Zakari 4

Bonu nii nə, Zakari nɩ sɩ́án canzɩlʋ, də olivə* tɩ̀án

1 Malɩka tə, ka yà nə swɩ̀n də nə, pìí ka bà, ka zɩ̀n nə, ndə lìù nə, ba nə zɩ̀n dwiən nə. 2 Ka bwe nə, ka wʋ́: «Bɛ̀ɛ̀ nə n na?» À le, à wʋ́: «À na canzɩlʋ, kʋ mama nə yɩ sɩ́án, kʋ ga jə nʋga nagwalʋ kʋ yuu con, də kʋ nii tʋntʋnɩ barpɛ. Cànʋ́ mama nii jə caŋoni barpɛ. 3 Canzɩlʋ tə zɩga olivə tɩ̀án bələ titəŋi wa. Kʋ don zɩga nʋga nagwalʋ tə jɩzən nə, kʋ don ga zɩga kʋ jɩgwiə nə.» 4 Yá à dàń bwe malɩka tə, ka yà nə swɩ̀n də nə, à wʋ́: «Wiən təntə də̀ń nə yɩ bɛ̀ɛ̀, à yuu-tiu?» 5 Malɩka tə, ka yà nə swɩ̀n də nə, ma le nə, ka wʋ́: «N yəri tə də̀ń?» À le, à wʋ́: «Ɔn ɔn, à yuu-tiu!» 6 Yá ka dàń swɩ̀n à con, ka wʋ́: «Nə̀ń sʋgʋ tə, Ba-Yígúrə́-Jə-Tiu nə swɩ̀n Zorobabɛlə con: Kʋ tà kʋ wá twá də wanʋ, kʋ ma tà kʋ wá twá də dɩ̀àn, yá kʋ dàń nə yɩ kʋ wá twá də à mʋ̀ Ba-Yígúrə́-Jə-Tiu Siŋu tə. Ba-Yígúrə́-Jə-Tiu, ʋ nə yɩ kwatara Yɩɩ nə swɩ̀n kʋ.

7 Paan nəfarʋ ka tə nə yɩ bɛ̀ɛ̀?

Ka wá jì tɩtalʋ, Zorobabɛlə yáá con,

ʋ ga wá lɩ Yɩɩ dìə̀ tə nigwancɩn kapan ka wa.

Yá lɩ̀à wá mà pupwən cə̀rí,

ba ga swɩ̀n də, Yɩɩ dìə̀ tə yɩ pubwanʋ bwálɩ́!»

8 Ba-Yígúrə́-Jə-Tiu kʋ́ʋ̀ swɩ̀n sʋ̀ràn tə tə à con, ʋ wʋ́:

9 «Zorobabɛlə nə tún Yɩɩ dìə̀ ka tə dəkuu, də ʋ jɩ̀àn,

yá ʋ mʋ̀ jɩ̀àn nə wá lwà ka, tə gúrí.»

Yá á dàń wá lwarɩ də, Ba-Yígúrə́-Jə-Tiu,

ʋ nə yɩ kwatara Yɩɩ cɩ́gá nə tʋn nə, á con. 10 Malɩka tə, ka yà nə swɩ̀n də nə, dàń le nə, ka wʋ́: «Cɩ́gá, wàà nə yàá gwìə̀n won tə, ba nə lan kʋ də̀ń, mancɩn mancɩn? Ba wá fwa pupwən, máŋá tə, ba nə wá na dìlwə̀rə́ ŋwənə, Zorobabɛlə jɩɩn wa. Cànán barpɛ tə bɩrɩ Ba-Yígúrə́-Jə-Tiu yɩ́á tə, tə nə ywàŋá tɩa tə yuu mama nə.»

11 À kʋ́ʋ̀ bwe ka, à wʋ́: «Olivə tɩ̀án bələ tə nə wulə canzɩlʋ tə jɩzən, də kʋ jɩgwiə nə, də̀ń nə yɩ bɛ̀ɛ̀?» 12 Yá à tə bwe ka, bələ nii bwie, à wʋ́: «Olivə tɩ̀án naywalan bələ tə nə lwɛ́ nʋga tə nə ba durən jə, sɩ́án canwurə bələ tə wa, də də̀ń nə yɩ bɛ̀ɛ̀?» 13 Ka le nə, ka wʋ́: «N yəri tə də̀ń?» À le, à wʋ́: «Ɔn ɔn, à yuu-tiu.» 14 Yá ka swɩ̀n, ka wʋ́: «Kʋ yɩ bara bələ tə, ba nə twɛ́n dun nʋga* ba yuu wa, ba ma kúrí ba, sə ba tʋn ba pa tɩa tə mama Yuu-Tiu tə nə.»