Lʋʋ níə́ tə nə jə dɩ̀àn zənzən tʋrɩ yoo
11
1 Liban lʋʋ, súrí n mimien tə,sə mən də́ n sɩsaban tɩ̀án tə!
2 Sɩsaban tɩ̀án-ba, á bubwiə.
Cɩ́gá, sɩsaban tɩ̀án tə tʋa.
Tɩ̀án nəzəŋə təntə tʋa tə cʋ̀gʋ̀.
Basan nagwanaa sɩsanan-ba, á bubwiə.
Cɩ́gá, pún tə kʋ wa nə wàrɩ̀ kʋ zwɩ tə tʋa!
3 Á cʋga payɩra tə ŋʋŋwɩa,
cɩ́gá, ba dun tə cʋ̀gʋ̀.
Á cʋga gərən baa,
cɩ́gá, Zʋrədɛn mʋnaa tə nii tuni nəzəŋə tə cʋ̀gʋ̀.
Payɩra bələ yoo
4 Ba-Yígúrə́-Jə-Tiu, ʋ nə yɩ à Yɩɩ pɩn nə nii, ʋ wʋ́:
«Yɩ̀rɩ́ pee tə,
ba nə mɛ sə ba ja va nangʋra dìə̀, ba gʋ!»
5 Lɩ̀à tə nə yə̀ tə, yàá gʋ tə,
ba ga bʋŋa də ba wà yolwan tʋn.
Lɩ̀à tə ba nə yoli tə lìù mama yàá swɩ̀n, ʋ wʋ́:
«À kəni Ba-Yígúrə́-Jə-Tiu lɛ̀ɛ̀,
cɩ́gá, à jigə jɩjə tíú!»
Yá pee tə payɩrʋ nədʋ tətə ba tə yinəgə dəri.
6 À də kʋ́ʋ̀ bá dəri tɩa yuu ləzoni tə yinəgə.
À mʋ̀ Ba-Yígúrə́-Jə-Tiu nii sʋgʋ nə.
Cɩ́gá, à wá ja lìù mama, à kə ʋ don jɩɩn wa,
də ʋ pɩ̀ʋ́ jɩɩn wa.
Pɛ̀gá tə wá cʋ̀gʋ̀ lʋʋ nii tə mama,
yá à bá jon lìù mama ba jɩɩn wa.»
7 À dàń yɩ̀rɩ̀ pee tə, baywələ nə pɩ̀à ba ja va nangʋra dìə̀, ba gʋ. À tì dadurən bələ, à dɩ kʋ don yɩrɩ «Dabarɩ», à ga dɩ kʋ don tə də yɩrɩ «Nimarʋ.» Yá à dàń vəli, à cɩ̀ pee tə nə. 8 À dɩŋɩ payɩra batwa tə, cànà nədʋ nii nə. À də waa twi ka nan pee tə, pee tə də waa ga nan nə. 9 À dàń ma swɩ̀n, à wʋ́: «À kʋ́ʋ̀ bá yɩ̀rɩ̀ aba! Piə tə ka nə wá tɩ, sə ka tɩ, ka tə ka nə wá jɛ́n, sə ka jɛ́n. Pee tə də nə wá ga lá, díə́ duən!»
10 À tì dabarɩ daduu tə, à kɛ́n, sə à ma bɩrɩ də Yɩɩ dabarɩ tə, ʋ yà nə jɩn də dwíə́ tə mama, kʋ́ʋ̀ tə̀lə́. 11 Dabarɩ tə cʋ̀gʋ̀ kʋ dɩɩn tə nə. Yá baywələ tə yà nə ywàŋá nə, dàń lwarɩ də kʋ yɩ Ba-Yígúrə́-Jə-Tiu sʋgʋ. 12 À swɩ̀n ba con, à wʋ́: «Á nə na də kʋ ziən kʋ pa aba, á pɩan nə ŋwɩ́rán! Kʋ nə tà nətʋ, sə á yá lá!» Ba ma gàlà wárʋ́ səbilurən fɩtwaa, ba ma ŋwɩ́n nə. 13 Ba-Yígúrə́-Jə-Tiu swɩ̀n à con, ʋ wʋ́: «Tì səbiu kʋ tə, n ja va n dɩ Yɩɩ dìə̀ səbiu daka tə wa. Mə à kwənə nə, ba nə jələ.» À ma tì wárʋ́ səbilurən fɩtwa tə, à ja va à dɩ Yɩɩ dìə̀ səbiu daka tə wa. 14 Kʋ kwa nə, à tì à bələ nii daduu tə, kʋ yɩrɩ nə yɩ Nimarʋ, à kɛ́n, sə à ma bɩrɩ də nimarʋ tə yà nə wulə Zwida dwíí tə, də Yɩzərayɛlə lɩ̀à tə pwə́rə́ wa, kʋ́ʋ̀ tə̀lə́. 15 Ba-Yígúrə́-Jə-Tiu kʋ́ʋ̀ swɩ̀n à con, ʋ wʋ́: «Ja n tɩ̀àn n ma fwa ndə payɩrʋ nə, ʋ nə yɩ ləyiru! 16 Cɩ́gá, à wá pa payɩrʋ nədʋn bà lʋʋ nii tə wa. Ʋ bá ywàń pee tə yuu, tə nə pɩ̀à tə tɩ. Ʋ bá twarɩ piə tə nə jɛ́n, ʋ bá ywarɩ ka tə ba nə caŋɩ, ʋ ga bá pa wodiu ka tə nə, ka yɩra nə zurə. Yá ʋ dàń wá də́ pee tə nə jə nʋga zənzən, ʋ ga van tə napaŋa ʋ fwèə́.
17 Càn nə wá yí payɩrʋ tə nə yɩ ləyiru,
ʋ nə dʋgʋ ʋ pee!
Yɩɩ wá pa ʋ vàn gwəŋə kʋ̀ʋ̀ wa,
ʋ jɩzən yii də ga lá.
Yɩɩ wá pa ʋ vàn tɩ, kʋ tɩ mɩ́ámɩ́án,
ʋ jɩzən yii də ga jɛ́n, kʋ jɛ́n mɩ́ámɩ́án!