YƖZƏRAYƐLƏ DƏ DWÍƏ́ NƏKARAN TƏ DUƏN TƏ
9—14
Yɩɩ wá bʋ̀rɩ̀ Yɩzərayɛlə jənduən tə bʋra
9
1 Bwə̀rə́!Ba-Yígúrə́-Jə-Tiu sʋgʋ tə yɩ Hadərakə lʋʋ nii tə con nə kʋ swɩ̀n,
yá kʋ jɩn Damasə tɩʋ tə də, kʋ súrí lá.
Cɩ́gá, Ba-Yígúrə́-Jə-Tiu yɩ́á cəə lʋʋ ləzoni mama yuu,
ndə ʋ yɩ́á nə cəə Yɩzərayɛlə dwíə́ tə mama yuu nətʋ.
2 Ʋ sʋgʋ tə swɩ̀n Hamatə tɩʋ tə də con, kʋ nə bwə́lə́ də Damasə.
Kʋ swɩ̀n Tirə, də Sidon tɩan tə də con, tə lɩ̀à nə jə wʋbʋŋa zənzən.
3 Tirə tɩ̀án lwə̀ dɩ̀àn dəkuu bwálɩ́.
Wárʋ́ yà bʋ́rɩ́ ba ndə tɩa pùrú nə,
ba ga jə sɩ́án zənzən ndə coŋi yuu tɩtaran nə.
4 Yá Ba-Yígúrə́-Jə-Tiu wá jon ba jɩjə tə ba con.
Ʋ wá yigu ba tɩʋ biritaŋʋ tə, ʋ dɩ mʋʋ tə wa,
mən ga də́ tɩʋ tə.
5 Aswəkelon tɩ̀án wá na kʋ nətʋ tə,
yá fən wá zʋ ba.
Kʋ wá ya nətʋ, kʋ pa Gaza tɩ̀án də nə.
Ba wá vɩvaga zənzən.
Kʋ wá ya nətʋ, kʋ pa Ekəron tɩ̀án də nə.
Cɩ́gá, ba wá kwɩ̀n ba yalaa tə nə.
Pɩ̀ʋ́ kʋ́ʋ̀ bá ya Gaza wa,
yá lìù kʋ́ʋ̀ bá ya Aswəkelon tɩʋ tə wa.
6 Dwíə́ nəkaran* wá gùlí Aswədɔdə tɩ̀án wa.
Mə kʋ wá twá nətʋ, à ma pa Filisi tɩ̀án fwìə́ tə zwɛ̀.
7 Yá à dàń wá lɩ vàná tə, tə jana nə wà lwɛ́b nàŋá tə, ba yelə wa,
à ga lɩ durən wodirən tə, ba nii wa.
Yá ba də dwíí tə gɩganɩ tə dàń wá ya à mʋ̀ Yɩɩ nyiən.
Ba wá ya ndə padwii nə Zwida dwíí tə titəŋi wa,
yá Ekəron tɩ̀án də dàń wá jì à mʋ̀ lɩ̀à, ndə Yebusə tɩ̀án nə.
8 À wá cɩ̀ à lʋʋ nii tə nə,
sə kwatara, nə à yə̀ə́ lɩ̀à tə nə zwɩ də ba naŋa, dàn ká ta kʋ.
Dʋŋʋ mama kʋ́ʋ̀ bá bà, ʋ twá lá ʋ fɩfɩn kʋ wa lɩ̀à tə.
Cɩ́gá, sɩ́ʋ́n nə, à yɩ́á dàń cəə kʋ yuu wa.
Sìə́ pɩ̀ʋ́ tə túrí yoo
9 Á yana pupwən wa, Siyon tɩ̀án ba!
Á maga pupwən cə̀rí, Zwerizalɛmə tɩ̀án ba!
Á nəŋə á pɩ̀ʋ́ tə nə, ʋ bɩ̀àn á con,
ʋ yɩ cɩ́gá tíú, ʋ ga də́ dɩ̀àn.
Ʋ mun ʋ tɩ̀àn, ʋ ga dɩ̀ ʋ jə̀ə́ bɩ̀nà yuu,
ʋ jə̀ə́ bɩnabiə yuu, bɩnakan bìú yuu.
10 Ʋ wá lɩ səsen kòrə̀n tə Efərayimə nagwanaa tə wa,
ʋ ga lɩ səsen tə Zwerizalɛmə tɩʋ tə wa.
Ʋ wá kɛ́n kʋ̀ʋ̀ twɛn tə,
yá ʋ dàń wá kə sìə́ lʋʋ dwíə́ tə wa.
Ʋ pàrɩ̀ tə wá zɩgɩ mʋʋ don nə,
kʋ va kʋ nan kʋ don nə.
Kʋ wá zɩgɩ Əfəratə mʋnaa tə nə,
kʋ va kʋ nan tɩa tə nii yígúrə́ nə.
Ywə́ŋə́ ka tɩnɩ ba tɩ̀àn yoo
11 Yá á mʋ̀, à wá taa joŋic tə yɩrɩ, à nə fwa,
à ma tún nimarʋ à də aba pwə́rə́ wa,
à lɩ á lɩ̀à tə, ba nə yɩ ywə́ŋə́,
bʋʋ tə wa, nɩ́á nə tə̀lə́ lá.
12 Á mʋ̀ ywə́ŋə́ tə, á nə jə yala,
á pìrə́ á va dɩ̀àn dəkuu bwálɩ́ tə wa.
Zə̀n kʋ tə tətə, à mʋ̀ nə swɩ̀n kʋ,
à wá pa aba ŋwɩ́rán nɛɛ bələ,
càn tə yɩrɩ, á nə dí.
13 Cɩ́gá, Zwida dwíí tə wá ya ndə à twan nə,
yá Efərayimə dwíí tə wá ya ndə cɩɩn nə.
Yá à dàń wá zɩ̀n Siyon tɩ̀án,
à zɩgɩ Yavan tɩ̀án nə!
À wá pa Siyon tɩ̀án ya ndə kwatarʋ babɩʋ sɩ̀ʋ́ nə.
14 Ba-Yígúrə́-Jə-Tiu wá nyɩ́n ʋ nan ba yuu con,
yá ʋ wá ta ʋ cɩɩn ndə dwà pɩpɩlʋ nə.
Yuu-Tiu Ba-Yígúrə́-Jə-Tiu wá wúrí nabwana,
ʋ ga nyɩ́n ʋ bɩ̀àn, də jɩgwiə saparʋ con dwavʋʋ.
15 Yuu-Tiu Ba-Yígúrə́-Jə-Tiu, ʋ nə yɩ kwatara Yɩɩ wá ywàń ʋ lɩ̀à tə yuu,
yá ba wá ja kapadɩlʋ kapana, ba ma ta ba də́.
Kapana wá nyʋn dʋŋa jana tə sú,
jana wá pupwin ndə divɛn nə.
Kapana wá sú də jana, ndə nəvuə nə, ba nə ma kəni jana.
Tə wá jì ndə Yɩɩ joŋi bwálɩ́ tə nyʋran tə nə.
16 Kʋ dɩɩn təntə nə, Ba-Yígúrə́-Jə-Tiu, ʋ nə yɩ ʋ lɩ̀à tə Yɩɩ, wá jon ba,
ndə payɩrʋ nə joŋə ʋ pee nətʋ.
Cɩ́gá, Ba-Yígúrə́-Jə-Tiu lɩ̀à tə wá pɩpɩlɩ ʋ tɩa tə yuu wa,
ndə payupuu yɩra kapan cɩ́nán cɩcɩlan nə, tə nə jə funə.
17 Nə̀ń kʋ nə wá ya zəni nətʋ!
Nə̀ń kʋ nə wá ja fɩra nətʋ!
Wodiu də divɛn nədʋn wá pa balandʋra də kacɩan ja dɩ̀àn.