6
तीहीरोत नीहीत कोईत ते त्याआ देसोमेहे गोये आना चेले 2 जेव्हा शब्बाथ दीही आवयू तिये प्रार्थने सभाम जात संदेश आपिला सुरवात कोअयी त्याआ संदेश उनाईत जाखो माहे आश्चर्यचक्कित उवे ते कोल्यो , याहा ओ आखे किबी कोरात जोडयो उवे? नाहाकोत ओ ज्ञान आपिला आव्ये होय , आना याआ आथे केवडी ए महत्कृत्ये ओये 3 जो हुतार जो मरीयेचा पोऱ्या आना याकोब, योसे, यहुदा आना शिमोन याआ जो पाही तोज ओ होय ने ? आना याआ बोहीही इंही आपाआरी होय ने ? एहलो ते त्याविषयी अडखळले 4 ताहा येशु त्याहा कोल्यो , संदेष्टाआ सन्मान उवनारा नाहा एहलो नाहा पोन त्याआ त्याहा त्याआ कोरयाम अथवा त्याआ कोओहो मोद्लीम तिया सन्मान उवनारा नाहा 5 थोडोज बिमारयारी आथे मेकीत तिये त्याहा हाजो कोयायाशिवाय बिहरे कोढलाभी महत्कृत्ये त्याहा तिंही कोअता आव्ये नाहा 6 त्याआ अविश्वासोवाही त्याहा आश्चर्य कोअ यो फासाड़ी तो शिक्षण आपित गाव -गाव फिर्यु 7 फासाड़ी तिया बारा जोह जागे हादीत तो त्याहा जोडीजोडीवांही मोकलीत लाग्यू तिये त्याहा अशुद्ध आत्म्यावर अधिकार आप्यू 8 आना त्याहा आज्ञा कोअयी का वाटेकोअता काठी वासित बिहरे किबी लेऊ नाहा रोटा, सोली कमर क्याहाम पोशा लेऊ नाहा 9 तेबी खाअडे कालीत चाल्यो, बेन अंगरखे कालहू नाहा 10 आना तो त्याहा कोल्यो तुमु किहीबी एकदाआ कोआ उतरीलो तेहालाम ते ठिकाण सोदेतांहुंजा तिहीज रो 11 आना ज्या जागापो तुमाआ स्वागत उवे नाहा आना जीही माहे तुमाआ उनाआनारू नाहीत तिहीरोत निहतावेले त्याहा साक्ष जोडीत कोईत आपाआ तल्वाआ धूळ तिहीज फोकडीत टाका 12 ते तिहीरोत निकलीलू आना माहु पश्चाताप कोईओलो एह्ली तिये घोषणा कोअयी 13 खूप पुते काढीलो आना अनेक रोगी तैलाभ्यंग कोईत हाजो कोल्यु 14 हेरोद राजाविषयी उनाअयो , काहाके येशूचे यश निवडील्ये आखे जागापो गाज्ये ओते किबी माहे कोल्यो , बाप्तिस्मे आपणारो योहान जिवंत होयत्याकोअता त्यामे महत्कृत्ये शक्तीवांही काम कोईत होय 15 बिहरे माहे कोल्यो , "तो एलिया होय , किबी माहे कोल्यो ओ संदेष्टा होय , म्हणजे संदेष्टापैकी च एक होय 16 पोन हेरोद राजाआ जेव्हा उनाअयो तेहालाम तो कोल्यो , “योहान, ज्याआ आय मान काढीलो ओती तो जिवंत पोयो होय ” 17 आपाआ पाही फिलीप्प याहा लाडी हेरोदिया यीआगाडी हेरोदावाही स्वतः मांहे मोकलित योहानाआ तोईत कैदेत सिपडीत मेक्ल्ये ओते काहाके हेरोदावाही यीआरी वेहवाल कोल्यु ओते 18 आना योहान त्याहा कोयो एहलो, तू आपाआ पायहोओ लाडी मेकजी ओ सशास्त्र नाहा 19 याकोअता हेरोदिया त्यांपो डाव तोईत तिया वध कोईलाकाजे पालीत ओती परंतु तीई किबी नेसाल्तु 20 काहाके योहान नीतिमान आना पवित्र माहु होय ओ जाईत हेरोद त्याआ बित तोए आना त्याआ रक्षण कोआ , तो त्याआ गोठीको उनाय तेहालाम जाअखो गोंधळूम जाय तेबी त्याआ कोईओलो उनाईत लेअली 21 फासाड़ी एक सोयीचा दीही आवयू तेहालाम हेरोदावाही आपाआ वाढदिवशी आपाआ प्रधान, सरदार आना गालीलामे प्रमुख माहे याहा मेजवानी आप्यी 22 आना हेरोदाआ पोर्या नासिलो कोल्यु त्यापो आवल्या आखे प्रधान पवनु खुश उवे त्यापो हेरोदावाही तीही कोल्यो , “मांग, जे ताहु हवे होय , आय ताहु ते आपी” 23 फासी तो तीही वचन आपित कोल्यो , माआ आर्धोज राज्य सुद्धा जे किबी तू मांगनारू आय ताहु आपी 24 त्यापो ती बारथे जात आपाआ आयहींहि आवयी तीही फ़ुस्ल्याआ, माहु नाहाकोत मागल्यो जोवे तेहालाम तीआ आयहि तेकोहे , बाप्तिस्मे आपनाऱ्या योहानाआ मुंडको 25 तेहालाम ती लागेज गुगदीत जात राजाआरी आवयी आना तेकोहे , 'माआ इच्छा होय का बाप्तिस्मे आपनाऱ्या योहानाआ मुंडको ओमे ताटूम आपिलो' 26 त्यापो राजा जाखो दुखी पोयो परंतु आपाआ वचन आना आपाआ कोआ आवल्या माहामे तो तियाअ पोरीही नकार आपुहू शकला नाहा 27 आना राजा आज्ञा आप्यी का योहानाआ मुंडको लेतआवे एहलो उनाआ शिपायाहा कोल्यो , "जेलूम जात योहानाआ मुंडको वाड्यो' 28 आना त्याहा ताटूम मेकीत तियाअ पोरीही आपिलू आना तियाअ पोर्या आपाआ आयहीही आपिलू 29 जाहा योहानाआ शिष्याने ए बातमी उनाई तेहालाम ते आव्ये आना त्याआ प्रेत कबरेम मेकल्यी 30 ह्यानंतर प्रेषित येशुआरी आव्ये, आना आपु जे -जे कोल्यु आना जे -जे हिकाड्ये ते आखे येशुहू कोल्यो 31 तेहालाम तो त्याहा कोल्यो , तुमु जंगलूम एकलुज साला आना थोडू विहाव ल्या काहाके तिंही खूप माहे आवीत जात होयकोत त्याहा खाअलाकाजे त्याहाभी वेल मिलीअलो नाहाओती 32 ताहा ते नावामोरोत तिवोल एकांत जाग्तली गोये 33 माहु त्याहा निहतावेले पालील्यो आना खूप जानोतांहि त्याहा ओलखे आना तिहीई आखे गावोमेरोत माहे पागेच निकल्ये गुगदीत जात त्याआ आगाडी तीही पोतले 34 येशु नावामोरोत उतरीलो ताहा तिये माहुहु एक वोडी गोर्दी देखल्यी ते ताहा मेंढवालो नेसलेल्या मेंढाहोस ओते कोईत त्याहा त्याआ किरवाय आवयू आना तो त्याआ आख्याज गोटीविषयी शिक्षण आपुहू लाग्यू 35 दीही वारुज उतरीकोई त्याआ त्यांही चेले आव्ये आना कोल्यो , ए अरण्यात जागू होय आना दीही ओमे जाअखो उतरीलो होय 36 ताहा माहु आजुबाजू गावोमेहे जात स्वतः कोअता खाकोता किबी लेदलेए कोईत त्याहा जाऊ आपिलो 37 तिये त्याहा उत्तर आपिलू, तुमुज त्याहा खाकोता दया ते त्याहा कोल्यो नाहाकोत जात बेनहोव रुपयाआ रोटा वेसातो घेऊन त्याहा खाकोता आप्या? 38 तो त्याहा कोल्यो , तुमाआ जागे केतो रोटा होय ? जात पाला , देखल्यापो ते त्याहा कोल्यो , पाच रोटा आना बेन मासे 39 फासाड़ी तिया आखे महाहा नीला चारापो ओ गोटा गोटा मेहे बोहाडीत दया कोल्यो 40 ताहा ते होव- होव आना पन्नास- पन्नास एहलो लाईन -लाईन लेतजा बोह्ये जणू नाहाकोत वाफेच! 41 फासाड़ी तिये तियाअ पाच रोटा आना ते बेन मासे घेऊन उपो स्वर्गामेहे पालीत आशीर्वाद आप्यू आना रोटा तोड्या तियाअ त्याहा वोदिलाकाजे आपाआ शिष्यांआ आप्या ते बेन मासेभी आखाम वाटीत आपिलू 42 आना आखे खात तृप्त उवे 43 आना तिये उरील्योओ तूकडआ बारा टोपल्या पोईत लेदिओलो आना माहाआ तुकडाभी लेतगोल्ये 44 जे रोटा खाणारा पाच हजार माहे ओते 45 फासाड़ी आय माहुगोदीही जाहू कोतलू, आना तुमु नावूमे बोहित तिवोल बैथसैदा इंही जा एहलो कोत तिये लागेज शिष्यांआ जाहू कोल्यो 46 फासाड़ी माहुंहु जाहू कोत तो प्रार्थना कोईलाकाजे डोगोपो गोल्यो 47 आना रात उवी तेहालाम ते नाव समुद्राआ विसमे पोती ओती आना येशु एखल्यू धरतीपो ओतु 48 त्याहा ते आवाज माईत -माईत हैरान उवे होय काहाके वारू जोरे मुयाआ आवीत ओतु फासाड़ी राती चौथो प्रहाराच्या सुमारास तो समुद्राम पाण्यापो चालते त्याआरोत आवीत ओतु त्याआ जागेरोत आगाडी जाण्याआ बेत ओतु 49 पोन त्याहा पायापोरोत सालत्लू पालीत ओ पूत होय एहलो त्याहा लाग्यो आना ते आअडीलो 50 काहाके त्याहा पालीत ते आखे बितगोये ओते ताहा तो लागेज त्याआरी गोगू लाग्यू आना त्याहा कोयो धीर तोआ आय होय 51 आना तो त्याआरोत नावूमे सोडवीत गोल्यो ताहा वारू ठावकू पोयो फासाड़ी ते मोनोमेऱ्यो मोनामे पराकाष्ठतेवांहि आश्चर्यचक्कित उवे ओते 52 काहाके रोटीही गोठी त्याहा उमगली नाहाओती त्याआं अंतकरण कठीण उवे ओते 53 नंतर ते तिवोल जात गनेसरेताच्या किनारापो पोतले आना तिये नाव बांधीत मेकल्यी 54 ते नावामोरोत उतरताच माहु त्याहा ओलखे 55 आना ते आसेपासेए भागुम सारीआर धावपळ कोईत फिऱ्ये आना जीही कोठे तो होय कोईत त्याआ कानुम आव्ये, तिंही -तिंही ते दुकनाराहा खाटलापो कालीत त्यांही आवहू लागाडीत 56 तो खेडापाडाम नगरोत किंवा खेत मोलाम किहीबी जावा , तिंही ते दुकनाराहा पो बाजारामे लेतआवीत मेकीत आना आपाआ आगडाहां तेबी स्पर्श कोहू दया एहलो त्याहा विनंती कोईत आना आपारी त्याहा स्पर्श कोईत तेतोज हाजो उवनारा.