Nivori yoo
7
1 Pɩ̀ʋ́ Dariyusə pàrɩ̀ tə banɩa nii bɩnɩ tə, nʋgʋ nii cànà tə wa, ba nə boŋə Kisəlɛvə cànà tə dɩan banɩa dɩɩn nə, Ba-Yígúrə́-Jə-Tiu swɩ̀n sʋgʋ Zakari con. 2-3 Betɛlə tɩ̀án tʋn Sarɛsɛrə, də Reguwɛmə-Melɛkə, də ba kwa lɩ̀à, Ba-Yígúrə́-Jə-Tiu, ʋ nə yɩ kwatara Yɩɩ, dìə̀ tə wa. Ba wá lòrì Yɩɩ pubwanʋ tə, ba ga bwe Yɩɩ joŋwana tə, də Yɩɩ nii sʋ̀sʋ̀nà tə, ba wʋ́: «Kʋ mɛ sə nə tə vwa nə níə́a, nə ga kwi bonu nii cànà tə wa, ndə nə nə fwa nətʋ bɩnɩ mama, bɩna kapʋpʋ nə lɛ naaa? 4 Yá Ba-Yígúrə́-Jə-Tiu, ʋ nə yɩ kwatara Yɩɩ dàń swɩ̀n à con, 5 sə à swɩ̀n sʋ̀ràn tə tə, lʋʋ nii tə lɩ̀à tə mama con, də Yɩɩ joŋwana tə con, ʋ wʋ́:«Á nə yàá vwe á nii,
á ga kəni á tɩ̀àn lúə́ pucʋnɩ wa,
bonu nii cànà tə, də barpɛ nii cànà tə wa,
kʋ bɩna sapwɩtwa də fugə nə.
Yá kʋ yɩ à mʋ̀ yɩrɩ nə, á taa á tʋn kʋ nətʋ tə naaa?
6 Á nə yàá də́, á ga nywɩn,
kʋ yɩ á də́, á ga nywɩn á kəni à pùə́ wa naaa?
7 Kʋ tà sʋ̀ràn tə tə nə, Ba-Yígúrə́-Jə-Tiu dí yáá, ʋ twá də fuən Yɩɩ nii sʋ̀sʋ̀nà tə, ʋ ma swɩ̀n naaa? Kʋ máŋá tə wa, də lɩ̀à yà wulə Zwerizalɛmə wa, yá yoo mama yà ba kʋ də kʋ nii tɩbii tə wʋwalɩ. Yá lɩ̀à yà wulə Negɛbə* nagwanaa tə, də Swefela* nagwanaa tə də wa.»
8-9 Ba-Yígúrə́-Jə-Tiu, ʋ nə yɩ kwatara Yɩɩ kʋ́ʋ̀ swɩ̀n Zakari con, sə ʋ swɩ̀n sʋ̀ràn tə tə, ʋ wʋ́:
«Á bʋ̀rá bʋra, á pa kʋ twá cɩ́gá nə,
á ga ja sonu də pubwanʋ, á pa duən nə.
10 Á dànà ká fɩfɩn kadənə də bitara,
nə à yə̀ə́ vərə də yinənyɩna.
Á dànà ká ja pubʋnlwan á bɩcan wa,
á ja zɩgɩ duən nə.»
11 Yá lɩ̀à tə yɩn zɩbanənyɩna. Ba viviri ba kwa ba ma sà sʋ̀ràn təntə, ba ga vɩ sə ba cʋgʋ tə. 12 Ba dàn ba bɩcanɩ, ndə kapan cɩ́nʋ́ nə, sə ba dàn ká nì Ba-Yígúrə́-Jə-Tiu, ʋ nə yɩ kwatara Yɩɩ kwìə̀ tə, də ʋ sʋ̀ràn tə, ʋ nə twá də ʋ Siŋu tə, ʋ pa təntən Yɩɩ nii sʋ̀sʋ̀nà tə swɩ̀n ba con. Kʋ mʋ̀ nə zɩ̀n Ba-Yígúrə́-Jə-Tiu, ʋ nə yɩ kwatara Yɩɩ lɩŋa zənzən. 13 Ba-Yígúrə́-Jə-Tiu swɩ̀n, ʋ súrí lá, ʋ wʋ́:
«Máŋá tə, à nə bon ba, ba wà à con tan.
Kʋ mʋ̀ nə pɩn, à də vɩ, sə à tan ba con,
máŋá tə wa, ba nə bon nə.»
«À laga ba duən yáá nə, dwíə́ nəkaran* tə mama wa,
ba yà nə yəri ba.
Yá lʋʋ nii tə mama dàń cʋ̀gʋ̀, ba vìrú kwa nə.
Lìù mama yà kʋ́ʋ̀ ba lá twá ʋ lɛ,
lìù mama yà ma ba lá twi də.
Yá lʋʋ nii təntə kʋ yà nə ziən,
ba dàń pɩn kʋ jì digə.»