13
जाहा तो मोंदीरोमेहे रोत नीह्तु ओतु ताहा त्याहा त्याआ चेलामेहेरोत एक जोंओ त्याह कोयु ऐ गुरू पाल केहला वोडा दोणा आना केहलु वोडू बोंगलू होय 2 आना येशूने त्याहा कोल्यो , तुमु आव वोडो मंदिराआ पालल्ते? एक डोणो पण सुटे नाहा जो पोडीत जानारू नाहा 3 जाहा तो मंदिराआ आगाडी जैतुनाआ डोगोपो बोहू ओतु तेहालाम पेत्र याकोब योहान आना आंद्रिया लेतजा एकांत त्याहा फ़ुस्ल्याआ, 4 आमुहू कोआ का याआ गोठी कोंयो उवे होय जेव्हा याआ आखे गोठी पुरो उवे होय ताहा याआ नीशाणी नाहाकोत रोही ? 5 आना येशु त्याहा कोहू लाग्यू , सावध रो , कोडु तुम्हामे ठोगीत कायना 6 केते माआ नावामेहे ते कोल्यो आविलो आय तोज होय आना ते कोअताजो ठोगील्यो 7 स जाहा तुमु लढाया विषयी उनाहा किंवा बातम्या उनाआनारू ताहा बित नाहा याआ गोठीही उवे आवश्यक होय तेबी पण तियाअ समयी अंत उवे नाहा 8 उनाआ जातीविरुद्ध बिहरि जात आना उनाआ राज्याविरुद्ध बिहरे राज्य उठित उभे रोही जास्तीज जाग्तली भूकंप उवे आना दुष्काळ पण पोडी याआ आखे गोठी वेदनांआ आना दुखोओ सुरवात उवे 9 पोन तुमु सावध रो , काहाके मांहे तुम्हामे सभास्थानामेहे लेत जानारू , मंदिरोम चापके देही तुमु माआवोजोसे अधिकाऱ्याआ आना राजाहा आगाडी साक्ष आपिलाकोअता उभे रोही 10 आना आवश्यक होय का पहीले आखे जातीमेहे सुवार्ता प्रचार कोअयी जोवे 11 जाहा ते तुम्हामे बंदी कोईत होफहोपिन आपी ताहा पेलरोत चिंता कोहू नाहा का आमुहू नाहाकोत कोअही पोनया तिया समयी तुम्हामे जे किबी आपिलू जाइअलो ते तुमु कोओलो होय काहाके गोगनारे तुमु नाहा पण पवित्र आत्माआ होय 12 पाही पायहोहो आना आबहू पोऱ्याहा च देउलाकोअता तोईत आपी आना पोऱ्ये आपाआ आयहि आबहाआ विरोधाम उभे रोत त्याहा माईत टाकही 13 आना माआ नावोवाही आखे तुमाआ द्वेष कोअनारू पण जो आखिर पर्यंत धीर तोईत रोही त्याआज तारण उवे 14 पोन जाहा तुमु "उजाड कोईत टाकही, एह्ली वस्तु पाल्हा, ताहा वासनारावाही होमजीत जानारू ताहा जे यहुदियाम होय तिये डोगोम नाहीत जायलो होय 15 आना जे कोओओ छत्तावर होय तिये निसे उतरुहू कायना आना किबी लेई कोअमे सुद्धा जाऊ नाये 16 आना जे खेतुम होय तिये आपाआ आगडे लेणेकोअता फासाडी वोलुहू कायना 17 पोन तिया धिकार होय जे तियाअ दिहोम गर्भवती रोही आना जे पोऱ्याहा दुध पिवाडीही 18 प्रार्थना को का ओ हियालाम ओवुहू कायना 19 काहाके ते दीही एहलो दुखामे होय जेहलो धारेतीई पेलेरोत ओमेजा उवे नाहा आना फासाडी ए खोरोज उवे नाहा 20 जर परमेश्वराने तियाअ दिहीहो कोम कोल्यु कायनाओतो ताहा कोडलो माहुहू वाचले कायनाओतो पण तियाअ निवडिल्यावांही त्याहा तिये निवडील्ये होय त्याकोअता ओ दीही कोम कोल्यु होय 21 तेहालाम जर कोडु तुम्हामे कोअही , पाला , ख्रिस्त इंही होय किंवा पाला तो तिंही होय ताहा विश्वास कोहू नाहा 22 काहाके खोटो ख्रिस्त आना खोटो संदेष्टे उठित उभे रोही आना जर शक्य उवे ताहा जे निवडील्ये होय त्याहा पण ठोगीत सेकतेहे आना त्याहा आश्चर्य काम आना चिन्हे देखाडीही 23 पोन सावध रोयला, पाला आय पहिलुच तुम्हामे कोत आपिलू होय 24 पोन तिया दिहोम तियाअ दुखोम , दिह काळा ओतगोल्यु जानारू आना चंद्र आपाआ उजाआलो आपी नाहा 25 आना जुगोमोरत तारे तुटीत रोही आना जुगाआ शक्ती आलाळीत जानारू 26 तेहालाम मांहे माअहा पोऱ्याहा वोडो वैभव आना गौरवासह जुगोम आविलावेले पलणारू 27 तिया टायमोमें ते आपाआ स्वर्गदूत ांनाआ मोकलित धारेतीई आव तीवोगरोत जुगोओ तियाअ टोकापोजा चारू साइतटूमे आपाआ निवाडीत एकठे कोअही 28 अंजिराआ साडोपोरोत ओ उदारहण हिकिलो जेव्हा त्याआ लोग कोमल ओतगोल्यु जाहो आना तीयाम पाने फुटहू लागत्ले तेहालाम तुमु जाईत लत्ले का उनालू जागे आवयू होय 29 ह्याप्रमाणे तुमु पण याआ गोठी उवेताहा पालीलो ताहा होमजीत लेअलो का तो दीही जागे आवयू होय नहाते बाअणापो तो आवयू होय 30 आय तुम्हामे खोरोज कोतलू का , जोपोरोत याआ आखे गोठी पुरो उवनारा नाहा तोपोरोत ए पिढी नष्ट उवे नाहा 31 जुग आना धोरती नाहाएह्ली ओतगोल्यु जानारू पण माआ वचन रद्द उवे नाहा 32 पोन तो दीही किंवा वेलाआ विषयाम कोडोबी मोलुम नाहा स्वर्ग दूतो नाहा आना पोऱ्याहा पण नाहा फक्त आबाहाल मोलुम होय 33 सावध ओतगोल्यु जा, जागतू रो आना प्रार्थना को काहाके तुम्हामे मोलुम नाहा का तो ठराविक वेल कोंयो आविलो 34 ओ आव मांहाहोस होय जो आपाआ को सोडीत प्रवासाम गोल्यो आपाआ नोकराहा अधिकार आपित तिये आखाहा आपाआपा काम कोल्यो आना बाआणु रखवालाहा पण जागतू रोइलाकोअता कोल्यो 35 त्यापोत जागतू रो काहाके तुमाआ मालिक अथवा आविलो होय हांजेपो, राती , कुकडू आवरण्याआ टायमोमें किंवा वेगीई 36 केधी एहलो उवूंहू नाहा का अचानक तो आविलो जानारू आना तुम्हामे हुवतले पलणारू 37 आना जे आय तुम्हामे कोतलू तोच आखाज कोतलू, “जागतू रो. ”