1 THESSALONIANS
थिस्लोनी च्या पहिला पत्र
1
पौल आना सिलवास आना तिमुथियुसाआ वोगेरोत थीसलुनिकीयो मोंडलीही नावे जी परमेश्वर आबहाआ आना प्रभु यीशु मसीह मेहे होय अनुग्रह आना शांति तुमुहू जोडित रोय 2 आमु आपाआ प्रार्थनाम तुम्हामे ऐन कोअत्लू आना हरएक वेले तुमु आखाविषयी परमेश्वराआ धन्यवाद आपत्ले 3 आना आपाआ परमेश्वर आना आबहाआ आगाडी तुमाआ विश्वासाआ काम आना प्रेमाआ मेहनत आना आमु प्रभू येशु ख्रिस्तामेहे आशेने धीरजला हमेशा ओर कोईत रोतलू 4 ऐ पाहीही, परमेश्वराआ प्रिय माहु, तुम्हामे मोलुम होय का तुमु परमेश्वराआ निवडाविले होय 5 काहाके आमाआं सुवार्ता तुमापोओ फक्त शब्दामे नाहा ताहा पवित्र आत्म्यात आना वोडो खात्रीवाही पोतीतगोयू होय जेहलो तुमु समजीलो का आमु तुम्हाकोअता तुम्हामे एहलो बोणीत गोये ओते 6 तुमु वोडो दुखोमेहे पवित्र आत्म्यात आनंदाआरी वचनाआ माणीत आमाईही प्रभुकोअता चाल चालीलो होय 7 इहिंजा का डोडू दुनिया आना अखयातील आखे विश्वास मिकीलापोओ तुमु नमुनाs बोन्यो 8 काहाके तुमाआ ईहिरोत फक्त मक्कीदुनिया आना अखयामध्येच प्रभूऊ वचन कोल्यो गोये एहलो नाहा ताहा तुमाआ विश्वास जो परमेश्वराआ होय हरएक जाग्तली एह्ली चर्चा फैलावीत गोयी होय का आमुहू कोअला आवश्यकता नाहा 9 काहाके ते स्वतः आमु विषयी कोतला का तुमापोओ आमुहू आविला केहलो उवे आना तुमु परमेश्वराही केहलो वोलोलो म्हणजे जिवंत आना खोरो परमेश्वाराची सेवा कोईली 10 आना त्याआ पोऱ्याहा होर्गामरोत आविलाआ वात पालीत रो ज्याहा तिये मोल्यामरोत जिवंत कोल्यु, काहाके येशुऊ जो आमुहू आवनाराआ संकटामेहे सोडवित्लो.