Yɩɩ kàn nii, də ʋ wá fwa zəni Zwerizalɛmə yɩra
8
1 Ba-Yígúrə́-Jə-Tiu, ʋ nə yɩ kwatara Yɩɩ swɩ̀n sʋ̀ràn tə tə,2 ʋ wʋ́: «À mʋ̀ Ba-Yígúrə́-Jə-Tiu jə badoli zənzən,
à pa Siyon* tɩʋ tə nə,
à nə swə kʋ zənzən yɩrɩ.»
3 Ba-Yígúrə́-Jə-Tiu kʋ́ʋ̀ swɩ̀n, ʋ wʋ́:
«À pìí à bɩ̀àn Siyon tɩʋ tə wa,
sə à ya Zwerizalɛmə tɩʋ tə wa.
Yá ba dàń wá bon Zwerizalɛmə, Cɩ́gá Tɩʋ,
ba ga bon Ba-Yígúrə́-Jə-Tiu, ʋ nə yɩ kwatara Yɩɩ paan tə, Paan Parɩ.»
4 Ba-Yígúrə́-Jə-Tiu, ʋ nə yɩ kwatara Yɩɩ kʋ́ʋ̀ swɩ̀n, ʋ wʋ́:
«Bazʋnan tə, də kazʋnan kʋ́ʋ̀ wá nan,
ba jə̀ń Zwerizalɛmə kanpwərən tə wa,
ba lìù mama də ʋ jɩɩn daduu,
ba nə kwɩn zənzən yɩrɩ.
5 Tɩʋ tə kanpwərən tə kʋ́ʋ̀ wá sú
də bisɩmabarɩ, də bisɩmakanɩ,
ba ma bwanɩ.»
6 Ba-Yígúrə́-Jə-Tiu, ʋ nə yɩ kwatara Yɩɩ kʋ́ʋ̀ swɩ̀n, ʋ wʋ́:
«Lalʋʋ tə gɩganɩ tə nə swə ba bʋŋa də,
kʋ nətʋ tə wàrɩ̀ kʋ jì, kʋ máŋá təntə wa,
à də mɛ, sə à bʋ́n də,
kʋ wàrɩ̀ kʋ jì naaa?
À mʋ̀ Ba-Yígúrə́-Jə-Tiu, à nə yɩ kwatara Yɩɩ nii sʋgʋ nə.»
7 Ba-Yígúrə́-Jə-Tiu, ʋ nə yɩ kwatara Yɩɩ kʋ́ʋ̀ swɩ̀n, ʋ wʋ́:
«Cɩ́gá, à wá jon à lɩ̀à tə,
yɩɩ yipɩan con lʋʋ nii tə wa,
də yɩɩ yizwɩa con lʋʋ nii tə wa,
à ja bà.
8 À wá ja ba à bà,
yá ba wá ya Zwerizalɛmə wa.
Ba wá ya à mʋ̀ lɩ̀à,
yá à wá ya ba Yɩɩ,
kʋ twá cɩ́gá nə, ndə kʋ mɛ nətʋ.»
9 Ba-Yígúrə́-Jə-Tiu, ʋ nə yɩ kwatara Yɩɩ kʋ́ʋ̀ swɩ̀n, ʋ wʋ́:
«Á pɩan á jɩ̀àn dàn,
á mʋ́ lɩ̀à tə, á nə cʋga sʋ̀ràn tə tə,
Yɩɩ nii sʋ̀sʋ̀nà tə nə swɩ̀n, ba bɩrɩ,
máŋá tə wa, ba nə tún Ba-Yígúrə́-Jə-Tiu,
ʋ nə yɩ kwatara Yɩɩ dìə̀ tə dəkuu,
sə ba pìí ba lwà ka.
10 Cɩ́gá, də dɩan təntə tə yà nə wà yí,
ba yà ba ləzwənə, nə à yə̀ə́ vànɩ́ tʋtʋŋɩ ŋwɩ́n.
Lìù mama yà wàrɩ̀ cwəŋə ʋ vəli,
ʋ pìí ʋ twi də yazurə, dʋŋa tə yɩrɩ.
Cɩ́gá, à yà dʋgʋ ləzoni tə mama,
à pa ba zɩga duən nə.
11 Yá sɩ́ʋ́n nə, yoo tə à yà nə ma tʋŋa lɩ̀à fuən nə,
à kʋ́ʋ̀ bá tʋn kʋ, lɩ̀à ba tə gɩganɩ tə mʋ̀ yɩra.
À mʋ̀ Ba-Yígúrə́-Jə-Tiu, à nə yɩ kwatara Yɩɩ nii sʋgʋ nə.
12 Cɩ́gá, à wá mɩ́n bɩcan sìə́ tɩa yuu wa, ndə wodwii nə.
Lanworu wá pa dwà nà,
divɛn tɩ̀án wá zɩn lənə,
tɩa tə wiən wá zɩn lənə,
yá à wá pa wiən təntə mama,
à lɩ̀à tə gɩganɩ tə nə, ba nə wá ga lʋʋ wa,
sə tə ya ba tori.
13 Á mʋ̀ Zwida dwíí tə, də Yɩzərayɛlə lɩ̀à ba,
á yɩn dwíí tə, á nə ken basarʋ dwíə́ nəkaran* tə nə.
Yá sɩ́ʋ́n nə, à dàń wá jon aba,
à pa á jì dwíí, à nə twá á nə, à ma fwa zəni lɩ̀à yɩra.
Á kʋ́ʋ̀ dànà ká pa fən ja aba,
á pɩan á jɩɩn dàn.»
14 Cɩ́gá, nəŋə kʋ tə Ba-Yígúrə́-Jə-Tiu, ʋ nə yɩ kwatara Yɩɩ nə swɩ̀n:
«Máŋá tə, à nə ken sírí,
sə à kə aba càn wa,
á nɩbara-ba nə zɩ̀n à lɩŋa tə yɩrɩ,
à wà pìí à lwàń pubʋŋa.
15 Yá sɩ́ʋ́n nə, à kʋ́ʋ̀ ken sírí,
sə à fwa zəni Zwerizalɛmə tɩ̀án,
də Zwida dwíí tə mama yɩra.
Kʋ mʋ̀ yɩrɩ, á dànà ká pa fən ja aba.
16 Nəŋə yìə̀n tə, á nə mɛ, sə á zìlí tə nii.
Á lìù mama mɛ, sə ʋ swɩ̀n cɩ́gá ʋ don con.
Á bʋra bwálá nə, á bʋ̀rá bʋra,
á pa ka twá cɩ́gá nə,
sə ka kə sìə́ á pwə́rə́ wa.
17 Á dànà ká bʋ́n lwanɩ á bɩcan wa,
á zɩgɩ duən nə.
Á dànà ká sɛ̀ á dù kʋ̀nkʋ̀n durə.
Cɩ́gá, à culi yokʋkwɩnan təntə mama.
À mʋ̀ Ba-Yígúrə́-Jə-Tiu nii sʋgʋ nə.»
Nivori máŋá wá jì pupoli máŋá
18 Ba-Yígúrə́-Jə-Tiu, ʋ nə yɩ kwatara Yɩɩ kʋ́ʋ̀ swɩ̀n à con, ʋ wʋ́: 19 «Bɩnɩ mama, nivori tə, á nə yàá fwa banɩa nii cànà tə, də bonu nii cànà tə, də barpɛ nii cànà tə, də fugə nii cànà tə wa, dàń wá jì Zwida dwíí tə cànɩ̀ diŋə máŋá, ba nə wá fwa pupwən, ba ga jwɛ. Á dàń nə swənə cɩ́gá, də sìə́.»
20 Ba-Yígúrə́-Jə-Tiu, ʋ nə yɩ kwatara Yɩɩ kʋ́ʋ̀ swɩ̀n, ʋ wʋ́:
«Dwíə́ nəkaran* tə,
də tɩfaran kapʋpʋ lɩ̀à
kʋ́ʋ̀ wá bà Zwerizalɛmə wa.
21 Tɩʋ don lɩ̀à wá va
ba swɩ̀n kʋ don lɩ̀à con, ba wʋ́:
Á bɩ̀án nə va nə jʋn Ba-Yígúrə́-Jə-Tiu, ʋ nə yɩ kwatara Yɩɩ,
nə ga lòrì wá!
Yá ba wá le, ba wʋ́:
Awoo, nə vələ!
22 Kʋ yɩ cɩ́gá, lʋʋ dwíə́ kapʋpʋ,
də dwíə́ nəkaran, tə nə jə dɩ̀àn,
wá bà Zwerizalɛmə,
ba jʋn à mʋ̀ Ba-Yígúrə́-Jə-Tiu, à nə yɩ kwatara Yɩɩ,
ba ga lòrì nə.»
23 Ba-Yígúrə́-Jə-Tiu, ʋ nə yɩ kwatara Yɩɩ kʋ́ʋ̀ swɩ̀n, ʋ wʋ́:
«Kʋ máŋá tə wa,
dwíə́ nəkaran tə sʋyirə tə mama
wa lɩ̀à kapʋpʋ wá pùrì Zwida dwíí lìù gànʋ̀ nii nə,
ba ga swɩ̀n, ba wʋ́:
Nə pɩ̀à sə nə twá á nə.
Cɩ́gá, nə nì də Yɩɩ wulə də aba.»