18
तेहालाम तिये त्याआ विषयामे हमेशा प्रार्थना कोईली आना खचू कायना ओ दृष्टामे आखिलो 2 कोडु उनाआ नगरामेहे न्यायधीश रोत ओतु, तो परमेश्वराआ बित नेओतू आना कोड्लाज माहांआ पोरोधीही कोईत नेओतू 3 तिया नगरामेहे एक रोंडाली रोत ओती, जी त्याआ जागे आवीत -आवीत कोल्यो ओती, माआ न्याय सुकाडीत माहु माआ कर्जदारापोरोत वासाडा' 4 किबी वेल पर्यंत तो ते मान्यु नाहा परंतु आखरी मोनामे फूस कोईत कोल्यो , जर आय परमेश्वराआ बित नाहा , आना माहांआ फिकीर न कोअता; 5 तेबी ए रोंडाली माहु त्रास आपित रोनारे, याआ याकोअता आय तीई न्याय कोअही, केधी एहलो न ओवो का घडी -घडी आवीत माहु त्रास आपे '' 6 प्रभूऊ कोल्यो ,'' उनाआ , ओ अधर्मी न्यायकोअनारा नाहाकोत कोतलू? 7 याआ याकोअता नाहाकोत परमेश्वर आपाआ निवाडीतमेकल्या न्याय तो कोअनारू नाहा काहा, जो रात दीही तिया गुगदा कोअता? नाहाकोत तो आपाआ विषया माय वेल लागाडे? 8 आय तुम्हामे कोतलू, तो लागेज तिया न्याय कोआ तेबी पण माअहा पुत्र धोरती उपो आवेज तेहालाम त्याहा धोरतीपो विश्वास रोही नाहाकोत 9 तिये त्याआ त्यापोरोत जे त्याआपो भरोवसू मेकीत ओते , का आमुहू धोर्मी होय आना बिहराहा तुच्छ मानीत ओते , ओच दृष्टामे आखिलो: 10 बेन मांहु मंदिरोम प्रार्थना कोइलाकोअता गोये ; एक परुसी आना बिहरु जकात लेणारू 11 परुसी उबु रोत त्याआ मोनामे प्रार्थना कोहू लाग्यू ,' ओ परमेश्वर आय तांआ धन्यवाद कोअत्लू का आय बिहीरा महांआ तारखू ढोगनारू जुलूमकोअनारो, आना पापकोनारू नाहा आना नाहा जकात बाअनो तारखू होय 12 आय हप्तामरोत बेनवा उपास मेकोहो आय आपाआ कोमायाई दहावू भाग पण आपोहो 13 परंतु जकात लेणारू सेठुज उबु रोत होर्गो त्याही पाल्हू इच्छी ला नाहा ताहा आपाआ छाती ठोकीत- ठोकीत कोल्यो ,' ओ परमेश्वरा पाप्यापो आपा को 14 आय तुम्हामे कोतलू का, तो बिहरु मांहु परंतु तोज मांहु धोर्मी ठेरविल्या जात आपाआ कोआ गोल्यो; काहाके का जो कोडु आपाआ माह वोडू बोनावोही, तो हानू कोअल्यो जाय; आना जो आपाआ माह हानू बोनावोही त्याहा वोडो कोल्यु जाय'' 15 फासाड़ी माहे आपाआ पोऱ्याहा पण त्याआ जागे लेतआवुहु लागाडीत काहाके तो त्याआपो आथे मेकीही; परंतु शिष्यांनी पालीत त्याहा रागाडे 16 येशूने पोऱ्याहा जागे हादीत कोल्यो ,'' पोऱ्याहा माआ त्याही आवी आपा , आना त्याहा नाहा कोहू नाहा ; काहाके परमेश्वराआ राज्य त्याआ हारको त्याच होय 17 आय तुम्हामे खोरो कोतलू का जो कोडु परमेश्वराआ राजाहा पोर्याआ एकहरको तेईतले कोअनारू नाहा तो तीयाम केधीज प्रवेश कोहू सेकेहे नाहा'' 18 कोडु उनाआ अधिकरावाही त्याहा फ़ुस्ल्याआ,'' ओ उत्तम गुरु , सार्वकालिक जिवनाआ अधिकारी उविला याकोअता आय नाहाकोत कोहू ?'' 19 येशू लेतजा त्याहा कोल्यो ,'' तू माहु उत्तम काहा कोतलू? कोडूच उत्तम नाहा केवळ एक, अर्थात परमेश्वर 20 तू आज्ञाहा जाआत्लू:' सिनालो नाहा कोईओलो, हत्या कोहू नाहा , आना चोरी कोइलाआ नाहा, झुटी साक्ष आपुहू नाहा, आपाआ आबहू आना आपाआ आयहि चा आदर कोअला''' 21 तिये कोल्यो, आय ताहा आव आखाआ जुवान पणा पोरोत पालीत आवयू होय '' 22 ओ येशू लेतजा त्याहा कोल्यो,'' तांआम ओमे पण एक गोठी ची कोम होय आपाआ आखे किबी वेसेत गोरब्योहो आपित टाक ; आना ताहु होर्गाम धन जोडीत , आना आव साल माआ फासाडी आव '' 23 ओ उनाईत तो खुप उदास पोयो, काहाके तो जाखो श्रीमंत ओतु 24 येशूने त्याहा पालहु कोल्यो '' पोस्यावालो परमेश्वराआ राज्य माय प्रवेश करन केतो कठीण होय 25 परमेश्वराआ राज्याम धनवान याकोअता प्रवेश कोईलापेक्षा उटळाआ हुयीइ नाकामेरोत जाअलो सोपो होय '' 26 आव वरून उनानारे कोल्यो ,'' ताहा फासाड़ी कोडाआ तारण ओवुहू शकतो?'' 27 तिये कोल्यो ,'' जे महांआ त्यापोरोत नाहा ओवुहू शकत, ते परमेश्वरा त्यापोरोत ओवुहू सेकोहो '' 28 पेत्राई कोल्यो ,'' पाला आमुहू ताहा कोअबा सोडीत ताआ फासाडी आव्ये होय '' 29 तिये त्याहा कोल्यो,'' आय तुम्हामे खोरो कोतलू का एहेलू कोडोनाहा जो परमेश्वराआ राज्य याकोअता को नेते लाडी, नेते पायहोहो, नेते आई-वडील , नेते पोऱ्ये पोर्याहा सोडीत आपिलू होय '' 30 आना आव टायमोमें खूप पटावाही जोडयेहे नाहा आना आवनाराआ जुगोम अनंत जीवोन '' 31 फासाड़ी तो बाराजोहो आरी लेत जात त्याहा कोल्यो ,'' पाला, आमुहू यरुअशलेमाहा जात आहो, आना जेतेहे गोठी माहाहा पोऱ्याकोअता भविष्य वक्ता त्यापोरत लेखाल्यो गोयी होय , ते आखे पुरो उवे होय 32 काहाके तो बिहरे जातीइ आथोमेहे होपल्या जाइअलो, आना ते त्याआ चेष्टा कोआ आना त्यापोओ थुपे, 33 काहाके आना त्याहा फटके माये, आना घात कोआ ; आना तो तिसऱ्या तेदीही फासी जिवंत उवे'' 34 पोन ते आव गोठी मायारोत कोड्लीस गोठी होमज्ये नाहा; आना ती गोठी तिये निकाईत मेकल्यीअने जे कोल्यो गोये ओते ते त्याआ लक्षाम आव्ये नाहाआत्लू 35 जाहा तो यरीहो जागे पोतीतगोयू, ताहा एक आन्दले वाटेए किनारावपो बोहित भिक मागित ओतु 36 ते गर्दीइ जात ओतल्या आवाज उनाईत फुसुहूं लाग्यू ,'' सोण नाहाकोत उवनारा होय ?'' 37 तिये त्याहा कोल्यो,'' येशू नासरेथला जात होय '' 38 तेहालाम तो आयडीत कोल्यो , ओ येशू दाविदाआ पोऱ्ये, माआ उपो दया को!'' 39 जे आगाडी -आगाडी जात ओते , ते त्याहा रागवूहू लागाडीत का ठावकू बोह; परंतु तो जास्तीज आअडूई लाग्यू ,'' ओ दविदाआ पोऱ्ये, दया को!' 40 तेहालाम येशू उबु रोत आज्ञा आप्यी का त्याहा माआ त्याही लेतआव , आना तेहालाम तो जागे आवयू तेहालाम तिये त्याहा फ़ुस्ल्याआ, 41 ताहु नाहाकोत जोवे का आय ताआ याकोअता नाहाकोत कोहू ?'' तिये कोल्यो ,'' ओ प्रभू ओ को का आय पाल्हू गोयो'' 42 येशूने त्याहा कोल्यो ,'' पाल्हू लाग ताआ विश्वासा ताहु हाजो कोल्यु होय '' 43 तेहालाम लागेज तो पालुहु लाग्यू , आना परमेश्वराआ गौरव कोईत त्याआ फासाडी निहित गोल्यो आना आखे माहु पालहु परमेश्वराआ स्तुती कोअयी.