13
1 Kʋ máŋá tə wa,Nabuliyii wá pwin kʋ nan,
sə kʋ nɩ́á sɩ̀n Davidə dìə̀ tə,
də Zwerizalɛmə tɩ̀án cʋna tə, də ba durən tə.
Woŋwanan tə, də kʋ̀nkʋ̀n Yɩɩ nii sʋ̀sʋ̀nà tə wá jɛ́n lʋʋ nii tə wa
2 Ba-Yígúrə́-Jə-Tiu, ʋ nə yɩ kwatara Yɩɩ nii sʋgʋ nə:
«Kʋ máŋá tə wa, à wá pa woŋwanan tə nyʋn lʋʋ nii tə wa,
sə ba kʋ́ʋ̀ dàn ká lìí tə yoo.
À tə wá pa kʋ̀nkʋ̀n Yɩɩ nii sʋ̀sʋ̀nà tə də jɛ́n lʋʋ nii tə wa, də ba durən jə̀rə́.
3 Lìù nə pìí ʋ swɩ̀n Yɩɩ nii sʋ̀ràn,
kʋ tíú tətə nuu də ʋ nyɩna wá swɩ̀n ʋ con, ba wʋ́:
N mɛ sə n tɩ,
cɩ́gá, kʋ yɩ kʋ̀nkʋ̀n yìə̀n nə n swɩ̀n,
kʋ twá də Ba-Yígúrə́-Jə-Tiu yɩrɩ tə.
Yá kʋ tíú tətə nyɩna-ba nə wá mà wá ba gʋ,
máŋá tə wa, ʋ nə wulə ʋ swɩ̀n Yɩɩ nii yìə̀n.
4 Kʋ máŋá təntə wa,
cavɩra wá ja Yɩɩ nii sʋ̀sʋ̀nʋ̀ mama,
sə ʋ swɩ̀n Yɩɩ nii sʋ̀ràn,
nə à yə̀ə́ sə ʋ man kʋ tə, ʋ nə nɩ nɩʋn wa, ʋ bɩrɩ.
Ba kʋ́ʋ̀ bá zʋ vàná kʋran ganzwɩʋ, sə ba ma gɩgarɩ lɩ̀à.
5 Yá ba lìù mama wá swɩ̀n, ʋ wʋ́:
À tà Yɩɩ nii sʋ̀sʋ̀nʋ̀, à yɩ valʋ.
À zandwan mama, à jə tɩa.»
6 Ba dàń wá bwe wá, ba wʋ́:
Bɛ̀ɛ̀ cwara nə wulə n jɩ̀àn nə?
Ʋ wá le, ʋ wʋ́:
Kʋ yɩ à nɩ tə à dabara dìə̀ wa.»
Kwatara sɩ̀ʋ́ yoo
7 Ba-Yígúrə́-Jə-Tiu, ʋ nə yɩ kwatara Yɩɩ nii sʋgʋ nə:
«Kwatara sɩ̀ʋ́, zàn n zɩgɩ à payɩrʋ tə,
də à twadon tə nə.
Gʋ payɩrʋ tə,
yá pee tə wá laga duən yáá nə.
À wá ta à zɩgɩ pəbii tə də tətə nə.»
8 Ba-Yígúrə́-Jə-Tiu nii sʋgʋ nə:
«Lʋʋ nii tə wa lɩ̀à tə nə pwɛ̀ púlə́ batwa,
púlə́ bələ wá tɩ,
púlí nədʋ ga ya lʋʋ wa.
9 À wá kə púlí nədʋ təntə mən wa,
à nyɩan ba, ndə ba nə nyɩŋa wárʋ́ nətʋ,
à ga pɩ̀rɩ̀ ba, ndə ba nə pɩ̀rɩ̀ sɩ́án.
Ba mʋ̀ dàń wá bon ba kə à nə,
yá à də dàń wá le ba.
À wá swɩ̀n də ba mʋ̀ nə yɩ à lɩ̀à,
yá ba də wá swɩ̀n də à mʋ̀ Ba-Yígúrə́-Jə-Tiu nə yɩ ba Yɩɩ.»