Ope-ope ananda to Ibarani tobalilo au hangko mesupa, hangangaa nitendehe i owai Nil, agaiana ope-ope ananda towawine au hangko mesupa, nipogiangaahe tuwo.”