19
तो यरीहो माय जातू ओतु 2 तीइही जक्कय नावाआ एक माहुहू ओतु तो कारवूसून कोआनाराआ मुख्य ओतु 3 त्याहा येशुहू पालीलो ओते के कोडु होय , पण त्याहा गर्दीवही देखाहे नेओतू काहाके तो हानु ओतु 4 तेहालाम त्याहा पालीलाकोता तो उनाआ उबरोओ साडोपो सोढयू काहाके येशु त्याआ सोडकोपो जानारू ओतु 5 जेव्हा येशु तिया जाग्तली पोतीतगोयू तेहालाम उसे पालीत तिये कोल्यो , ओ जक्कय, वेगु उतरित आव ; काहाके आज माहु ताआ कोअमे रोलो होय 6 तो आनंदावाही उतरित आपाआ कोअमे घेऊन गोल्यो 7 ओ पालीत आखे मांहे कुरकुर कोहू लागाडीत , तो ताहा उनाआ पापी माहुहु कोअमे गोल्यो होय 8 जक्कयाहि उभे रोत प्रभूहु कोल्यो , ओ प्रभू आय आपाआ आर्दी धनदौलत गोरब्योहो आपोहो आना जर कोडाआ किबी पण अन्यायावाही लेधलो होय ताहा त्याहा चोर पट्ट फासी कोअनारू 9 तेहालाम येशूने त्याहा कोल्यो , आज आव कोओहो तारण जोडयो उवे होय त्यापोत ओ पण अब्राहमाआ पोऱ्या होय 10 काहाके माअहा पुत्र टाकाईत्गोल्याहा होदिलाकोता आना त्याआं तारण कोइलाकोअता आवयू होय 11 जाहा ते याआ गोठी उनाईत ओते ताहा तिये एक उदाहरण कोल्यो , यावाही का तो यरुशलेम जागे ओतु आना ते होमाजाडीत ओते का परमेश्वराआ राज्य ओमे प्रकट उवे होय 12 कोईत तिये कोल्यो , एक श्रीमंत माहुहू सेटे त्याहा जातलू म्हणजे तो राज जागा मिलवीत फिरीत आविलो 13 तिये आपाआ पावरोमेहे दहा जोह हादीत त्याहा दहा शिक्के आपिलू आना त्याहा कोल्यो , आय फासी आविलो तोपोरोत लेनदेन कोईओलो 14 पोन त्याआ नगरामे रोणारे त्याआरी द्वेष कोईओलो आना त्याआ फासाडी वकीलाआ त्यापोरत कोत मोक्ल्यीत का आमुहू नाहा जोवे का ओ आमापो राज्य कोअनारू 15 जाहा तो राज जागा मिलवीत फिरीत आवयू तेहालाम एहलो उवे का आपाआ पावारोहो ज्याहा तिये रोखडी आपिलू ओते आपआरी हादीत लाविले म्हणजे मोलुम कोअनारू का तिये लेनदेन लेतजा नाहाकोत- नाहाकोत कामावोह्यो 16 तेहालाम पल्ले आविलो कोल्यो , ऐ स्वामी ताआ शिक्काकोईत आय दहा शिक्के कामावोह्यो होय 17 तिये त्याहा कोल्यो , धन्य, ऐ उत्तम सेवाकापो जास्तीज आना कोम माय विश्वास योग्य निघाल्यू ओमे दहा नगराउपो अधिकार मेका 18 बिहरा आविलो कोल्यो , ऐ स्वामी, ताआ शिक्काकोईत आय आजू पाच शिक्के कामावोह्यो होय 19 तिये त्याहा पण कोल्यो तू पण पाच नगरोत अधिकारी ओतगोल्यु जा 20 तिसरुजे आविलो कोयो, ओ स्वामी, पाला ताआ ओ हिकिलो होय ज्याहा आय गाठ्डामेहे बांधीत मेक्ल्ये होय 21 काहाके आय ताहु बित ओतू यावाही का तू कडक माहुहू होय जे तू कोल्यु नाहा त्याहा विसित लेहो आना जे तू पेहे नाहा त्याहा तू वाड्तुलू 22 तिये त्याहा कोल्यो , ऐ दुष्ट सेवाकापो, आय ताआज सोबिकोईत ताहु दोषी ठरावीत होय तू माहु जाणम ओतु का आय कडक माहुहू होय जे आय मेक्ल्ये नाहोत आय विसित लेहो आना जे आय पेहे नाहा ते आय वाड्तुलू; 23 ताहा तू माआ सावकारापो काहा मेक्ल्ये नाहा का आय आविलो व्याजाआरी घेऊन लेधलो ओते 24 जे मांहे जागे उभे ओते तिये त्याहा कोल्यो तो शिक्का त्यापोरोत घेऊन ल्या आना त्याहा दया ज्याआपो दहा शिक्के होय 25 तिये त्याहा कोल्यो , ऐ स्वामी, त्यांही ताहा दहा शिक्के ताहा होय ? 26 आय तुम्हामे कोतलू का ज्याआपो होय त्याहा आपिलू जाइअलो; आना ज्यापो नाहा त्यापोरोत ते पण घेऊन लेधलो जाइअलो जे त्यांही होय 27 पोन माआ तियाअ वैऱ्यी ज्याहा वाटत नाहाआत्लू का आय त्यांपो राज्य कोहू त्याहा इही माआगाडी लेतआवीत त्याआ घात को 28 ए गोठी कोत तो यरुशलेमाही त्याआ आगाडी- आगाडी गोल्यो 29 जाहा तो जैतून नावोओ डोगोपो बेथफगे आना बेथानी जागे पोतीतगोयू, तेहालाम तिये आपाआ शिष्यामेरोत बेन जोह ओ कोत मोक्ल्यीत, 30 आगाडीइ गावून जा; आना तीयाम पोतताज एक गोदडीई गोदडापिलो जियीपो खोरोज कोडु प्रवेश कोल्योओ नाहा बांधीत मेकही तुम्हामे जोडीत त्याहा सोडीत घेऊन आव 31 जर कोडु तुम्हामे फुसनारू का काहा सोडीदेतले, ताहा ओ कोओलो का प्रभूहु याहा गोरोज होय 32 ज्याहा मोक्ल्यीत ओते तिये जात त्याहा कोल्यो ओते , तेहलूज देखाये 33 जाहा ते गोदडापिलाः सोडीत ओते , तेहालाम त्याआ मालक्योहो त्याहा फ़ुस्ल्याआ, आव गोद्दपिलाहा काहा सोडीत होय 34 तिये कोल्यो , प्रभूहु याहा गोरोज होय 35 ते त्याहा येशुआरी घेऊन गोये आना आपाआ आगडे त्याआपो टाकीत येशुहू त्याआपो बोहाडीत आपिलू 36 जाहा तो जात ओतु तेहालाम ते आपाआ आंगडे वाटेपो मेकीत जात ओते 37 जागे आवीत ओयताहा जेव्हा तो जैतून डोगोओ उतरनिवर पोतीतगोयू तेहालाम शिष्याची आखी मोडंली तियाअ आखे सामर्थ्याआ कामामुळे जे तिये पालील्यो ओते आनंदाम ओतगोल्यु वोडो शब्दावाही परमेश्वराआ स्तुती कोहू लागाडीत , 38 "धन्य होय तो राजा , जो प्रभूउ नावामेहे आवत्लू! होर्गाम शांती आना जुगामेहे स्तुती होय 39 तेहालाम गर्दीमेऱ्ये किबी परुसी कोहू लागाडीत ऐ स्वामी आपाआ शिष्यांआ धामकाडा 40 तिये उत्तर आपिलू आय तुम्हामे कोतलू जर ओ ठावकू रोही ताहा डोणो आअडीही 41 जेव्हा तो जागे आवयू तेहालाम नगराहा पालहु तो रोड्यू 42 आना कोल्यो केतो हाजो उवे ओते का तांहुज आव दिह्याहा आना हाजा गोठीही होमज्ये ओते पण ओमे ते ताआ डोआवाही निकाईत गोये होय 43 काहाके ते दीही तापो आविलो का तांआ दुश्मन कट बांधीत ताहु गांडे पेअही आना चारही साइतटूमे ताहु दाबनारू 44 आना ताहु आना ताआ पोऱ्याहा जो तांआम होय , कादकाम मेलविनारो आना तामेहे दोणोपो डोणो पण सोडविणारू नाहा; काहाके तू टाईमोम जेव्हा तापो कृपा नजर कोअयी गोयी ओलखीही नाहा 45 तेहालाम तो मंदिरोम जात वेसनाराहा बारथे काडीलो लाग्यू 46 आना त्याहा कोल्यो , “लेखिलो होय , माआ को होय, पण तुमु त्याहा चोराहा गुफा बोणाडीत आप्यी होय ” 47 तो दाडीअ मंदिरोम हिकवन आपित ओतु; आना मुख्य याजक आना शास्त्री आना महुअ प्रमुख तिया नाश कोइलाकोअता योग्य वेल होदित ओते 48 पोन किबी उपाय काढहु सेकेले नाहा का ओ कोडला प्रकारे कोईओलो काहाके आखे मांहे वोडो आवडेवाही त्याआ उनाईत ओते.