Zakari
WIƏN TƏ ZAKARI NƏ NƖ
1-8
Ba-Yígúrə́-Jə-Tiu boŋə ʋ kəni Yɩzərayɛlə lɩ̀à nə, sə ba viviri ba kwa ba ma sà ba cʋna
1
1 Pɛrəsə pɩ̀ʋ́ Dariyusə pàrɩ̀ tə, bələ nii bɩnɩ tə nana nii cànà tə wa, Ba-Yígúrə́-Jə-Tiu swɩ̀n ʋ nii sʋ̀sʋ̀nʋ̀ Zakari con, ʋ nə yɩ Berekɩya bìú, ʋ ga yɩ Yido nàʋ́, ʋ wʋ́: 2 «À mʋ̀ Ba-Yígúrə́-Jə-Tiu lɩŋa zàn á nɩbara-ba yuu wa zənzən. 3 Kʋ mʋ̀ yɩrɩ, n dàń swɩ̀n Yɩzərayɛlə lɩ̀à tə con, də à mʋ̀ Ba-Yígúrə́-Jə-Tiu, à nə yɩ kwatara Yɩɩ, boŋə aba, sə á pìí á bà à con, yá à də aba wá kə duən yuu. À mʋ̀ Ba-Yígúrə́-Jə-Tiu, à nə yɩ kwatara Yɩɩ nii sʋgʋ nə. 4 Á dànà ká ya ndə á nɩbara-ba nə. À dí yáá à pa fuən Yɩɩ nii sʋ̀sʋ̀nà tə swɩ̀n ba con, sə ba yá ba yolwana tə, də ba tʋtʋnkʋkwɩnan tə nə, yá ba wà à sʋgʋ cʋgʋ, ba wà à con tan.Ba-Yígúrə́-Jə-Tiu nii sʋgʋ nə. 5 Á nɩbara-ba tə kʋ́ʋ̀ wulə naaa? Yɩɩ nii sʋ̀sʋ̀nà tə mʋ̀ yà wàá lʋʋ wa ba mɛn naaa? 6 Yá à sʋ̀ràn tə, də à nii yìə̀n tə à nə pɩn à nii sʋ̀sʋ̀nà tə nə, ba nə yɩ à tʋ̀tʋ̀nà yà wà á nɩbara-ba tə jɩn naaa? Ba dàń lwàń pubʋŋa, ba ga lwarɩ də, à tʋn kʋ tə, à yà nə bɩrɩ də, à wá tʋn ba yɩra, ba yolwana tə, də ba tʋtʋnkʋkwɩnan tə yɩrɩ.»
Təntən nə, Zakari nɩ səsen
7 Dariyusə pàrɩ̀ tə bələ nii bɩnɩ tə, fugə nədʋ nii cànà tə wa, ba nə boŋə Swebatə cànà, ka dɩan sapʋa də banɩa dɩɩn nə, Ba-Yígúrə́-Jə-Tiu swɩ̀n sʋ̀ràn ʋ nii sʋ̀sʋ̀nʋ̀ Zakari con, ʋ nə yɩ Berekɩya bìú, ʋ ga yɩ Yido nàʋ́.
Zakari swɩ̀n, ʋ wʋ́: 8 «Kʋ tɩtɩn təntə nə, Yɩɩ pɩn à na yìə̀n tə tə. À nɩ səsədɩrʋ ʋ jə̀ə́ səsən sɩsɩnʋ yuu wa, ka nə zɩga vara tɩ̀án titəŋi wa. Səsen sɩsɩnan, də səsen pupwaran, də səsen nəpwənə yà púə́ ʋ kwa.» 9 À bwe, à wʋ́: «À yuu-tiu, səsen tə tə pɩ̀à tə bɩrɩ bɛ̀ɛ̀?» Malɩka tə nə swɩ̀n à con tə ma le nə, ka wʋ́: «À wá pa n na kʋ tə, tə nə yɩ.» 10 Bɛɛ tə nə zɩga vara tɩ̀án tə titəŋi wa ma swɩ̀n, ʋ wʋ́: «Ba yɩ Ba-Yígúrə́-Jə-Tiu nə tʋn ba sə ba kɩkarɩ tɩa tə.» 11 Yá ba dàń swɩ̀n Ba-Yígúrə́-Jə-Tiu malɩka tə con, ka yà nə zɩga vara tɩ̀án tə titəŋi wa, ba wʋ́: «Nə kɩkarɩ tɩa tə mama, yá nə nɩ də sìə́ wulə tɩa tə yuu wa, wʋwalʋ mama tə̀lə́ lá.» 12 Ba-Yígúrə́-Jə-Tiu malɩka tə ma swɩ̀n, ka wʋ́: «Ba-Yígúrə́-Jə-Tiu n nə yɩ kwatara Yɩɩ, kʋ jə bɩna sapwɩtwa də fugə, n lɩŋa tə nə zàn Zwerizalɛmə tɩ̀án, də Zwida tɩ̀án yuu wa. N bá dəri ba yinəgə kʋ dán kʋ mɛ nətə?» 13 Ba-Yígúrə́-Jə-Tiu ma le malɩka tə, ka yà nə swɩ̀n à con tə, də sʋywaŋa, də sʋ̀ràn tə nə daŋa jɩɩn.
14 Yá malɩka tə, ka yà nə swɩ̀n à con tə, swɩ̀n, ka wʋ́: «Bori yoo kʋ tə, n bɩrɩ.» Ba-Yígúrə́-Jə-Tiu ʋ nə yɩ kwatara Yɩɩ swɩ̀n, ʋ wʋ́:
«À swə Zwerizalɛmə,
də Siyon paan tə, də à waa mama.
15 Yá à lɩŋa zaŋa dwíə́ nəkaran* tə mʋ̀ yuu wa zənzən,
ba nə jələ ba tɩ̀àn yuu wa.
Cɩ́gá, à lɩŋa tə yà zàn Yɩzərayɛlə lɩ̀à tə yuu wa mancɩn,
yá dwíə́ nəkaran tə kwɛn ba súrí Yɩzərayɛlə lɩ̀à càn tə.»
16 Kʋ mʋ̀ nə pɩn Ba-Yígúrə́-Jə-Tiu swɩ̀n, ʋ wʋ́:
«À pìí à bɩ̀àn Zwerizalɛmə wa də pubwanʋ.
Ba wá pìí ba lwà à dìə̀ tə.
ba ga wá kə dìlwə̀rə́ ŋwənə ba ma lwà tɩʋ tə də.»
Ba-Yígúrə́-Jə-Tiu, ʋ nə yɩ kwatara Yɩɩ nii sʋgʋ nə.
17 Malɩka tə tə swɩ̀n à con, sə à bòrì yoo kʋ tə də, à bɩrɩ.
Ba-Yígúrə́-Jə-Tiu, ʋ nə yɩ kwatara Yɩɩ swɩ̀n, ʋ wʋ́:
«À tɩan tə wá pìí tə sú də wozəŋə tə pàlɩ̀.
À kʋ́ʋ̀ wá kòrì Siyon tɩʋ tə,
à ga tə wá kúrí Zwerizalɛmə tɩʋ tə.»