10
आव गोठी फासाड़ी येशूने सोत्त्तर आना मांहु नेमित आपिलू, आना ज्या -ज्या नगरोत आना जागापो तो स्वता: जानारू ओतु, तीइही त्याहा दोन-दोन कोईत आपाआ आगाडी मोक्ल्यीत 2 तो त्याहा कोल्यो , "पाकल्ये खेत जाखो होय , पण कामकोअनारे थोडो होय ; याकोअता ओनोओ धन्यावाहित आपाआ खेतोमे ओन वाडीलाकाजे कामकोअनारे मोकलित कोईत त्याआ प्रार्थना को 3 जा; पाला , आय तुमुहू मेंडराहा सारखो कोल्यामेहे आय मोकलित 4 कोईत नाहा खोतली मेहे नाहा खोली नाहा खाअडे ल्या ; आना नाहा सोडकोपो कोडाआ नमस्कार को 5 ज्या कोडला कोआत जावा , पहीले कोआ, "आव कोअमे शांती होय" 6 जर तीइही कोडु शांती लायकी होय , ताहा आमाआं शांती त्याआपो रोही , नाहा ताहा तुमाआ त्याही आविलो 7 त्याआ कोअमे रो , आना जे किबी त्यापोरोत मिले, तोच खा-प्या, काहाके मोजऱ्याहा आपाआ मोजरी जोडीहो जोवे; घरी-घरी नाहा फिरूहु 8 कोडला पण नगरोत गोल्यू, आना तिहीज माहे तुम्हामे मानोहो ताहा जे किबी तुमाआ आगाडी मेक्ल्ये जानारू तोच खा 9 तीहीई माआद्वाड्याआ हाजो को आना त्याहा कोआ, "देवोओ राज्य तुमाआ जागे आव्ये होय " 10 पण कोडोबीही नगरोत जा, आना तीहीई माहु तुमाआ तेईतले नाहा कोअनारू , ताहा त्याआ वाटेपो जात कोआ, 11 तुमाआ नगराआ धूळ पण, जी आम्हा गुडाहा लागीई होय , आमुहू तुमाआ आगाडी फोकडीत आपोहो; ताहा पण ओ होमजीत ल्या का देवोओ राज्य तुमाआ जागे आव्ये होय " 12 आय तुम्हामे कोतलू का ज्या तेदीही तियाअ नगराआ हालतवाही सदोम ची हालत जाखो सहन कोअलाआ हाजी उवे 13 "ओ खोराजीना! ओ बेथसैदा, सामर्थ्याचे काम तुम्हामे कोल्यु होय , जर ते सोर आना सिदोनमेहे कोल्यु जाहो ताहा तरह ओतगोल्यु आना खाओम बोहित आना पश्चाताप कोईत 14 पण न्यायाआ तेदीही तुमाआ पेक्षा सोर आना सदोम पेक्षा जाखो सहन कोअलाआ हाजो उवे 15 आना ओ कफर्णहूमा, नाहाकोत तू जुगापरोत उचो कोअल्यो जानारू ? तू ताहा अधोलोकाआ पर्यंत निसे जानारू 16 "जे तुमाअच उनाईत, तो माहु उनात्लू; आना जो तुम्हामे तुच्छ मोनोहो, तो माहु तुच्छ मोनोहो; आना जो माहु तुच्छ मोनोहो, तो माआ मोकलीनाराहा तुच्छ मोनोहो" 17 सात ते सोत्त्तर आनंद कोईत आव्ये आना कोहू लागाडीत , "ओ प्रभुजी, ताआ नावाआ पुते पण वंश माय होय " 18 तिये त्याहा कोल्यो , “आय सैतानाहो विजोहोस होर्गामरोत पोडेतेहलाम देखित ओतु 19 पाला, आय तीही हाप आना विसीई याहा तुडविलाआ, आना शत्रूऊ आखे शक्तीपो अधिकार आप्यू होय ; आना कोडला वस्तुआरी तुम्हामे किबी त्रास उवे नाहा 20 तेबी पण यापो आनंदाम नाहा ओवुहू का आत्माआ तुमाआ वंश माय होय , पण यापोरोत आनंदाम रो का तुमाआ नाव होर्गांम लेखिलो होय ” 21 त्याटायमोहो तो पवित्र आत्म्यामे पोईत आनंदाम पोयो, आना मनाहे, “ओ आबाहा, होर्ग्याआ आना पृथ्वी प्रभू, आय तांआ उपकाराआ मोनोहो का तू आव गोठीकोता समजूत बअणापोरोत निकाडीत मेक्ल्ये , आना पोऱ्याहा कोल्यो होय ओ आबाहा, काहाके ताहु एज इच्छा लागी 22 माआ आबाहाही माहु आखे किबी होपिल्ये होय ; आना कोडोबी मोलुम का पुत्र कोडू होय फक्त आबहू, आना आबहू कोडू होय कोडोबी मोलुम नाहा फक्त पोऱ्यानाहते आना तो ज्यापो त्याहा प्रगट कोअलाआ इच्छा होय ” 23 ताहा चेलाआ त्याही वोलीत कोल्यो , "धन्य होय ज्याहा डोआं, जे आव गोठी जे तुमु पालतेहे पालीलो होय 24 काहाके आय तुम्हामे कोतलू का जास्तीज संदेष्टा आना राजांई पालल्ये का ज्या गोठी तुमु पालतेहे न पाले, आना ज्या गोठी तुमु उनाईत उनाईलानतर न उनाई " 25 फासाड़ी पाला , एक शास्त्री उठ्यू आना कोत त्याआ परीक्षा लेऊ लाग्यू , ''ओ प्रभुजी, सार्वकालिक जिवनाआ वारीस कोईलाकाजे आय नाहाकोत कोहू ?" 26 तो त्याहा कोल्यो , "नियमशास्त्राम नाहाकोत लेखिलो होय ? तू तेहे वसत्लू?" 27 तिये उत्तर आपिलू, "तू देव आपाआ परमेश्वराआ आपाआ पुरो मोनोवाही आना आपाआ पुरो जीवाआ आना आपाआ पुरो शक्तीवांही आना आपाआ पुरो ओक्कल प्रेम को; आना आपाआ आरीकोरयापो आपाआ सारखो प्रीती को" 28 तो त्याहा कोल्यो , "तू आरी उत्तर आपिलू" ओच को ताहा तू जीवनामे रोही " 29 पण त्याआ आपाआ खुद : ला धोर्मी ठरविलं इच्छहावही येशुहू फ़ुस्ल्याआ, "ताहा माआ जागरयु कोडू होय ?" 30 येशूने उत्तर आपिलू, "एक मांहु यरूशलेमामेरोत यरीहाहा जात ओतु का चोरठ्याआ तोईत त्याआ आगडे काढीत लेधलो, आना माईत त्याहा आर्दूमोल्यू टाकीत निहित गोये 31 आना एहलो उवे का त्याआ सोडकोपो एक याजक जात ओतु, पण त्याहा पालहु बिहीरा सोडकोपो निहित गोल्यो 32 याच प्रकारे एक लेवी तियाअ जागापो आवयू, तो पण त्याहा पालहु बिहीरा सोडकोपो निहित गोल्यो 33 पण एक शामरोनी प्रवासी तीइही आवयू, आना त्याहा पालहु दया आवयी 34 इतो त्याआ जागे आविलो त्याआ जखमूहु तेल आना द्राक्षरस लागाडीत पट्ट्या बाधल्यो, आना आपाआ जनावरापो बोहाडीत उतार शाळाम घेऊन गोल्यो, आना त्याआ सेवा कोअयी 35 बिहरा तेदीही त्याआ बेन दिनार काढीत उतार शाळाआ मालकोहू आपिलू, आना कोल्यो , "याआ होंबाल को, आना जे किबी ताहु फासी लोग, ते आय फासी आवेताहा पोईत आपी" 36 ओमे ताआ ध्यानाम जो बांडोमे पोडीत ओतु, आव तीनु मायारोत तिया जागरयु कोडू ओतु?" 37 इतो कोल्यो , "तोज जिये त्याआपो दया कोअयी" येशू त्याहा कोल्यो , "जा, तू पण ऐह्लोज को" 38 जाहा ते जात ओते ताहा तो उनाआ गावून गोल्यो, आना मार्था नावोओ एक स्त्रीने त्याहा आपाआ कोआ हादाडये 39 मरिया नावोओ तीआ एक बोईहही ओती ती प्रभूउ गुडाही बोहित त्याआ वचन उनाईत ओती 40 पोन मार्था सेवा कोअता -कोअता घाबरील्यो गोयी, आना त्याआ जागे आविलो कोअहू लागीई, "ओ प्रभुजी नाहाकोत तुमु किबी चिंता नाहा कोअयी का माआ बोईहींही माहु सेवा कोइलाकोअता एखलीज मेकल्यी? यकोअता तीही कोआ का माआ मदत कोईली " 41 येशुई तीही उत्तर आपिलू, "मार्था, ओ मार्था; तू जाखो गोठी याकोअता चिंता कोअते आना बितले 42 पोन एक गोठी गरजेए होय , आना तो हाजू वाटा मरीयेअ निवडीत लेदो होय तो तिया पोरोत लेदो जानारू नाहा".