15
ओमे जेव्हा जकातदार आना पापी आखे त्याआं ऐकावयास त्याजागे आवीत ओते 2 तेहालाम परुसी आना यहुदी धर्म शास्त्री बडबड कोईत कोल्यो , “ओ माहहू ताहा पापी महुअ स्वागत कोईत होय आना त्यांआपो रोटू कोईत होय ” 3 यापो येशूने त्याहा ओ दाखलू होमलावल्यो, 4 सोमजा तुमामेरयू कोडाही होव मेंढे होय आना त्यामेरोत एक अटकालू ताहा नाहाकोत तो नव्याण्णव मेंढे जंगलूम सोडीत ते आरावातुरोल्याआ फासाडी जाइअलो जोपोरोत ते जोडनारू नाहा 5 फासाड़ी ते मेंढो त्याहा जोडत्लो तेहालाम त्याहा आनंदावाही त्याहा आपाआ खांदापो विसित लेहो 6 आना जेव्हा तो कोआ फासी जात्लू तेहालाम आपाआ दोस्ताहा आना जागऱ्याहा जागे हादीत त्याहा कोतलू, माआरी आनंद को काहाके माआ टाकाईतरोल्ये मेंढो जोडल्यो होय 7 आय तुम्हामे कोल्यो होय ह्याप्रमाणे कदोएक मोन बोद्लीणाराआ पापी याकोअता, तियाअ नव्याण्णव नीतिमान माहूपेक्षा, ज्याहा बद्लाविलाआ गरजओतली नाहा होर्गाम आनंद कोल्योओ जाइअलो 8 काहाके सोमजा कोडु बोयोआ होय जिआरी दहा सांदीई सिक्के होय आना तीई एक सिक्का टाकाइतलो ताहा नाहाकोत ती दिवू लागाडी कोअमे जीवताहा बाईत रोही आना लक्ष आपित होदित रोही जोपोरोत ते जोडित नाहा? 9 आना जेव्हा तीही ते जोडे तेहालाम ती आपाआ दोस्ताहा आना जागऱ्याहा जागे हादीत कोअही , माआरी आनंद को काहाके माआ शिक्का जो टाकाईतगोल्यू ओतु तो जोड्यू होय 10 आय तुम्हामे कोतलू का ह्याप्रमाणे एक मोन बदलावणाऱ्या पापिकोअता पण परमेश्वराआ दूताआ हजर त्याजागे आनंद कोल्योओ जाइअलो 11 फासाड़ी येशूने कोल्यो , “उनाआ माहांआ बेन पोऱ्ये ओते ” 12 हानू पोऱ्यामूळे आपाआ आबहाहा कोल्यो , “जी धनदौलत माआ वाटांम होय ती धनदौलत माहु आपित आप ,” तेहालाम आबहे आपाआ बेनुपोऱ्याहा धन वाटीत आप्यी 13 ओमेजा जाखो वेल उवी नाहाओती , का हानू पोऱ्यामूळे आपाआ धन लेदि आना सेटे त्याहा जाहू निघाल्यू , आना त्याजागे मज्याकोली कोईत आपाआ आखे धनदवलत उदलीत टाक्यी 14 जेव्हा त्याआ आखे धनदौलत सेलाई ओती तोयोज तियाअ त्याहा भिवाड्नारू दुष्काळ पोडीत ओतु तेहालाम तो ओड्सोणीम रोहू लाग्यू 15 याकोअता तो तियाअ त्याहा कोडा माअहाही जात मोजरी कोहू लाग्यू तिये त्याहा आपाआ खेतुम डुकरे सरीलाकाजे मोकलित आपिलू 16 त्याजागे तिये फूस कोल्योओ का त्याहा हेंग्यू खॉआलाकाजे जोडीत , जे डुकरे खायलो ओते परंतु कोडु त्याहा एक हेंग्यू पण आप्यी नाहा 17 फासाड़ी त्याहा जेव्हा तो शुद्धीपो आवयू तेहालाम बोलतुल्यो, माआ आबहाआरी एहलो केते मोजऱ्यो होय त्यांआपो खात पण उगरेहेएने आय इंही फुकल्यो मोईत होय 18 ओमे आय ईहिरोत माआ आबाआही जालो आना त्याहा कोल्यो, “आबुहू आय होर्गाहा परमेश्वर आना ताआबद्दल पाप कोल्यु होय ” 19 ओमे आगाडी आय ताआ पोऱ्या कोओला योग्य नाहा माहु आपाआ मोजऱ्यो होमजीत मेकीत ले 20 तेहालाम तो उठित आपाआ आबाआही निघाल्यू ओमे तो किबी अंतर सेटए ओतु, तेहालाम त्याआ आबहे त्याहा पालील्यो , आना त्याआ आबहाहा त्याआपो जाखो दया आवयी तेहालाम तो गुगदीत जात तिये आपाआ गोलाम गोलु कालीत त्याआ मुक्कु लेधलो 21 “पोऱ्यामूळे आपाआ आबहाहा कोल्यो , आबुहू, आय ताआ नाजरोवाही आना होर्ग्याआ विरूध आबहु कोल्यु होय आय ओमे तुमाआ पोऱ्या कोओला योग्य नाहा” 22 परंतु आबहे आपाआ पावारोहो कोल्यो , वेगु हाजो आगडे लेतआव आना याहा ते काला त्याआ आथोमेहे अंगठी आना गुडामे चप्पल काला 23 मातीत एहेलू जनावरे घेऊन वाडा त्याहा खात आपु आनंद कोहू 24 काहाके जो माआ पोऱ्या मोल्यु ओतु, ओमे जेहलो जिवंत पोयो होय , ओ टाकायू ओतु पण ओमे तो जोड्यू होय , तेहालाम ते आनंद कोहू लागाडीत 25 ओमे तिया वोडू पोऱ्या खेतुम ओतु, जेव्हा आवयू आना घराजवळ पोतीतगोयू तेहालाम तिये गाण्या नाचीलाआ आवाज उनाअलु 26 तिये आपाआ उनाआ नोकराहा हादीत फ़ुस्ल्याआ ओ आखे नाहाकोत जातले होय ? 27 पावरो त्याहा कोल्यो , ताआ पाही आवयू होय आना ताआ आबहे हाजूहोय आना हाजो पालीत एक मातीत जनावरे वाड्यू होय 28 वोडू पाही जास्तीज रागवूहु तो विसमे जातेच नेओतू तेहालाम तिया आबहू बारथे आवयू आना त्याहा होमजाद्योहो 29 पोन तिये आबहाहा उत्तर आपिलू, पाला , आय सालाआसाला ताआ सेवा कोईत आवयू होय आय ताआ कोडोबीही आज्ञाहां विरोध कोल्योओ नाहा परंतु तुमु माहु एक जनावरे आपिलू नाहा का आय आपाआ दोस्ताआरी आनंद कोहू 30 पोन जाहा ताआ ओ पोऱ्या आवयू जीआ वेश्यामेहे आपाआ आखे धन खोबाल्ये, त्यांकोअता तू वोडू मातीत जनावरे मारीलो 31 आबहे त्याहा कोल्यो , माआ पोऱ्या, तू कायमो माआ जागे होय आना जे किबी माआहने होय ते आखे ताआज होय 32 पोन आमुहू खुश उवूंहू जोवे आना तीवर मोनावीलू कोईओलो ताआ ओ पाही जो मोल्यु ओतु ओमे फासी जिवंत पोयो होय ओ अटकालू ओतु ओमे जोड्यू होय.