Nana nii nə, Zakari nɩ səsen kòrə̀n
6
1 À kʋ́ʋ̀ zɩ̀n à yáá yɩɩ nə, yá à nɩ səsen kòrə̀n banɩa, də tə naŋa cɩnɩan pɛɛn bələ pwə́rə́ wa. 2 Səsen sɩ̀sɩ́nán yà vaŋa təntən kòrù tə, səsen nəzwənən yà vaŋa bələ nii kòrù tə, 3 səsen nəpwənə yà vaŋa batwa nii kòrù tə, səsen wuwilən tə nə jə pwara ga vaŋa banɩa nii kòrù tə. 4 À bwe malɩka tə, ka yà nə swɩ̀n də nə, à wʋ́: «À yuu-tiu, səsen tə tə, də tə kòrə̀n tə də̀ń nə yɩ bɛ̀ɛ̀?» 5 Malɩka tə le nə, ka wʋ́: «Tə yɩ lanworu vʋʋ dəkurən banɩa tə, tə nə naŋa bwálɩ́ tə nə, tə yà nə wulə tɩa tə mama Yuu-Tiu tə yáá con. 6 Səsen nəzonən tə, tə yà nə vaŋa kòrù tə don, vələ jɩzən saparʋ lʋʋ nii tə con, yá səsen nəponə tə ga pú tə kwa. Səsen pʋ̀pʋ̀nàn tə də yà vələ jɩgwiə saparʋ con. 7 Səsen wuwilən tə nan, tə ga lòrì, sə tə va tə kɩkarɩ tɩa tə. Ba-Yígúrə́-Jə-Tiu ma swɩ̀n tə con, ʋ wʋ́: «Á vələ, á kɩkarɩ tɩa tə.» Yá tə dàń vəli tə kɩkarɩ tɩa tə. 8 Ʋ bon nə, ʋ ga swɩ̀n à con, ʋ wʋ́: «Ywàń, tə tə nə naŋa tə vələ jɩzən saparʋ con, wá pa à Siŋu tə cú, kʋ lʋʋ nii tə wa.Yɩɩ kàn nikana ʋ pa Zozuwe nə
9 Ba-Yígúrə́-Jə-Tiu swɩ̀n à con, ʋ wʋ́: 10 «N wá jon zìlə́ wiən, Ɛlədayi, də Tobɩya, də Yedaya con. Wiən təntə yɩ lɩ̀à tə nə wulə yongaʋ tə wa nə pɩn tə, ba ja nan Babilɔnə ba bà. N tətə dàń vəli zə̀n mama, Sofoni bìú Zozɩasə dìə̀, n jəri ba lá, n jon tə. 11 N wá jon wárʋ́ də sɩ́án, n ma fwa dun yupuu, n pú Yɩɩ joŋwana yun tɩ̀án nəkwɩa Zozuwe yuu nə, ʋ nə yɩ Yehosadakə bìú. 12 N dàń wá swɩ̀n ʋ con də, Ba-Yígúrə́-Jə-Tiu, ʋ nə yɩ kwatara Yɩɩ wʋ́:
Nə̀ń bɛɛ, ʋ yɩrɩ nə yɩ Wodwii.
Ʋ wá pɛ́n ʋ pa mii won tə mama tə nə,
kʋ nə wulə ʋ nɛɛ də̀ń,
ʋ mʋ̀ ga nə wá lwà à dìə̀ tə.
13 Cɩ́gá, ʋ mʋ̀ nə wá lwà ka.
Ʋ wá zʋ pɩ̀ʋ́ gànàn,
ʋ ga jə̀ń ʋ padaʋ tə yuu,
ʋ ma kə lalʋʋ tə cwəŋə nə.
Yɩɩ joŋwanʋ wá ya ʋ səpuni nə,
yá nimarʋ wá ya ba bələ tə pwə́rə́ wa.
14 Dun yupuu tə wá ya Ba-Yígúrə́-Jə-Tiu dìə̀ tə wa, kʋ lìí Ɛlədayi, də Tobɩya, də Yedaya yoo, də Sofoni bìú tə pubwanʋ tə yoo.»
15 Lɩ̀à wá nan yiŋʋnɩ ba bà, ba san ba lwà Ba-Yígúrə́-Jə-Tiu dìə̀ tə. Kʋ nətʋ dàń wá pa á lwarɩ də, Ba-Yígúrə́-Jə-Tiu, ʋ nə yɩ kwatara Yɩɩ, cɩ́gá nə tʋn à mʋ̀ Zakari, á con. Kʋ nətʋ tə wá tʋn, də á nə zìlí Ba-Yígúrə́-Jə-Tiu, ʋ nə yɩ á Yɩɩ tə nii zəni.