लूका 17

फासाड़ी तिये आपाआ शिष्यांआ कोल्यो,'' ओवुहू नाहा शकत का अडखळन नाहा उवे; परंतु हाय तियाअ मांहुंपो ज्या कारनोवाही ते आवत्ले ! 2 जो आव हनामोरोत पोरोत कोडा एकाहा अडखळन लाविले होय त्याआ याकोअता ओच हाजो होय का, कोअराआ तेलो त्याआ गोलाम बांधीत त्याहा समुद्राम टाकीलो 3 सावध रो; केधी ताआ पाही अपराध कोअही ताहा त्याहा होमाजळ, आना पस्तवूकोआही ताहा त्याहा क्षमा को 4 केधी दीही भरात तो सात अपराध कोअही आना हेगांति वेले ताआ जागे फासी आवीत कोअही, आय पस्ताव्यु होय ; ताहा त्याहा क्षमा को'' 5 तेहालाम प्रेषिताई प्रभूहु कोल्यो ,'' आमाआ विश्वास वोडाद'' 6 प्रभूऊ कोल्यो ,'' केधी तुम्हामे रईई दाण्या आरी पण विश्वास होय ताहा, तुमु आव तुतीई सोडोहो कोआ का मुलामोरोत उपटीत समुद्राम लागित जा, ताहा ते तुमाआ उनाअयो ओते 7 तुमामेय एहेलू कोडू होय , ज्याचा दास ओल जुपत्लु आना मेडांहा सारत्लू, आना जेव्हा तो खेतामेरोत आवयू, ताहा त्याहा कोआ,' वेगु आवीत रोटू कोअला बोह? 8 आना ओ कोहू नाहा ,' माआ रोटू तीयार को, आना तोपोरोत आय खाय पीय तोपोरोत कोमोर बाधित माआ सेवा को; याआ फासाड़ी तू पण खात पित्कोईत ले 9 नाहाकोत तो तियाअ पावराआ उपकाराआ मानीही का तिये तोच काम कोल्यु ज्याआ आज्ञा आप्यी गोयी ओती? 10 आव रीतीवाही तुमुभी आखे कामोहो कोईत टाका ज्याआ आज्ञा तुम्हामे आप्यी गोयी ओती; तेहालाम कोआ,' आमुहू खाली दास होय ; जे आमुहू कोअला जोवे ओते आमुहू केवळ तोच कोल्यु होय 11 एहलो उवे का ते यरुशलेम त्याही जात ओयताहा शमरोनाम गालीला मायारोत जात ओतु 12 कोडला उनाआ गावून प्रवेश कोइलाआ टायमोमें दहा कुष्ट माद्वाड्यो मिल्ये 13 तेहालाम सेठुज उभे रोत उचो शब्दाम कोल्यो , ओ येशू, ओ स्वामी आमापो आपा को'' 14 तिये त्याहा कोल्यो , जा, आना माह याजकाहा देखाव'' आना जाता -जाता ते शुद्ध उवे 15 तेहालाम त्यामेहे एक ओ पालीत आय हाजू पोयो होय उचो शब्दा माय परमेश्वराआ गौरव कोईत फासी आवयू; 16 आना येशु च्या गुडापो उबडू पोडीत त्याआ आभार महांआ; आना तो शामरोनी ओतु 17 याकोयईत येशूने कोल्यो ,'' नाहाकोत दहा उवे नाहा, फासाड़ी ते नऊ का होय ? 18 नाहाकोत याआ दिहरापोरोत फाशी कोडूच निघाल्यू नाहा जो परमेश्वराआ गौरव कोअही?'' 19 तेहालाम तिये त्याहा कोल्यो ,'' उठित निहित जा; ताआ विश्वासा ताहु हाजो कोल्यु होय '' 20 तेहालाम परुश्यांहि त्याहा फ़ुस्ल्याआ का परमेश्वराआ राज्य कोंयो आवे , ताहा तिये त्याहा उत्तर आपिलू,'' परमेश्वराआ राज्य नजारू रुपात आवीत नाहा 21 आना माहे ओ नाहा कोअही , पाला, इही होय , नहाते तीइही होय ; काहाके पाला , परमेश्वराआ राज्य तुमाआ माय होय '' 22 फासाडी तिये शिष्यांनी त्याहा कोल्यो ,'' तो दीही आवे , ज्याम तुमु माहाहा पुत्राच्या दिहोमे एक दिह्याहा पाल्हू इच्छिता, आना नाहा पाल्हू सेकेहे 23 माहे तुम्हामे कोय,' पाला तीइही होय ' नहाते ,' पाला तीही होय ' परंतु तुमु निहित जाऊ नाहा आना त्याआ फासाडी जाऊ नाहा 24 काहाके जीही विग जुगाहा उनाआ जागेरोत निहित बिहीरा सेटे सोमकीनारी, तेह्लुज माअहा पुत्र पण आपाआ दिहोम प्रकट उवे 25 पोन पहीले आवश्यक होय का तो जाअखो दु: ख वीसही आना तियाअ कालोओ माहे त्याहा तुच्छ माने 26 जेहलो नोहाआ दिहोम उवे ओते , तेहलूज माहाहा पुत्राच्या दिहोमेभी उवे 27 ज्या दिहे पर्यंत नोहा जहाजोमे सोढयू नाहा, तियाअ दिहे पर्यंत माहे खायलो पीत ओते , आना ते वेहवाल कोईत ओते तेहालाम पाई पोअयोजोर आविलो तियाअ आखाहा नष्ट कोल्यु 28 आना जेहलो लोट च्या दिहोम उवे ओते आना माहे खायलो पीत ओते , लेआलो आपही कोईत साडे लागाडीत ओते को बांधित ओते ; 29 पोन तिया तेदीही लोट सदोम मायारोत निघाल्यू , तियाअ तेदीही आग आना गंधक जुगोमोरत पोड्यी आना आखाहा नष्ट कोईत आपिलू 30 माअहा पुत्राच्या आविलाआ तेदीही पण ऐहलेच उवे 31 तिया तेदीही जो कोवलापो होय आना त्याआ एकहरको कोअमे होय तो त्याहा घेण्यासाठी जाऊ कायना; आना ऐहलेच जे खेतोमे ओये ते फासी जाऊ कायना 32 तिया लोटाआ लाडीही स्मरण मेका 33 तिया जो कोडु आपाआ जीव वाचाआडयो पालत्लू तो त्याहा वासाड़े, आना जो कोडु त्याहा वासाड़े तो त्याहा जिवंत मेके 34 आय तुम्हामे कोतलू, तियाअ राती बेन मांहु एकाच खाटलापो होय ; एक लेदो जाइअलो आना बिहरु सोडीत आप्यू जाइअलो 35 बेन बोई एक आरी जात्यावर दोईत होय , एक लेदिओलो जाइअलो आना बिहरि सोडीत आप्या जाइअलो 36 बेन जोओ खेतोम ओय एक विसात जाय आना बीहरू रोतजाय . 37 ओ उनाईत तिये त्याहा फ़ुस्ल्याआ, ओ प्रभू ओ का उवे,'' तिये त्याहा कोल्यो ,'' जीही प्रेत होय तीइही हिंगाडो जोमुहू.