Ba-Yígúrə́-Jə-Tiu cɩcɩ nə pɩn dwà nɩ̀
10
1 Á lòrə́ Ba-Yígúrə́-Jə-Tiu,sə ʋ pa dwà nà, ka nɩʋ máŋá wa.
Ʋ mʋ̀ nə wá pa dwà tʋnɩ,
ka nà zənzən,
ʋ ga pa lìù mama kárá wiən nan.
2 Cɩ́gá, woŋwanan tə yɩ kʋ̀nkʋ̀n sʋ̀ràn tə swɩ̀n,
vʋra tə də yɩ kʋ̀nkʋ̀n yìə̀n ba yàá na, ba swɩ̀n á con,
pandwɩa də yɩ yoyanan tə bɩrɩ aba,
tə ga wàrɩ̀ á yoo tə kwɛn.
Kʋ mʋ̀ nə pɩn lalʋʋ tə ma ywaŋa ndə pee nə.
Ba yɩ yinənyɩna, ndə pee nə, tə nə ba payɩrʋ jə.
Zaŋʋ nədʋn yoo
3 À lɩŋa zàn payɩra kʋkwɩnan tə yuu wa zənzən,
yá à wá bà à tʋn yoo ba yɩra.
Cɩ́gá, Ba-Yígúrə́-Jə-Tiu, ʋ nə yɩ kwatara Yɩɩ wá bà,
ʋ san Zwida dwíí tə nə,
ba nə yɩ ndə ʋ pee nə.
Ʋ wá pa ba ya ndə ʋ dun
səsən nə, ʋ nə ma tɛ kʋ̀ʋ̀.
4 Pɛ̀gá yiri mama wá nan
Zwida dwíí tə wa,
ba nə wá ja dɩ̀àn ndə dìə̀ nigwancɩn kapan nə.
Ba wá ja dɩ̀àn ndə gansili párɩ́ nə,
ba ga wá ja dɩ̀àn ndə kʋ̀ʋ̀ twan nə.
5 Ba wá ya ndə kwatara babɩran nə,
ba wá tɩtaga lɩ̀à tə nə tɛ ba,
ndə cwəŋə yuu tɩtaran nə.
Ba wá ta nətʋ,
à mʋ̀ Ba-Yígúrə́-Jə-Tiu nə wulə də ba yɩrɩ.
Yá cavɩra wá ja dʋŋa tə
səsədɩra tə zənzən.
6 À wá pa wʋdɩʋ Zwida dwíí tə nə,
à ga wá jon Zʋzɛfə dwíí tə.
À wá pìí à ja ba à va, ba dəkuu bwálɩ́ nə,
à nə dəri ba yinəgə yɩrɩ.
Yá ba dàń wá ya ndə à yà wà ba vɩ à dʋgʋ.
Cɩ́gá, à yɩ Ba-Yígúrə́-Jə-Tiu, à nə yɩ ba Yɩɩ,
yá à wá le ba.
7 Efərayimə dwíí tə wá ya ndə kwatara babɩran nə.
Ba wá fwa pupwən ndə ba nyʋan divɛn.
Ba bɩ̀á wá na kʋ nətʋ tə,
ba də ga wá fwa pupwən.
Ba wá jwɛ ba bɩcanɩ wa, Ba-Yígúrə́-Jə-Tiu yɩrɩ.
8 À wá bon ba à kə duən yáá nə.
Cɩ́gá, à wá jon ba,
yá ba wá ya dánɩ́ ndə fuən tə nə.
9 À laga ba duən yáá nə dwíə́ nəkaran* tə wa,
ndə ba nə mɩ́n wodwii,
yá ba tə wá lìí à yoo lʋʋ níə́
təntə wa, tə nə ŋʋ́ná.
Ba də ba bɩ̀á wá ya lʋʋ níə́ təntə wa,
ba ga wá pìí ba bà.
10 À wá pìí à lɩ ba Ezwipətə lʋʋ nii tə wa,
à wá kə ba duən yáá nə Asiiri lʋʋ nii tə wa,
à ja ba Galadə, də Liban lʋʋ níə́ tə wa.
Yá bwálɩ́ tə bá yí ba jaa.
11 Ba wá bɩn jɩgwarʋ mʋʋ tə,
yá à mʋ̀ Ba-Yígúrə́-Jə-Tiu wá mà mʋʋ tə nakulə tə,
yá Nilə mʋnaa tə mama ga wá jì nəkʋrʋ.
Asiiri tɩ̀án wá tʋ də ba fwìə́ tə,
Ezwipətə tɩ̀án ga wá kwɩ̀n ba dɩ̀àn tə nə.
12 À wá dàn à lɩ̀à tə jɩɩn,
yá ba wá tʋn kʋ tə nə yɩ à fɩra.
À mʋ̀ Ba-Yígúrə́-Jə-Tiu nii sʋgʋ nə.