12
एतांम जेव्हा हजाराआ गोर्दी उवी ओती, इहिंजा का ते एक दिहरापो पोडीत जात ओते , ताहा आखाम पिहले आपाआ शिष्यांआ कोहू लाग्यू , "परूश्यांआ ढोग्यो विषयी खमीरा विषयी होंबाला 2 किबी टापितमेकल्ये नाहा, जे उघडीन्या नाहा जानारू ; आना किबी निकायू नाहा, जे होमजुत्लू नाहा 3 याकोअता जे किबी तुमु आदाराम कोल्यो होय , ते उजालामेहे उनाअयो जानारू ; आना जे तुमु कोठडाम कानोम कोल्यो होय , ते दाणापो गाजाड्योहो जानारू 4 "आय तुम्हामे जो ताआ हेगांति ओवुहू शकतो का जो डीला घात कोअता पण त्याआ फासाडी फासी किबी नाहा कोहू शकत, त्याहा नाहा बित 5 आय तुम्हामे सुचाविणारो का तुमु कोडाआ बितगोये जोवजे, घात कोईलानंतर ज्याहा नरकाआ टाकिलाआ अधिकार होय , तीयाहा बीआ 6 नाहाकोत बेन प्रेमाआ पाच सीडे नाहा वेसातो? तेबी पण परमेश्वर त्यापैकी उनाआ ला पण विहीऱ्यो नाहा 7 तुमाआ मुंडकाआ सिंज्ये पण गोणीतमेक्ल्यु आह, याकोअता बित नाहा , तुमु जास्तीज सीडे पेक्षा किमतिई होय 8 "आय तुम्हामे कोतलू जो माहाहा आगाडी माहु स्वीकारीही त्याहा माअहा पुत्र पण परमेश्वराआ स्वर्ग दूता आगाडी स्वीकारीत लेही 9 पोन जो माहाहा आगाडी माआ अस्वीकार कोअनारू तिया परमेश्वराआ स्वर्ग दूताआगडी नकार कोल्योओ जानारू 10 "जो कोडु माहाहा पुत्राच्या विरूधोम कोडु गोगनारू, तिया तो अपराध क्षमा नाहा कोअल्यो जानारू पोन पवित्र आत्मा नींदा कोओ नाराहां त्याआ अपराधाआ माफी ने जोड़े 11 "जाहा माहे तुम्हामे मंदिर सरकार आना अधिकार याआ आगाडी लेतजाय, ताहा कालजी नाहा कोइलाआ का आमुहू कोडला प्रकारे आना नाहाकोत उत्तर आपी, आना नाहाकोत कोअही 12 काहाके पवित्र आत्माआ त्याआ टायमोमें तुम्हामे हिकाडीत आपी का नाहाकोत कोहू जोवे" 13 फासाड़ी गर्दीमोरोत उनाआ जानोतांहि त्याहा कोल्यो , "ओ गुरुजी, माआ पायहोहो कोअलो का आबाहा धनदौलत माआ आरी वाटीत आप " 14 तो त्याहा कोल्यो , "ओ मांहु कोडु माहु तुमाआ न्यायाधीश वाटीईलो कोअनारू नेमिहयू होय ?" 15 तो त्याहा कोल्यो , "सावध रो , आना हरएक प्रकारोअओ लालासापोरोत आपाआ खुद : ला वासाडीत मेका; काहाके कोडाआ जीवोन त्याआ धन पोरोत रोत नाहा" 16 तिये त्याहा एक होपनाआ कोद्ल्यू: कोडु उनाआ श्रीमंत माहाआ जोमिनीही जाअखो ओन आव्ये 17 तेहालाम तो आपाआ मोनामे फूस कोहू लाग्यू , "आय नाहाकोत कोहू ? काहाके माआ इही जागू नाहा जीही माआ ओन ओ मेकहु" 18 आना तो कोल्यो , "आय ओ कोअनारू : आय आपाआ कोठारे तोडीत त्याआ त्यापोरोत वोडी बोनाडनारू; आना तीही आपाआ आखे ओनाज आना माल मेकही; 19 आना आपाआ जीवोहो कोअही का जीवू, ताआ जागे खूप धन मेकल्यी होय ; मोज्या को, खा, पिवा, सुखोवाही रो " 20 पोन परमेश्वराने त्याहा कोल्यो , "ओ फोगु! आव राती ताआ जीव ताआ पोरोत लेदो जाइअलो; तेहालाम जे किबी तू एकठे कोल्यु होय कोडाआ उवे?" 21 एहलो तो मांहु पण होय जो आपाआ याकोअता धन एकठे कोअत्लू, परंतु परमेश्वराआ नजरोआगाडी मालक नाहा" 22 तेहालाम तिये आपाआ शिष्यांआ कोल्यो , "याआकोअता आय तुम्हामे कोतलू, आपाआ जिवोअ चिंता नाहा कोहू का आमुहू नाहाकोत खावा; नाहा आपाआ डीलाआ का नाहाकोत कालीलो 23 काहाके का आगीपेक्षा जीव, आना आगडे पेक्षा डील विशेष होय 24 कागड़ा पोओ लक्ष लागाडा; ते पेअते नाहा, नाहा वाडीलो कोईत ; त्याआं कोठारे न त्याआं मोठी होय ; तेबी परमेश्वर त्याहा वागवितोलु तुमाआ किमोत पक्ष्यांपेक्षा जाअखो जाखो होय ! 25 तुमाआ मेरये एहेलू कोडू होय जो चिंता कोअल्यावाही आपाआ आयुष्याम एक वेल पण हुकाडहु शकतो? 26 यकोअता जर तुमु आखाम हानू काम त्याहाभी नाहा कोहू शकत, तेहालाम फाशीई बिहीरा गोठी याकोअता काहा चिंता कोईत रोतेहे? 27 शोषण कोअनारा साडोपो लक्ष दया का ते केहलो वोद्तो रोतेहे: ते नाहा मेहनत कोईत , नाहा वाडिलो कोईत ; तेबी पण आय तुम्हामे कोतलू का शलमोन त्याहाभी आपाआ आख्खा वैभवाआ, त्याआ कोडु उनाआ एक तारखू आगडे पेअल्यु नेओतू 28 यकोअता जर परमेश्वर धरतीउपो खोडोहो, जे आज होय हादां आगीम मेकल्या जाइअलो, एहेलू काल्त्लू; ताहा ओ अल्पविश्वसी जनोहो, तो तुम्हामे काहा नाहा पेअही? 29 आना तुमु ई गोठीई होदामेहे मा रोहा की खाहु की पीहू , आना ने शंका को 30 कोईत जगामेरया जाती आव आखे व्स्तुऊ होदिलामेहे रोत्ले: आना तुमाआ आबहु ओलखीतलु का तुम्हामे आव वस्तूची गरजओतली होय 31 पोन परमेश्वराआ राज्या आना धार्मिकता होद कोआ ते ऐ आखी वस्तू बी जोडीत जाय 32 "ऐ हाना गोठाआ, नाहा भिईलो; काहाके तुमाआ आबाहाहा हाजो लागेहे, का तुम्हामे राज्य आपिलो 33 आपाआ धन वेसेत दान को; तेहलूज होर्गामेऱ्ये अक्षय धनोओ जीरल्यो न उवनारू खोतल्या आपाकोअता कोईत मेका तिंही बाड आवीत नाहा आना कसर लागित नाहा 34 कोईत का जीही तुमाआ धन होय तीइही तुमाआ मोन त्याहाभी लाग्यीही रोही 35 "तुमाआ कोमारे बांधीतमेकली ओये आना तुमाआ दिवे पेटाळलेल्या ओये, 36 आना तुमु तियाअ मांहाहोस बन्यो, जे आपाआ मालकाआ वात पालीत रोतेहे का तो वेह्वालोमेरोत कोंयो फासी आवे , आना जेव्हा तो आविलो बायणो टोकीही तेहालाम लागेज त्याआ याकोअता उगाहद्या 37 धन्य होय ते दास जेव्हा मालक आविलो जागतू पालीही; आय तुम्हामे खरोज कोतलू का तो कोमोर बाधित त्याहा रोटू कोइला याकोअता बोहाडे आना जागे आविलो त्याआ सेवा कोअही 38 जर तो रातीई बिहीरा वेल पोन तिसऱ्या वेल आविलो जागतू पालीही, तेहालाम तो दास धन्य 39 पोन तुमु ओ होमजीत ल्या का जर कोआआ मालकोहू मोलुम ओते का बाड कोडला टायमोमें आवे , तेहालाम जागतू रो आना आपाआ कोओहो फोडू आपिलू कायनाओतो 40 तुमु त्याहाभी तीयारिमे रो ; काहाके का ज्या टायमोमें तुमु फूस त्याहाभी कोईत नाहा, तियाअ टायमोमें माअहा पुत्र आवे " 41 तेहालाम पेत्रसाई कोल्यो , "ओ प्रभू, नाहाकोत ओ दाखलू तू आमुहू का आखाज कोल्यो आह" 42 प्रभू कोल्यो , "तो विश्वासाजोगो आना फूस शाली कोडू होय , ज्याचा मालक त्याहा पावर पावोरोपो अधिकारी मेकनारू का त्याहा टायमोपो रोटू साधन आपी 43 धन्य होय जो दास , ज्याहा तिया मालक आविलो ऐह्लोज कोअत्लूतेहलाम पलणारू 44 आय तुम्हामे खरोज कोतलू, तो त्याहा आपाआ आखे धन उपो अधिकार ठेरवीही 45 पोन तो जर दास फूस कोअनारू का माआ मालक आविला वाअ कोईत होय , आना दासे आना दासी याहा माआहि देई लाग्यू , आना खात पित आना मस्त उवे 46 ताहा तियाअ पावरोओ मालक अश्या तेदीही, जेव्हा तो त्याआ वात पालीलो नाहा रोही आना एह्ली वेल ज्या तो होमजुत्लू नाहा, आविलो आना त्याहा वाडीत टाकही त्याहा विश्वासनाहा आरी मेकनारू 47 तो दास जो आपाआ मालकाआ इच्छा होमाजाडीत ओतु, आना तीयार नाहा रोला आना तिया इच्हावाहि जातलू, जास्तीज माआदे खाही 48 पण जो नाहा होमजीत माआदे खाअलाकोता काम कोअही तो कोम माआदे खाही ; आना ज्याहा जाखा होफहोपिन आपिलू होय , त्याआ त्यापोरोत जाखा लेदिओलो जानारू 49 "आय धोरतीपो आगी लागळा याकोअता आवयू होय ; आना नाहाकोत पालोहा फक्त ओ का ओमे पेटयी ओते! 50 ताहु ताहा एक बाप्तिस्मे लेअला होय , आना जोपोरोत तो उवे नाहा तोपोरोत आय कोडला व्येव्स्ताम रोही ! 51 पाच नाहाकोत तुम्हामे सोमजीतलो का आय धोरतीपो शांतता कोइला याकोअता आवयू होय ? आय तुम्हामे कोल्यो; नाहा ताहा अलग कोइला याकोअता आवयू होय 52 काहाके ओमे पोरोत उनाआ कोआत पाच जोओ आपामे विरोध कोअनारू , तीनुविरुद्ध बेन आना बेनुविरुद्ध तीनु 53 आबहू पुत्रा शी, आना पुत्र आबहाआरी विरोध्द कोअनारू ; आयहि पोऱ्यीरी आना पोऱ्यी आयहिरी, हावोहो वोवडीआरी, आना वोवडीहही हवोहोरी विरोध्द मेकही" 54 तिये माहुऊ पण कोल्यो , "जेव्हा तुमु वाढलाहा पश्चिमे त्यापोरोत आविलावेले पालल्ते तेहालाम लागेज कोतले का पाई पोडी, आना तेहलूज ओते ; 55 आना जेव्हा दक्षिणाआ वारू सुटल्लू तेहालाम का तेहालाम तुमु कोतले का गरम उवे आना तेहलूज उवनारा ओते 56 अरे ढोगकोणारा तुमु धोरती आना जुगोमेरयो रुपरांगोमे भेद कोहू सेकतेहे, परंतु आव युगाआ विषयी काहा भेद कोहू शकत नाहा? 57 “तुमु स्वतः निर्णय काहा नाहा कोईत लेत का हाजो नाहाकोत होय ? 58 पाच जेव्हा तू आपाआ वाद कोअनाऱ्या आरी अधिकाऱ्याहि जात होय ताहा वाटेम त्याआ पोरोत सोडीलाआ पर्यंत को, एहलो नाहा उवूंहू जोवजे का तो ताहु न्यायधीश त्याही घेऊन जानारू , आना न्यायधीश ताहु शिपायाआ आथे होपीही आना शिपाई ताहु जेलुमे टाकही 59 पाच आय तुम्हामे कोतलू का जोपोरोत तू दमळी न दमडी पोईत नाहा आपी तोपोरोत तिहीरोम सुटे नाहा.”