9
तो त्याहा कोयु तुमुह खोरोज कोहो का जो ईही ऊबे होय त्यामरोत एखु ऐहलू होय का जाहा परमेश्वर राजाआ सामर्थ्य आवल्यु ने देखीत लेय ताआ हु जाआ मोइलाआ होवाद कोदाचीत ने चाखे 2 सहा दिहे फासाड़ी येशू लेतजा पेत्र आना याकोब आना योहान याहा आरी लेधलो, आना एखालाम कोडला उनाआ डोगोपो लेत गोल्युतीही त्याआ आगाडी त्याआं रूप बोद्लीत गोये , 3 आना त्याआ आगडे एहलो सोमकूहु लागाडीत का इही पर्यंत उजाआलो आवयू, का पृथ्वीपो एगदू थोबी पण एहलो उज्वल नाहा कोहू शकत 4 आना त्याहा मोशे आरी एलिया देखायू ; ते येशू आरी गोठी कोहू लेहे ; 5 आव याकोअता पेत्रने येशू ला कोल्यो , "ओ रब्बी , आमुहू इही रोहिलो हाजो होय : यकोअता आमुहू तीन मंडप बानडह; एक ताआ याकोअता, एक मोशे याकोअता आना एक एलिया याकोअता" 6 कोईत का तो नाहा होमाजाडीत ओतु का नाहाकोत उत्तर आपे , याकोअता का ते घाबरील्यो गोये ओते 7 ताहा उनाआ वादलावाही त्याहा घेरले, आना तियाअ वादलामरोत ओ शब्द निघाल्यू , "ओ माआ प्रिय पुत्र होय , त्याआ उनाआ " 8 तेहालाम तिये उनाआ चारू सेटे नजर कोअयी, आना येशुहू सोडीत आपाआ आरी आना कोडोबी पालील्यो नाहा 9 डोगोपोरोत उतरीलावेले तिये त्याहा आज्ञा कोअयी का जो पर्यंत माअहा पुत्र मोईला मायारोत जीवतो न उवे जो पर्यंत तुमु जे किबी पालील्यो होय ते कोडोबी कोओलो नाहा 10 तिये आव गोठीकोता स्मरण मेक्ल्ये ; आना आपु आपसामेहे वाद -वाद कोहू लागाडीत , "मोआल्या मायारोत जीवतो उठवाआ नाहाकोत आर्द होय ?" 11 आना तिये त्याहा फ़ुस्ल्याआ, "शास्त्री काहा का एलीयाचे पही कोअते आविला गरजेए होय ? 12 तिये त्याहा उत्तर आपिलू, "एलिया खरोज पहीले आवीत आखे किबी हुदारे पण माहाहा पुत्राच्या विषया माय ओ काहा लेखिलो होय तो जाअखो दु: ख वीसही, आना मारीलो जाइअलो? 13 पोन आय तुम्हामे कोतलू, का एलिया ताहा आवयू होय , आना जेहलो त्याआ विषयी लेखिलो होय , त्याहा जे जोवे त्याआ आरी कोल्यु" 14 आना तो शिष्या आरी आवयू, ताहा पहीले का त्याआ आरी एक वोडी गोर्दी जोम्यी होय आना शास्त्री त्याआ आरी वादविवाद कोईत होय , 15 त्याहा पालताज आखे जाखो आश्चर्य कोअला लागाडीत , आना त्याआ त्याही गुगदिलो आवीत त्याहा नमस्कार कोल्योओ 16 तिये त्याहा फ़ुस्ल्याआ, "तुमु यांआरी नाहाकोत वाद -वाद कोईत होय ?" 17 गोर्दी मायारोत एकाने उत्तर आपिलू, "ओ गुरु , आय आपाआ पोऱ्याहा, यामे मुको आत्माआ फोह्यू होय , ताआ त्याही लेतआवये उवनारा 18 जीही कोठे ती त्याहा तोए , तिहीज सेलीत आण्यो: आना तो सोबाडीम फेस लेतआवलू आना दात पिसायलाकोअता लागत्लू आना उगाईत जाहोआंय ताआ शिष्यांआ कोल्यो का ते त्याहा काढीत टाकीदेय, परंतु ते काड्हु सेकेले नाहा" 19 ओ उनाईत तिये त्याहा उत्तर आपित कोल्यो , "ओ अविश्वासी माहे , का केधी पर्यंत ताआ आरी रोही? त्याहा मांही लेतआव " 20 तेहालाम ते त्याहा त्यांही लेत आव्ये: आना तिये त्याहा पालील्यो , ताहा तियाअ आत्मावांहि लागेज त्याहा निपटी टाक्ये; आना तो धरतीपो पोडीत, आना सोबिमरोत फेस गोलिलावेल निहित गोल्यो 21 तिये त्याआ आबाहाहा फ़ुस्ल्याआ, "याआ ए हालत केधी पोरोत होय ?" तिये कोल्यो , "हानू पणापोरोत 22 तिये याहा नष्ट कोइलाकोअता याहा अधी आगीम ताहा केधी पाअयोम पाडिलो ; परंतु केधी किबी कोहू गोयो, ताहा आमापो आपा कोईत उपकाराआ को" 23 येशू लेतजा तिया कोल्यो ; केधी तू कोहू सेकेहे ? ए नाहाकोत गोठी होय ! विश्वास कोइलाकोअता आखे किबी उवहू शकत" 24 पोऱ्याआ आंबहाही लागेज विनंती कोईत कोल्यो , "ओ प्रभू आय विश्वास कोअत्लू, माआ अविश्वासाआ उपाय को" 25 जाहा येशूने पालील्यो का माहे गुगदिलो आवीत गोर्दी कोईत होय , ताहा तिये अशुद्ध आत्म्याहा ओ कोत धमकाव्ये "ओ मुक्यो बोयरा आत्मू आय ताहु आज्ञा आपोहो, त्याआ मायारोत निहित जा आना त्यामे केधीज प्रवेश कोहू नाहा" 26 तेहालाम तो आयडीत आना त्याहा जाखो निपटी निहित गोल्यो; आना मोल्याहोस तारखू पोयो, आव पर्यंत का जाअखो माहे कोहू का तो मोईत गोल्यो 27 पोन येशूने तिया आथे तोईत त्याहा उठविले, आना तो उबु रोत गोल्यो 28 28 जाहा तो कोअमे आवयू, ताहा तिया शिष्यांनी एखालाम त्याहा फ़ुस्ल्याआ, "आमुहू त्याहा काहा काढहु शकलो नाहा? 29 तिये त्याहा कोल्यो , "ए जात बिना प्रार्थनांवाही कोडला फासी उपायाने नाहा निहित जात 30 कोईत ते तिहीरोत निहित गोये , आना गालीलामधून जातले ओतोऱ्याआ इच्छा नाहाओती कोडाआ मोलुम रोहू, 31 कोईत तो आपाआ शिष्यांआ संदेश आपोहो आना त्याहा कोल्यो ओतु, "माअहा पुत्र, माहाहा ओतु कोईत तोईत जाइअलो, आना ते त्याहा माईत टाकही; आना तो मोईला तीन दिहोनंतर उठाडीलो जाइअलो" 32 पण ए गोठी त्याआ लक्षाम नाणी आवयी, आना ते त्याहा फुसिलाकोअता बित ओते 33 फासाडीनंतर ते कफरनुहुम माय आवयेएने कोअमे आवीत त्याहा फुसल्ये, "वातेम तुमु कोडला गोठीपो वादविवाद कोअता ओते ?" 34 ते ठावकू रोल्या, काहाके रस्ताम तिये आपसामेहे ओ वाद -वाद कोअता ओते का आम्हा पेक्षा वोडू कोडू होय 35 तेह्लाम तिये बोहित बाराजोंहू हादिलो आना त्याहा कोल्यो , "केधी कोडु वोडू उवूंहू पालत्लू, तो आखाम हानू आना आखाआ पावर बोनल्यो" 36 आना तो एक पोऱ्याहा लेत त्याआ माय उबु कोईत आप्यू आना त्याहा मांडित लेत त्याहा कोल्यो , 37 "जो कोडु माआ नावामेहे अश्या पोऱ्यामरोत कोडाआ उनाआ पोऱ्याहा ग्रहण कोतलू, तो माहु ग्रहण कोतलू; आना जो कोडु माहु ग्रहण कोअत्लू तो माहु नाहा, पण माहु मोकलीनाराहा ग्रहण कोतलू" 38 तेह्लाम योहानाई त्याहा कोल्यो , "ओ गुरु , आमुहू उनाआ मांहाहा ताआ नावामेहे द्र्ष्टआत्म्यांहा काडीओलो पालील्यो आना त्याहा 39 जेते नाहा कोअला लाग्यू , काहाके तियाअ आम्हा फासाडी नाहा आवयू ओतु" 40 येशुउ कोल्यो , "त्याहा नाहा कोहू नाहा ; काहाके एहेलू कोडूच नाहा जो माआ नावामेहे सामर्थ्याआ काम कोअही, आना वेगुज माहु वाईट कोडु गोयो, 41 काहाके जो कोडू एक वाटकी पाई याआकोअता पीवाडे तो मसीही आय तुमुह खोरोच कोहो का आपाआ प्रतीफोल केहला प्रकारे बी ने गोमावे 42 जो कोडु आव हठ्या मायारोत मापो विश्वास कोअता, कोडाआ ठोकायू पोचाळीओत ताहा त्याआ याकोअता ओच भल होय का एक वोडो कोअटाहा पूड त्याआ गोलामेहे लोटकाड्यू जावा आना त्याहा समुद्राम टाक्ये जालो 43 केधी ताआ आथे माहु ठोकायू पोचाळीओत ताहा त्याहा वाडीत टाकव्यंग होतगोयो जीवनामे प्रवेश को ताकोअता याआरोत हाजो होय का बेन आथे ओमेत नरकाआ आगटाआमेहे मेकल्या जाइअलो जी केधीज विजनार नाहा 44 जीही त्याआ किडू ने मोअत्लू आना आग ने उलात्ल्यी . 45 केधी ताआ गुडू ताहु ठोकायू पोचाळीओत ताहा त्याहा काढीत टाकलगडा होतगोयो जीवनामे प्रवेश को ताआ याकोअता याआरोत भल होय का बेन गुडू ओमेत नरकाआ टाक्ये जाथ 46 जीही त्याआ किडू मोअत्ल्यु आना ने उलाअत्ल्यी . 47 केधी ताआ डोउ ताहु ठोकायू पोचाळीओत ताहा त्याहा काढीत टाकचकणा होतगोयो परमेश्वराआ राज्याम प्रवेश कोअला ताआ याकोअता याआरोत भल होय का बेन डोआं ओमेत तू नरकाआ टाक्यू जाइअलो 48 जीही त्याआ किडा मोईत नाहा आना आगी उलवित नाहा 49 काहाके हरएकजो आगीवाही खाराम जोड्या जाइअलो 50 खारो हाजो होय , पण खाराम चव जीत होय ताहा, तो त्याहा किहांवाही खाराम चव लावता आवे आपामे खारो मेका , आना आपसामेहे मिलून मिलीलू रो ".