Zakari 5

Bardʋ nii nə, Zakari nɩ sagɩ, kʋ nə pəpiri kʋ twá vʋʋ nə

1 À kʋ́ʋ̀ zɩ̀n à yáá yɩɩ nə, yá à nɩ sagɩ, kʋ nə pipini ndə sàrá nə, kʋ twá vʋʋ nə lanworu tə wa. 2 Malɩka tə ma bwe nə, ka wʋ́: «Bɛ̀ɛ̀ nə n na?» À le, à wʋ́: «À na sagɩ, kʋ nə pipini, kʋ twá vʋʋ nə, lanworu tə wa. Kʋ danɩ yɩ jɩvaŋa sapʋa, kʋ wanɩ ga yɩ jɩvaŋa fugə.» 3 Yá malɩka tə dàń swɩ̀n à con, ka wʋ́: «Kʋ yɩ zɩra tə nə wá ja lʋʋ nii tə mama, yoo nə pʋ́pʋ́nɩ́ lá. Sagɩ tə yáá don pʋ́pʋ́ná bɩrɩ də, ba wá dɩŋa ŋwɩna tə mama, ba lɩ lʋʋ nii tə wa. Kʋ yáá tə don də pʋ́pʋ́ná bɩrɩ də, ba wá dɩŋa kʋ̀nkʋ̀na tə mama, ba nə dwì də Yɩɩ yɩrɩ tə, ba lɩ lʋʋ nii tə wa. 4 Ba-Yígúrə́-Jə-Tiu, ʋ nə yɩ kwatara Yɩɩ nii sʋgʋ nə, ʋ swɩ̀n, ʋ wʋ́: «À pɩn nii, sə zɩra ja ŋwɩ̀àn ʋ dìə̀ wa, sə tə ja lìù tə nə dwì kʋ̀nkʋ̀n durə də à yɩrɩ tə, ʋ dìə̀ wa. Yá tə dàń wá ya ba lìù mama dìə̀ wa, tə cʋ̀gʋ̀ ka ywəŋə, də ka kapana mama.»

Barpɛ nii nə, Zakari nɩ tiə

5 Malɩka tə, ka yà nə swɩ̀n də nə, twi ka swɩ̀n, à con, ka wʋ́: «Zɩ̀n n yáá yɩɩ nə, n ywàń won tə nə naŋa lá con, kʋ bɩ̀àn!» 6 À bwe, à wʋ́: «Bɛ̀ɛ̀ won nə?» Yá ka le nə, ka wʋ́: «Kʋ yɩ tiə nə naŋa.» Ka swɩ̀n, ka súrí lá, ka wʋ́: «Kʋ yɩ lʋʋ nii tə mama cʋna nə wulə tiə təntə wa.» 7 Kʋ máŋá tə wa, də nə̀ń tiə tə lugu nipuə tə ka súrí, yá kan ga jə̀ə́ tiə tə wa. 8 Malɩka tə swɩ̀n à con, ka wʋ́: «Kan tə yɩ wʋlʋŋʋ nyɩnyɩga.» Yá ka pìí ka yigu kan tə, ka kə tiə tə wa, ka ga pú lugu nipuə tə, tiə tə nii nə.

9 À kʋ́ʋ̀ zɩ̀n à yáá yɩɩ nə, yá à nɩ kana bələ, ba nə jə vànà, də ba piri vʋʋ tə wa. Ba vànà tə yà yɩ ndə dwanʋ vànà nə. Yá kana təntə dàń tì tiə tə, ba ja piri, ba dɩ̀ lanworu də tɩa pwə́rə́ wa. 10 À bwe malɩka tə, ka yà nə swɩ̀n də nə, à wʋ́: «Kana tə yɩ ba ja tiə tə ba vələ yə̀n? 11 Ka le nə, ka wʋ́: «Ba ja ka ba vələ Swineyarə lʋʋ nii tə wa, sə ba lwà dìə̀, ba kə ka lá. Máŋá tə ba nə lwə̀ dìə̀ tə ba zwɛ̀, ba wá tún tiə tə gárɩ́ yuu, dìə̀ tə wa.»