Banɩa nii nə, Zakari nɩ Yɩɩ joŋwana yun tɩ̀án nəkwɩa Zozuwe
3
1 Kʋ kwa nə, Ba-Yígúrə́-Jə-Tiu pɩn à na Yɩɩ joŋwana yun tɩ̀án nəkwɩa Zozuwe, də ʋ zɩga yɩɩ nə, Ba-Yígúrə́-Jə-Tiu malɩka* tə yáá con. Yá Sɩtana dàń yà zɩga Zozuwe jɩzən vàn nə,a sə ʋ swɩ̀n ʋ zɩgɩ ʋ nə. 2 Ba-Yígúrə́-Jə-Tiu malɩka tə swɩ̀n Sɩtana con, ka wʋ́: «Ba-Yígúrə́-Jə-Tiu wá pa n pú n nii, Sɩtana! Ʋ wá pa n pú n nii, ʋ mʋ̀ lìù tə, ʋ nə kúrí Zwerizalɛmə! Zozuwe tà ndə məndaa nə, ba nə twarɩ mən nə naaa?» 3 Cɩ́gá, Zozuwe yà zʋa gandurən, ʋ ja zɩga malɩka tə yáá con. 4 Ba-Yígúrə́-Jə-Tiu malɩka tə dàń swɩ̀n malɩkɛ tə duən tə con, tə nə wulə ka yáá con, ka wʋ́: «Á lɩa ʋ gandurən tə!» Yá ka swɩ̀n Zozuwe con, ka wʋ́: «Ywàń, à lɩ n cʋna tə, sə à ga ja ganmʋla, à zʋ mʋ́.» 5 Malɩka tə pɩn nii, sə ba baa yubarʋ də, kʋ nə ba durən jə, Zozuwe yuu nə. Yá ba dàń baa yubarʋ, kʋ nə ba durən jə, ʋ yuu nə, ba ga ja gànàn ba zʋ wá. Yá Ba-Yígúrə́-Jə-Tiu malɩka tə yà zɩga lá.6 Ba-Yígúrə́-Jə-Tiu malɩka tə swɩ̀n sʋ̀ràn tə tə Zozuwe con, ka wʋ́:
7 «Nə̀ń kʋ tə, Ba-Yígúrə́-Jə-Tiu, ʋ nə yɩ kwatara Yɩɩ nə swɩ̀n.
Ʋ swɩ̀n də, n nə twá ʋ coŋi tə nə zəni,
n ga sɛ̀ yìə̀n tə, ʋ nə pɩn mʋ́ nii tə yuu wa,
n mʋ̀ nə wá ywàń ʋ dìə̀ tə, də ka napakolən tə yuu,
yá ʋ wá pa n ya ndə malɩkɛ tə nə, tə nə wulə ʋ yáá con yəbə.»
Yɩɩ wá pa ʋ tʋtʋnʋ tə bà
8 Ba-Yígúrə́-Jə-Tiu malɩka tə swɩ̀n, ka súrí lá, ka wʋ́:
«N dàń cʋgʋ Zozuwe,
n mʋ̀ lìù tə, n nə yɩ Yɩɩ joŋwana yun tɩ̀án nəkwɩa.
N mʋ̀ də n tʋtʋnduən tə, ba nə jə̀ə́ n yáá con,
á mama cʋga zəni!
Cɩ́gá, á yɩ jonu tə, ʋ nə bɩ̀àn mɩmɩnʋ.
Á nəŋə, à pɩn à tʋtʋnʋ tə bɩ̀àn,
ʋ yɩrɩ nə yɩ Wodwii.
9 Cɩ́gá, á nəŋə kapan tə, à nə tún Zozuwe yáá nə.
Kʋ mʋ̀ kapan nədʋ təntə yɩra jə yɩ́á barpɛ.
À mʋ̀ tətə nə wá bɩ̀rɩ̀ pʋ́pʋ́ná, à tún kʋ yuu wa.
Yá à wá kwɛn lʋʋ nii kʋ tə cʋna, à lɩ, dɩɩn nədʋ.
À mʋ̀ Ba-Yígúrə́-Jə-Tiu, à nə yɩ kwatara Yɩɩ nii sʋgʋ nə.
10 Kʋ dɩɩn təntə nə, á wá bon duən,
á jə̀ń á divɛn tɩ̀án, də á kapɩran də̀ń, á ve.
À mʋ̀ Ba-Yígúrə́-Jə-Tiu, à nə yɩ kwatara Yɩɩ nii sʋgʋ nə».