Bələ nii nə, Zakari nɩ nyʋran, də yàrá
2
1 À zɩ̀n à yáá yɩɩ nə, yá à nɩ nyʋran banɩa. 2 À bwe malɩka tə, ka yà nə swɩ̀n də nə, à wʋ́: «Nyʋran tə tə də̀ń nə yɩ bɛ̀ɛ̀?» Yá malɩka tə le nə, ka wʋ́: «Tə də̀ń nə yɩ dwíə́ nəkaran* tə dɩ̀àn tə, ba nə ma laga Zwida dwíí tə, də Yɩzərayɛlə lɩ̀à tə, də Zwerizalɛmə tɩ̀án tə, duən yáá nə.»3 Kʋ kwa nə, Ba-Yígúrə́-Jə-Tiu pɩn à na yàrá banɩa. 4 À bwe, à wʋ́: «Bɛ̀ɛ̀ nə yàrá ba tə bɩ̀àn, sə ba fwa?» Ʋ le nə, ʋ wʋ́: «Ba twi, sə ba pa dwíə́ nəkaran tə vɩvaga, yá ba ga gùrì nyʋran tə nə yɩ ba dɩ̀àn tə, ba nə ma laga Zwida dwíí tə duən yáá nə, kʋ pa ba lìù mama wàrɩ̀ ʋ yuu ʋ zɩ̀n yɩɩ nə.»
Batwa nii nə, Zakari nɩ ŋwənə, ba nə ma maŋa wiən
5 À kʋ́ʋ̀ zɩ̀n à yáá yɩɩ nə, yá à nɩ bɛɛ, də ʋ jə ŋwənə, ba nə ma maŋa wiən, ʋ jɩɩn wa. 6 À bwe wá, à wʋ́: «Yə̀n nə n vələ?» Ʋ le nə, ʋ wʋ́: «À vələ sə à man Zwerizalɛmə, à na kʋ wanɩ, də kʋ danɩ.» 7 Yá malɩka tə, ka yà nə swɩ̀n də nə dàń vəli yáá, malɩka don ga nan ka jəri ka. 8 Malɩka tə, ka yà nə swɩ̀n də nə, ma swɩ̀n ka don tə con, ka wʋ́:
«Vəli lala n swɩ̀n balandʋrʋ wà tə con, ʋ nə jə ŋwənə tə ʋ jɩɩn wa,
də biritaŋʋ wà mɛ, sə kʋ lwà kʋ kɩkarɩ Zwerizalɛmə tɩʋ tə,
kʋ waa lɩ̀à tə, də vàná tə nə wá ya dánɩ́ zənzən yɩrɩ.
9 À tətə wá ya ndə mənvuə bírə́ nə, à kɩkarɩ kʋ,
yá à wá bɩrɩ à dun tə, kʋ titəŋi wa.»
Ba-Yígúrə́-Jə-Tiu nii sʋgʋ nə.
Ba-Yígúrə́-Jə-Tiu pìí ʋ boŋə ʋ lɩ̀à tə, ʋ nə laga duən yáá nə
10 Nə̀ń kʋ tə, Ba-Yígúrə́-Jə-Tiu nə swɩ̀n á con.
Ʋ swɩ̀n, ʋ wʋ́: «Haya! Haya!
Á mʋ̀ lɩ̀à tə, à nə laga duən yáá nə, lʋʋ saparan banɩa tə mama wa,
á dàń dərə á nan jɩzən saparʋ lʋʋ nii tə wa, á vìí.
Ba-Yígúrə́-Jə-Tiu nii sʋgʋ nə.
11 Haya! Siyon tɩ̀án ba, á dərə á vìí,
á mʋ̀ lɩ̀à tə, á nə twá á jə̀ə́ Babɩlɔnə tɩ̀án con!»
12 Cɩ́gá, nə̀ń kʋ tə, Ba-Yígúrə́-Jə-Tiu, ʋ nə yɩ kwatara Yɩɩ nə swɩ̀n.
Ʋ mʋ̀ nə ken dɩ̀àn à jɩɩn də̀ń,
ʋ ga tʋn nə dwíə́ nəkaran* tə con,
ba nə vɩrɩ aba ndə wiən nə, ba nə ta ba jon kʋ̀ʋ̀ wa:
«Cɩ́gá, lìù nə dwen á yɩra,
kʋ yɩ ndə kʋ tíú nə dwen à mʋ̀ Ba-Yígúrə́-Jə-Tiu yii càlɩ̀ bìú nə.
13 Á nəŋə, à zɩ̀n à jɩɩn à zɩgɩ dwíə́ nəkaran təntə nə,
yá ba ywə́ŋə́ tə də kʋ́ʋ̀ wá vɩrɩ ba ndə wiən nə, ba nə ta ba jon kʋ̀ʋ̀ wa.»
Yá á dàń wá lwarɩ də, Ba-Yígúrə́-Jə-Tiu, ʋ nə yɩ kwatara Yɩɩ cɩ́gá nə tʋn nə.
14 Ba-Yígúrə́-Jə-Tiu kʋ́ʋ̀ swɩ̀n, ʋ wʋ́:
«Màá pupwən cə̀rí, kʋ nə bɩrɩ də n wulə pupwən wa, Siyon bʋ̀áa!
Cɩ́gá, á nəŋə à nə, à bɩ̀àn sə à ya á titəŋi wa.
À mʋ̀ Ba-Yígúrə́-Jə-Tiu nii sʋgʋ nə.
15 Kʋ máŋá təntə wa,
dwíə́ nəkaran kapʋpʋ wá vwa ba tɩ̀àn à mʋ̀ Ba-Yígúrə́-Jə-Tiu yɩra,
ba ga wá jì à mʋ̀ lɩ̀à.
Kʋ dàń nə yɩ á mʋ̀ titəŋi wa nə, à wá ya.»
Yá á dàń wá lwarɩ də, Ba-Yígúrə́-Jə-Tiu, ʋ nə yɩ kwatara Yɩɩ cɩ́gá nə tʋn nə, á con.
16 Zwida dwíí tə kʋ́ʋ̀ wá ya Ba-Yígúrə́-Jə-Tiu tori*,
lʋʋ nii tə wa, kʋ nə yɩ ʋ mʋ̀ Ba-Yígúrə́-Jə-Tiu nyiən.
Yá ʋ kʋ́ʋ̀ wá kúrí Zwerizalɛmə tɩʋ tə,
sə kʋ ya ʋ mʋ̀ nyiən.
17 Lɩ̀à tə mama kənə sərrr, Ba-Yígúrə́-Jə-Tiu yáá con!
Cɩ́gá, ʋ zàn ʋ wúlú bwálɩ́ tə wa, kʋ nə yɩ parɩ, ʋ naŋa.