5
जाहा गोर्दी परमेश्वराआ वचन उनाएलाकोअता त्याजागे जात ओती, आना गनेसरेताआ तलावोओ किनारापो उबु ओतु, फासाड़ी एहलो उवे 2 का तिये तलावोओ काठी बेन नाव उबी मेकली देखल्यी, आना कोळी निसे उतरित जाली तुवीत ओते 3 तिया नावोमेरोत एक जो शिमोन नावाआ ओतु, सोडवीत तिये त्याहा विनंती कोअयी का किनारापोरोत थोड सेटे घेऊन साल तेहालाम तो बोहित माहुंहु मोचाण्यापोरोत शिक्षण आपुहू लाग्यू 4 जाहा ती गोठी कोत उवी तेहालाम शिमोनाहा कोल्यो , नीसेजा घेऊन साल, आना मासे तोईतलाकोअता जालो टाका 5 शिमोनने त्याहा उत्तर आपिलू, "ओ गुरुजी, आमुहू पुरो राती मेहनत कोल्यु आना किबी तोअये नाहा; तेबी तुमाआ कोअल्यावाही जाली टाकोहो " 6 जाहा तिये तेहलूज कोल्यु, ताहा जाखो मासे एखटो उवे, आना त्याआ जालो फाटू लाग्या 7 यापोरोत तिये आपाआ होबतीई जे बिहीरा नावापो ओते , कोल्यो का आविलो आमाआं मदत को, आना ते आविलो बेनु नावे इहिंजा पाअये का ते बुडहू लागाडीत 8 ऐ पालहु शिमोन पेत्र येशूउ गुडू पोडीत कोल्यो , "प्रभुजी, मापोरोत जा, काहाके आय पापी मांहु होय !" 9 काहाके एवडे मासे धरणाआ काहाके त्याहा आना त्याआ आरी ओते त्याहा खुप नवल वाटेम, 10 आना तेहलूज जब्दीचा पुत्र याकोब आना योहानाआ पण जे शिमोन आरी गोवाद्या ओते , थक्क उवोताहा येशुनी शिमोनाहा कोल्यो , "नाहा बित ; ओमे पोरोत तू माहुहुं जिवंत तोअही" 11 फासाड़ी ते नावोओ डेगार घेऊन आव्ये आखे किबी सोडीत त्याआ फासाडी चालीलो लागाडीत 12 तेहालाम तो उनाआ गावोम ओतु, ताहा तीइही कुष्ठरोग लागल्यो एक मांहु आवयू; आना तो येशुहू पालहु गुडू पोडीत आना विनंती कोअयी, "ओ प्रभुजी जर ताआ इच्छा होय ताहा माहु हाजो कोहू सेकतेहे" 13 तिये आथे आगाडी कोईत त्याहा स्पर्श कोल्यु आना कोल्यो , माआ इच्छा होय , तू हाजू ओतगोल्यु जावा "आना तिया कुष्ठरोग लागेज हाजू पोयो 14 फासाड़ी तिये त्याहा निक्षून कोल्यो , "कोडाआ नाहा कोहू , पण जात आपाआ खुद : ला याजकाहा देखाड, आना आपाआ हाजो उविलाविषयी जे किबी मोशेई नेमित आप्योत्यावाही त्याहा अर्पण को का त्याआपो साक्ष बोने 15 पोन त्याआ गोठी फासी फैलीत गोयी, आना गर्दीइ गोर्दी त्याआ उनाएलाकोअता आना आपाआ बिमारीमोरोत हाजो उविला याकोअता एकठे उवे 16 पोन तो जगलूम जुदो जात प्रार्थना कोईत ओतु 17 एक तेदीही एहलो उवे का तो शिक्षण आपित ओतु, आना परुशी आना शास्त्राध्याक तीइही बोहितरोलो ओते जे गालीलामे आना यहुदियाहा हरएक गावोमेरोत आना यारुश्लेमामोरोत आव्ये ओते , आना हाजो कोइलाकोअता प्रभूऊ सामर्थ्य त्याआ आरी ओती 18 आना पाला माहे एक मांहाहा जो लोखवू उवल्यु ओतु, खाटलापो लावीत आना ते त्याहा विसमे लेत जाहू आना येशूउ आगाडी मेकीईला प्रयत्न कोते ओते 19 जाहा गर्दीइ कारनोकोईत त्याहा माय नाहा घेऊन जाऊ सेकेले ताहा तिये कोओपो सोडवीत आना नाल्ये सेटे कोईत, त्याहा खटलाआरी विसमे येशूउ आगाडी उत्ताऱ्यो 20 तिये तिया विश्वास पालीत त्याहा कोल्यो , "ओ मांहु , ताआ पापापो क्षमा उवी होय " 21 तेहालाम शास्त्री आना परुशी वादविवाद कराय लागाडीत , "ओ कोडू होय जो परमेश्वराआ निंदा कोअत्लू? देवोहो सोडीत फासी कोडू पापापो क्षमा कोहू शकतो?" 22 येशूने त्याआ मोनाआ गोठी होमजीत, त्याहा कोल्यो , "तुमु आपाआ मोनामे नाहाकोत फूस कोईत होय ? 23 सोपो नाहाकोत होय ? नाहाकोत ओ कोअलो का "ताआ पापापो क्षमा उवी होय " पोन ओ कोअलो का "उठ आना चाल"? 24 पोन यकोअता का तुम्हामे होमजो का माहाहा पोऱ्याहा धोरतीपो पापापो क्षमा कोअलाआ पण अधिकार होय " त्याने तिया लाखवावालामेथू कोल्यो , "आय ताहु कोतलू, उठ आना आपाआ खाटलो विसित आपाआ कोआ निहित जा" 25 तो लागेज त्याआ आगाडी उठ्यू , आना ज्यापो पोडीतरोल्यु ओतु त्याहा विसित , देवाची स्तुती कोईत आपाआ कोआ निहित गोल्यो 26 तेहालाम आखे थक्क उवे आना देवाची महिमा कोहू लागाडीत आना जाखो घाबरील्यो कोइत्लु लागाडीत , "आज आमुहू ओनजानी गोठी देखल्यी!" 27 तिया फासाड़ी तो बारथे गोल्यो आना लेवी नावाआ एक जाकातदाराला जकातीइ नाकापो बोहीतरोल्यु पाल्यू , आना कोल्यो , "माआ फासाडी आव" 28 तेहालाम तो आखे सोडीत उठ्यू , आना त्याआ फासाडी गोल्यो 29 तेहालाम लेवीणे आपाआ कोअमे त्यांकोअता एक वोडी मेजवानी आप्यी ; जकतदाराआ आना बिहरे माहे जे त्याआ आरी रोटूखाहू बोह्ये ओते , एक वोडी गोर्दी ओती 30 यापोरोत परुशी आना शास्त्री त्याआ शिष्यांआ ओ कोत कुरकुर कोहू लागाडीत , "तुमु वासुलीदार आना पापी माहे काहा खाता-पितात" 31 येशूने त्याहा उत्तर आपिलू, "वैद्य हाजाकोअता नाहा ताहा, पण बिमाऱ्याकोता गरजेए होय 32 आय धार्मिकोअता नाहा, ताहा पापीही पश्चातापासाठी होदिलापो आवयू होय " 33 तिये त्याहा कोल्यो, योहानाआ शिष्य ताहा आरी उपास कोअता आना प्रार्थना कोईत रोत्ले, आना तेहलूज परुश्या शिष्य पण, पण तांआ शिष्य ताहा खाता-पितात" 34 येशू त्याहा कोल्यो , "नाहाकोत तुमु वेहवालाताआरी, जोपोरोत वारराजू त्याआ आरी रोही , उपास कोईतलेई सेकतेहे? 35 पोन ते दीही आविलो, तीयाम नवरदेव त्यामरोत जुदो कोल्योओ जानारू , तेहालाम ते तिया दिहोम उपास कोअनारू " 36 त्याआ एक फासी दाखलू पण त्याहा आखिलो: "कोडु मांहु नवो आंगडे फाडीत जन्या पोतदाहा ठिबकू नाहा लागाडीत, नाहा ताहा नवो फटीत जानारू आना ते ठिबकू जुनामेहे एखतेउवणारे नाहा 37 आना कोडु नवो द्राक्षरस जुनो बुधलाम नाहा पोईत, नाहा ताहा नवो द्राक्षरस बुदालाहा फटीत वोहीत जानारू आना बुधलाआ पण नाश उवे 38 पोन नवो द्राक्षरस नवो बुधलाम पोओयो जोवे 39 काडेलु मांहु जुनो द्राक्षरस पित नोवाआ इच्छा कोअत्लू काहाके तो कोल्यो होय , का जुनोज हाजू होय ".