Ba-Yígúrə́-Jə-Tiu wá jon Zwerizalɛmə tɩʋ tə
12
1 Bwə̀rə́!Ba-Yígúrə́-Jə-Tiu sʋgʋ tə yɩ Yɩzərayɛlə lɩ̀à con nə kʋ swɩ̀n.
Nə̀ń Ba-Yígúrə́-Jə-Tiu,
ʋ nə fwa lanworu tə,
ʋ ga tún tɩa tə dəkuu, nii sʋgʋ.
Ʋ mʋ̀ nə fwa siŋu tə,
kʋ nə wulə ləzwənə waa: 2 «À wá pa Zwerizalɛmə ya ndə wùrú zʋŋa nə, ka nə súə́ də à lɩŋa divɛn tə. Kʋ wá pa yiviru dwíə́ tə mama nə, tə nə kɩkarɩ kʋ. Yiviru tə wá ja Zwida dwíí tə mama, máŋá tə wa, ba nə wá ta Zwerizalɛmə. 3 Kʋ máŋá təntə wa, à wá pa Zwerizalɛmə ya ndə kapan nə, kʋ nə du, kʋ ga wàrɩ̀ kʋ zɩ̀n. Lìù tə mama ʋ nə wá dídə́n sə ʋ zɩ̀n kʋ, wá tún nʋʋ ʋ tɩ̀àn yɩra. Yá tɩa yuu dwíə́ tə mama wá kun duən nə, ba zɩgɩ Zwerizalɛmə tɩʋ tə nə. 4 À mʋ̀ Ba-Yígúrə́-Jə-Tiu nii sʋgʋ nə! Kʋ máŋá təntə wa, à wá pa fən zʋ səsen tə, yá səsədɩra tə wá jì nyɩnyanan. À wá ywàń Zwida dwíí tə yuu nə, yá à ga pa dwíə́ nəkaran* tə səsen tə jì lilirən. 5 Zwida dwíí yáá tɩ̀án tə wá swɩ̀n ba waa con, ba wʋ́: «Zwerizalɛmə tɩ̀án dɩ̀àn tə yɩ tə naŋa Ba-Yígúrə́-Jə-Tiu, ʋ nə yɩ kwatara Yɩɩ con, ʋ nə yɩ ba Yɩɩ.» 6 Kʋ dɩɩn təntə nə, à wá pa Zwida dwíí yáá tɩ̀án tə ya ndə mən nə, tə nə kwé pún titəŋi wa, nə à yə̀ə́ ndə málɩ́ mənvwə nə mɩna wa. Tə wa də́ jɩzən də jɩgwiə dwíə́ tə mama, tə nə kɩkarɩ ba. Yá Zwerizalɛmə tɩ̀án mʋ̀ tə wá ya Zwerizalɛmə wa. 7 Ba-Yígúrə́-Jə-Tiu wá dí yáá ʋ jon Zwida dwíí lɩ̀à tə, sə Davidə dwíí tə, də Zwerizalɛmə tɩ̀án tə dàn ká bʋ́n də, ba kʋ́kwà Zwida dwíí lɩ̀à tə. 8 Kʋ dɩɩn təntə nə, Ba-Yígúrə́-Jə-Tiu wá pú Zwerizalɛmə tɩ̀án yuu nə. Ba wa labwana tə wá jì ladɩra ndə Davidə nə, yá Davidə dìə̀ lɩ̀à tə wá ya ndə Yɩɩ nə, kʋ pa ba, ndə Ba-Yígúrə́-Jə-Tiu malɩka tə nə, ka nə wulə ba yáá nə.
Lʋʋ nii tə wulə lúə́ wa
9 Kʋ dɩɩn təntə nə, à wá cʋ̀gʋ̀ dwíə́ tə mama, tə nə wá bà, tə ta Zwerizalɛmə. 10 À wá kə pubwanʋ də yɩjʋnɩ jə̀rə́ Davidə dìə̀ tə, də Zwerizalɛmə tɩ̀án tə waa. Yá ba dàń wá viviri ba yáá ba kə à con, à mʋ̀ lìù tə ba nə pórí. Ba wá kwi à nə, ndə ba nə kwi bidʋa nə nətʋ. Ba wá kwi à nə zənzən, ndə ba nə kwi bikwɩa nə nətʋ. 11 Kʋ dɩɩn təntə nə, kʋ wá ya lúə́ pucʋnɩ nəfarʋ Zwerizalɛmə wa, kʋ wá ya dánɩ́ ndə pucʋnɩ tə nə, ba yàá nə fwa woŋwanʋ Adadə-Rimona yɩrɩ, Megido vara tə wa. 12 Lʋʋ nii tə wá ya lúə́ pucʋnɩ wa, sàń mama jə̀ń kʋ cɩcɩ. Nə̀ń ba nə wá jə̀ń nətʋ: Davidə dìə̀ tə wá jə̀ń ka cɩcɩ, bara tə ba cɩcɩ, kana tə də ba cɩcɩ. Natan dìə̀ tə wá jə̀ń ka cɩcɩ, bara tə ba cɩcɩ, kana tə də ba cɩcɩ. 13 Levi dwíí tə wá jə̀ń ba cɩcɩ, bara tə ba cɩcɩ, kana tə də ba cɩcɩ. Swimeyi dìə̀ tə wá jə̀ń ka cɩcɩ, bara tə ba cɩcɩ, kana tə də ba cɩcɩ. 14 Dwíə́ tə duən tə də mama wá kwi lúə́ tə nətʋ, sàń mama jə̀ń kʋ cɩcɩ, bara tə ba cɩcɩ, kana tə də ba cɩcɩ.