11
तो कोडला तेबी जागापो प्रार्थना कोईत ओतु जेव्हा तो प्रार्थना कोईत सेलाडये ताहा त्याआ शिष्यामेरोत एकाने कोल्यो , ओ प्रभू जेहलो योहानाई आपाआ शिष्यांआ प्रार्थना कोइलाकोअता हिकाड्ये, तेहलूज आमुहू हिकाडीत आप 2 तिये त्याहा कोल्यो , जेव्हा तुमु प्रार्थना कोअनारू ताहा एहलो कोआ, ओ आबुहू, तांआ नाव पवित्र महांआ जावा तांआ राज्य आवे, 3 आमाआ दीहोओ रोटू आमुह दाडीअ दीही आपतू रो , 4 आम्हा अपराधा माफ को, काहाके आमु पोन आम्हा हरएक अपराध्याहा माफ कोअत्लू आना आमुहू परीक्षेमेहे लेताआवहु नाहा 5 फासाड़ी तिये त्याहा कोल्यो , तुमाआ मायारोत कोडू होय तो तिया एक हेगांति होय आना तो आर्दी राती जात त्याजागे कोअही ओ दोस्ता, माहु तीन रोटा आप 6 काहाके एक प्रवासी हेगांति माआहने आवयू होय , आना आगडी मेकुहू माआहने किबी नाहा; 7 आना तो मायरोत उत्तर आपी माहु त्रास आपुहू नाहा; ओमे दरवाजू बंद होय आना माआ पोऱ्ये माआहने होय त्यापोत आय उठित ताहु आपुहू शकत नाहा 8 आय तुम्हामे कोतलू जर तिया हेगांति ओमेत पण त्याहा आपित नाहा तेबी पण लाज सोडीत मागीतलावाही त्याहा आवश्यक ओते तेवडो उठित आपी 9 आना आय तुम्हामे कोतलू का मागा म्हणजे तुम्हामे आपिलू जाइअलो; होदित म्हणजे तुम्हामे जोडीत ; ठोका म्हणजे तुम्हाकोअता उगड्यो जाइअलो 10 काहाके जो कोडु मागोहो; जो होदूत्लू त्याहा जोडत्लो; आना जो ठोकत्लू त्यांकोअता उगड्यो जाइअलो 11 तुमाआ माय एहलो कोठले आबहू होय का जेव्हा तिया पोऱ्या भाकर मागोईला त्याहा डोणो आपी आना मासे मागोईला ताहा मासाआ बोद्लाम त्याहा हाप आपे 12 किंवा इंडे मागोईला ताहा त्याहा विसीई आपी? 13 कोईत जेव्हा तुमु वाईट ओमेत सुद्धा आपाआ पोऱ्याहा हाजा वस्तु आपिला होमजतोलो ताहा होर्गाआ आबहाहा आपाआ मागनाराहा पवित्र आत्माआ काहा आपी नाहा 14 फाशे तो तीही मुकु दुष्ट आत्म्याहा काड्येहे, जाहा दुष्ट आत्माआ निहित गोल्यो ताहा मुकु गोगुहू लाग्यू ; आना माहुंहु आश्चर्य कोअया 15 पण त्यामरोत किबी जानोतांहि कोल्यो ओ ताहा शैतान नावोओ दुष्ट आत्म्याआ प्रधाना च्या मदतीवाही दुष्ट आत्माआ काडत्लू 16 बिहरा त्याआ परीक्षा कोइलाकोअता त्यापोरोत जुगोमोरत एक निशाणी मागिही 17 पण तिये त्याआ मोनोमरोत गोठी होमजीत त्याहा कोल्यो ज्या -ज्या राज्याम फुट ओते ते राज्य उजाड ओतगोल्यु जाहो ; आना ज्या कोअमे फुट पोडत्ल्ये ते नाश ओतगोल्यु जाहो 18 जर शैतान खुदोओ विरोधकोनारो ओतगोल्यु जानारू ताहा त्याआ राज्य केहलो बोणीत रोही? काहाके तुमु माआ विषयाम कोतले का ओ सैतानाआ मदतीवाही खराब आत्माआ काडत्लू 19 हाजो आय शैतान मदतीवाही खराब आत्माआ काडत्लू ताहा तुमाआ पोऱ्ये कोडाआ मदतीवाही काडीलोतेह्लाम? त्यापोत तोच तुमाआ न्याय कोअनारू 20 पोन जर आय परमेश्वराआ सामर्थ्यावाही दुष्ट आत्माहा काडत्लू ताहा परमेश्वराआ राज्य तुमापोओ आविलो गोये होय 21 जाहा बलवान माहुहू मअनारे बांधीत आपाआ कोआ राखिलो कोअत्लू तेहालाम त्याआ धनदौलत वासित रोनारे 22 पोन त्यापोरोत जाखा बलवान त्याआपो चोडिलो कोईत त्याहा जिकीत लेहो ताहा त्याआ ते आत्हार ज्यापो तिया भोरुसो ओतु मागित लेहो आना त्याआ धनदौलत मागित वाटीत आपोहो 23 जो माआरी नाहा तो माआ विरोधाम होय आना जो माआरी नाहा जो माआरी एखटो कोईत नाहा तो उदलावातलू 24 जाहा दुष्ट आत्माआ माअहोमारोत निहित जाहो तेहालाम उगाल्या जागाम आराम होदित फिरनारो आना जेव्हा मिलीअलो नाहा ताहा कोतली आय आपाआ त्याआ कोअमे जीहीरोत निहयू ओतू फिरीत जानारू 25 आना फासी आविलो तिये गोलीतपोड्ल्ये आना होबाड्ल्यो पाल्लये 26 ताहा तो जात आपाआकाजे खराब फासी सात आत्माहा आपाआरी घेऊन आवत्लू आना ती तीयाम वस्ती कोअत्त्लेएने तियाअ माहाआ फासाडीई परिस्थिती पेल्ल्यापोरोत वाईट ओतगोल्यु जाहो 27 जेव्हा तो याआ गोठी कोताच ओतु तेहालाम गर्दीमेऱ्यो उनाआ स्त्रीने वोडो शब्दावाही कोल्यो , धन्य होय ते पेट ज्याम तू रोला आना धन्य होय ते दुध ज्याहा तू सुहितलेदो 28 तिये कोल्यो ओ ; पण धन्य होय जे परमेश्वराआ वचन उनाईत आना मानतेहे 29 जाहा वोडी गोर्दी एकठे ओतगोल्यु जोमित ओती तेहालाम तो कोहू लाग्यू आव कालोओ मांहे वाईट होय ; ते चिन्ह होदतेहे पण योनाआ चिन्हाहा सोडीत बिहरे चिन्ह त्याहा आपिलू जानारू नाहा 30 जेहलो योना निनवेए माहाकोअता चिन्ह ठरवील्यु तेहलूज माअहा पोऱ्या पण आव कालामे माहाकोअता चिन्ह ठराविलो 31 दक्षिनाआ राणी न्यायाआ तेदीही आव टाईमोओ मांहाआरी उठित त्याहा दोषी ठरवीही काहाके ते सुलेमानाआ ज्ञान उनाएलाकोअता धारेतीई तीवोगरोत आवयी, आना पाला , इही तो होय जो शलामोपोरो वोडू होय 32 निनवेचे मांहे न्यायाआ तेदीही आव कालोंओ मांहाआरी उभे रोत त्याहा दोषी ठरवीही; काहाके तिये योनाआ प्रचार उनाईत मोन फिरवले ओते आना पाला इही तो होय जो योनाहुपोरोत वोडू होय 33 कोडो माहुहू दिवू लागाडी तल कोअमे किंवा माआपाआ निसे मेकीत नाहा पण देवठानिपोरोत मेकतलु म्हणजे कोअमे आवणाराहा प्रकाश मिळूहुजोवे 34 ताआ डीलाआ डोउ ताआ दिवू होय त्यापोत जेव्हा ताआ डोउ साप होय ताहा तांआ आखे डील पण प्रकाशाम होय पण जेव्हा तो वाईट रोतो तेहालाम डील पण आदाराम होय 35 त्यापोत सावध रोलो का जो प्रकाश तांआम होय तो आंधार बोनिलो नाहा 36 त्यापोत तांआ आखे डील प्रकाशाम जोवे आना त्याआ कोड्लाज भागुम आंधार रोंहु नाहा तेहालाम आखे एहलो प्रकाशाम उवे जेहलो तियाअ टायमोने ओते , जेव्हा दिव आपाआ उजवोडावाही ताहु प्रकाश आपित ओतु 37 जाहा तो गोगीत ओतु तेहालाम उनाआ परुश्याआ त्याहा विनंती कोअयी का मांही रोटू कोईओलो तो विसमे जात खाअलाकाजे बोहू 38 एदम्याआह ओ पालीत नवल वाटेम का तिये रोटू कोइलाआ आगाडी आथे गुडू तुव्या नाहा 39 प्रभूऊ त्याहा कोल्यो , ऐ परुश्याआ, तुमु ताठ आना वाटीतआव्यु बारथेरोत कोह्डीत्यले पण तुम्हामे आंधार आना खराब पणा पोअल्यी होय 40 ऐ मुर्खाआ, जीआ बारथे भाग बनविल्यो होय नाहाकोत तिये विसमे भाग बनविल्यो नाहा नाहाकोत 41 पोन ओ मायत्या वस्तूऊ तुमु दान कोईत दया ताहा पाला आखे किबी तुम्हाकोअता शुद्ध ओतगोल्यु जानारू 42 पोन ऐ पारुश्यानी तुमापो हाय! तुमु पोदिन आना सुदाबाचे आना जुदेजुदे कोयो पाताचा दहावू भाग आपत्ले पण आनु आना परमेश्वराआ प्रमाहा टालीत आपत्ले; जोवे ओते का याहा पण कोईत रोंहु जोवे ओते याहा सोदुहू नाहा ओते 43 ओ परुसी तुमापो हाय तुमु मंदिरोम मुख्य आसने आना बाजारामे नमस्कार कोईलाकाजे मागतेहे 44 हाय तुमापो काहाके तुमु नीकाईसरोल्या काब्राहोस होय जियीपो मांहे सालतेहे पण होमाजाडीत नाहा 45 तेहालाम उनाआ शास्त्रावाही त्याहा उत्तर आपिलू, ऐ गुरु , आव गोठीही कोल्यावाही तू आमुहू निंदा कोअत्लू 46 तिये कोल्यो तुमापो हाय तुमु एहेलू बोजो जो विसुंहु कठीण होय तो माहुंपो मेकात्ले पण तुमु स्वतः तियाअ वोजाआ आपाआ उनाआ आंगठीवाही पण स्पर्श कोईत नाहा 47 हाय तुमापो तुमु तियाअ भविष्य वक्त्यांआ कबरे बनवीतलो ज्याहा तुमाज आबहू दादाआ माईत टाक्ये ओते 48 कोईत तुमु साक्ष होय आना आपाआ बापदादाआ कामोम सहभाग होय ; काहाके तिये त्याहा माईत टाक्ये आना तुमु त्याआं कबरे बनवीतलो 49 यामुळे परमेश्वराआ ओक्कल पण कोल्यो होय आय त्याआ जागे भविष्य वक्ता आना प्रेषितांहा मोकलीही, आना ते त्याआ मेरोत केते जोह माईत टाकही आना किबी जनआ शळ कोअनारू 50 पाच त्यापोत जेवडो भविष्य वक्त्यांआ रक्त जुगाआ उत्पतीपोरोत वोहयो होय आखाआ हिशोब आव पिढीई महापरोत लेधलो जाइअलो 51 हाबेलांआ खुनापोरोत जखऱ्याआ खुनापोरोत जो वेदाई आना मंदिराआ माय घात कोल्योओ ओतु आय तुम्हामे खोरोज कोतलू याआ आखे गोठीही हिशोब याआ पिढीई माहापोरोत लेदो जाइअलो 52 पाच हाय तुमु शास्त्रापो तुमु ज्ञानाआ किल्ली लेदि होय पण तुमु स्वतः च प्रवेश कोल्योओ नाहा आना प्रवेश कोआनाराहा पण थोबाडीत मेक्ल्ये होय 53 पाच जाहा तो तिहीरोत निघाल्यू तेहालाम शास्त्री आना परुसी वाईट प्रकारे त्याआ फासाडी पोडीत गोये त्रास आपुहू लागाडीत का तो त्याआरी फासी गोगीला जोवे 54 पाच आना आव नदोम रोल्या एकजूट त्याआ सोबिई कोडलोतेबी गोठीकोता तोहू .