7
कोईत ऐ प्रीयानो, जर आमुहू ए अभिवचने जोड़ी होय ताहा आव, आपु स्वतःहा डील आना आत्माआ आखे अशुद्धतेपासून शुद्ध कोईओलो आना परमेश्वराआ बित मेकीत पवित्रतेला पुरो कोईओलो 2 आमुहू आपाआ मोनामेहे जागू दया, आमुहू कोडाआरी अन्याय कोल्योओ नाहा कोडाआ बिघडावीत्लो नाहा आना कोडाआ फासाल्यू नाहा 3 आय तुम्हामे दोषी ठरविलाकोता कोल्यो नाहा, काहाके आय पहिलुच कोल्यो होय का तुमु माआ मोनामेहे एहलो बोह्ये होय का आमुहू तुम्हाकोअता मोहुहू जीवोन जीविल तीयार होय 4 आय तुम्हामे जास्तीज हिमंत तोईत कोल्यो होय का माहु तुमापो वोडू गर्व होय , आय शांतीई पोईत गोल्यो होय आपाआ आखे संकटामे आय आनंदावाही जाअखो रोतलू 5 काहाके जाहा आमु मकीदुनियेत आव्ये, तेहालाम पण आम्हा डीला आराम जोड़ी नाहा पोन आमु चारही ईवोल संकट सहन कोअत्लू, बारथे चुलानानाआरी, आना विसमे जाहक्ले गोठी कोल्यू 6 तेबी पोन बेनुहू शांती आपनाऱ्या परमेश्वराने तीतुसच्या आवता आमुहू शांती आप्यी 7 आना त्याआ आविलोच नाहा पण त्याआ तियाअ शांतीई पण जी शांती त्याहा तुमापोरोत जोड़ी ओती तिये तुमाआ इच्छा, तुमाआ दुख आना माकोअता तुमाआ आस्थेचा खोबोर आमुहू होमलावल्यो, ज्यामुळे माहु फासी पण आनंद पोयो 8 काहाके जर आय आपाआ पत्राने तुम्हामे नाराज कोल्यु पण तीयावाही माहु वाईट वाटत नाहा जेहलो पहीले वाईट वाटत ओतेकोईत आय पालत्लू का तिया पत्राने तुमु नाराज ताहा उवे पण ते थोडो टाइमाकोता ओते 9 ओमे आय आनंदाम होय पण यकोअता नाहा का तुम्हामे दुख पोचाडीदे पण यकोअता का तुमु तियाअ खोतालो मोन फिरीविलो , काहाके तुमाआ दुख परमेश्वराआ इच्छेवही ओतु का आमापोरोत तुम्हामे कोड्लाज गोठीमे नुकसान ओतगोल्यु कायना 10 काहाके परमेश्वर भोगोत दुख एहेलू फोसिगोल्यो निर्माण कोअत्लू, तिया परिणाम तारण होय आना फासाड़ी त्यावाईही फोसिगोल्यो कोईत काम नाहा पण जगाआ दुख मरण निर्माण कोअते 11 कोईत पाला , आव गाठीवाईही का तुम्हामे परमेश्वराआ भक्तीमेहे दुख उवे तुम्हामे केतो किरवाय आना दोष निवारण आना खोतलाघी, आना बित , आना उत्कंठा, आना आशा आना शिक्षण आपिला फूस निर्माण उवे? तुमु आखे प्रकारे देखाडीत आपिलू का तुमु आव गोठीमे निर्दोष होय 12 फासाड़ी आय जे तुमापोओ लेखिलो ओते , ते त्यावाईही लेखिलो नाहा, जीआ अन्याय कोल्योओ आना ज्यामुळे पण नाहा ज्यापो अन्याय कोल्योओ पण यकोअता का तुमाआ किरवाय जी आमच्यासाठी होय ती परमेश्वराआगाडीही तुमापो उघड ओतगोल्यु जानारू 13 त्यापोत आमुहू शांती जोड़ी, आम्हा आव शांतीमुळे तीतुसाच्या खुसिमे फासी पोन आनंद पोयो काहाके त्याआ जीवोन तुमु आखाज आख्याहा स्वस्थता जोड़ी 14 काहाके जर आय आगाडी तुम्हबारमे किबी गर्व देखाल्यु ताहा लाजावालो नाहा पण जेहलो आमुहू तुम्हामे आखे गोठी खोरो कोत आप्या कोल्यू, तेहलूज आमाआ गर्व देखाडिलो तीतुसाआगाड़ी खोरो निकलीलू 15 जाहा त्याहा तुम्हाआ आखाजे आज्ञाकारी ओनारो ओर येत का केहलो तुमु बित कापीत पाअये ओते ताहा तिया प्रेम तुमाही फासी वोद्तो जात्लू 16 आय आनंदाम होय काहाके माहु हरएक गोठीमे तुमापो पुरो भोरुसो होय.