Ba-Yígúrə́-Jə-Tiu dɩɩn tə yoo
14
1 Zwerizalɛmə tɩ̀án ba,á nəŋə dɩɩn bɩ̀àn, kʋ nə yɩ Ba-Yígúrə́-Jə-Tiu dɩɩn!
Yá dʋŋa wá tara á jɩjə wiən tə, á yɩ́á yuu.
2 À wá pa dwíə́ nəkaran* tə mama kun duən nə,
sə ba ta Zwerizalɛmə.
Ba wá ta tɩʋ tə ba də́,
ba pɛ̀ dìì tə waa jɩjə wiən tə,
ba ga pə̀ń kana tə, də dɩ̀àn.
Ba wá ja tɩʋ tə ləzwənbɩa tə faan, ba va yongaʋ,
yá ba gɩganɩ tə mʋ̀ wá ya tɩʋ tə wa.
3 Ba-Yígúrə́-Jə-Tiu dàń wá nan,
ʋ ta dwíə́ nəkaran təntə.
Ʋ wá ta, ndə ʋ nə yàá tɛ nətʋ,
kʋ̀ʋ̀ máŋá wa.
4 Kʋ dɩɩn tə nə, ʋ wá cú olivə* tɩ̀án paan tə yuu wa,
ka nə wulə Zwerizalɛmə yáá con,
tɩʋ tə yɩɩ yipɩan con.
Paan tə wá twá ka titəŋi wa, ka pwɛ̀ bələ,
kʋ nə zɩgɩ ka yɩɩ yipɩan con,
kʋ va kʋ ja ka yɩɩ yizwɩa con.
Yá ka luloo tə dàń wá jì vara nəfarʋ.
Ka kɩkɔɔ tə don wá fwarɩ, kʋ va jɩzən saparʋ con,
kʋ don tə ga fwarɩ, kʋ va jɩgwiə saparʋ con.
5 Yá á dàń wá dəri,
á va à pɛɛn tə pwə́rə́ vara tə wa.
Cɩ́gá, vara təntə wá va ka yí Asalə.
Á wá dəri,
ndə á nə dəri tɩa tə vuvugu tə yáá nə,
Zwida pɩ̀ʋ́ Ozɩasə máŋá tə wa.
Yá Ba-Yígúrə́-Jə-Tiu, ʋ nə yɩ à tíú Yɩɩ dàń wá bà,
ʋ də ʋ malɩkɛ tə mama.
6 Kʋ dɩɩn tə nə, poni bá ya lá,
waran tə nə dwə jɩɩn,
tə nə pɩn wiən kəri, nə wá ya lá.
7 Kʋ wá ya dɩɩn tə, kʋ nə yɩ kʋ cɩcɩ,
yá Ba-Yígúrə́-Jə-Tiu cɩcɩ nə yə̀ə́ kʋ.
Kʋ yɩ dɩɩn tə, yɩcaʋ də tɩtɩn nə kʋ́ʋ̀ bá ya lá.
Yá didəni də tətə nə, poni tə wá ya lá.
8 Kʋ dɩɩn tə nə,
nabuliyii wá pwin kʋ nan Zwerizalɛmə wa.
Nɩ́á tə faan wá pàlɩ̀ tə va yɩɩ yipɩan con mʋʋ tə wa,
tə faan don ga pàlɩ̀ tə va yɩɩ yizwɩa con mʋʋa tə wa.
Yá kʋ wá ya nətʋ máŋá mama,
tɩpwən də yɩdɩɩn mɛ.
9 Ba-Yígúrə́-Jə-Tiu nə wá ya tɩa tə mama pɩ̀ʋ́, kʋ máŋá tə wa.
Ba-Yígúrə́-Jə-Tiu cɩcɩ nə wá ya Yɩɩ,
yá ʋ yɩrɩ tə də wá ya kʋ cɩcɩ.
10 Lʋʋ nii tə mama wá jì ndə Araba digə tə nə,
kʋ nə zɩgɩ Geba nə,
Zwerizalɛmə jɩzən saparʋ con,
kʋ va kʋ yí Rimon,
Zwerizalɛmə jɩgwiə saparʋ con.
Yá Zwerizalɛmə tɩʋ tə mʋ̀ yuu danɩ wá doni tɩan tə duən tə mama,
kʋ dəkuu bwálɩ́ tə wa.
Ba wá wàlɩ̀ tɩʋ tə,
kʋ nə zɩgɩ Bɛnzwamɛn məmii tə nə,
kʋ va kʋ yí nigwancɩan məmii tə,
kʋ nə wulə təntən məmii tə bwálɩ́ nə,
kʋ ga zɩgɩ Hananeyɛlə dəyuu dìə̀ tə nə,
kʋ va kʋ yí pɩ̀ʋ́ divɛn tɩ̀án bɩ̀á gwàlʋ́ tə.
11 Lɩ̀à wá ya tɩʋ tə wa,
kʋ kʋ́ʋ̀ bá ya culu* won, ba nə mɛ sə ba cʋ̀gʋ̀.
Yá Zwerizalɛmə dàń wá jə̀ń də yazurə.
12 Nə̀ń càn tə,
Ba-Yígúrə́-Jə-Tiu nə wá kə dwíə́ tə mama nə,
ba nə wá ta Zwerizalɛmə.
Ʋ wá pa ba yatana tə pʋ,
ka fwɩ ka twɩ,
yá ba tə wulə yɩɩ nə, ba vəli.
Ba yɩ́á wá pʋ ba yɩbʋran wa,
ba nəndəli də ga pʋ ba nii wa.
13 Kʋ dɩɩn təntə nə,
Ba-Yígúrə́-Jə-Tiu wá pa fən ja ba zənzən.
Ba wá zàn ba zɩgɩ duən nə,
yá lìù mama wá ta ʋ jəndon.
14 Zwida dwíí tə wa ta Zwerizalɛmə wa.
Ba wá jon lʋʋ níə́ tə nə kɩkarɩ ba, jɩjə tə mama,
sɩ́án, də səbiu, də gànàn zənzən.
Ba wá tún tə duən nə, tɩʋ tə nii nə.
15 Càn təntə nə wá yí dʋŋa tə vàná tə də,
ba dəkuu bwálɩ́ tə nə.
Tə wá yí ba səsen tə, də ba bɩnasəsen tə,
də ba nyʋgʋma tə, də ba bɩnɛ tə.
Càn təntə nə yí ləzoni tə də.
16 Yá ba tə mama ba nə wá ga lʋʋ wa, dwíə́ tə wa,
tə nə ta Zwerizalɛmə,
wá va tɩʋ təntə wa, bɩnɩ mama,
ba tʋ ba nadwana yuu,
pɩ̀ʋ́ Ba-Yígúrə́-Jə-Tiu,
ʋ nə yɩ kwatara Yɩɩ yáá con,
ba pa wá dun,
ba ga də́ vurən cànà tə.
17 Tɩa yuu dwíə́ tə wa dwíí tə ba nə vɩga,
sə ba va Zwerizalɛmə,
ba tʋ ba nadwana yuu,
pɩ̀ʋ́ Ba-Yígúrə́-Jə-Tiu,
ʋ nə yɩ kwatara Yɩɩ yáá con,
ba pa wá dun,
dwà bá nà ba lʋʋ nii wa.
18 Ezwipətə tɩ̀án nə vɩga,
sə ba va Zwerizalɛmə ba də́ vurən cànà tə,
càn wá yí ba, ndə dwíə́ tə duən tə nə,
ba nə bá va ba də́ cànà təntə.
19 Mə càn nə, tə nə wá yí Ezwipətə tɩ̀án,
də dwíə́ tə mama,
ba nə bá va ba də́ cànà təntə.
20 Kʋ dɩɩn tə nə,
ba wá pʋ́pʋ́nɩ́ səsen tə lulwəŋə tə yuu wa,
«Ba-Yígúrə́-Jə-Tiu cɩcɩ nyiən!»
Yá nəkəni tə nə wulə Ba-Yígúrə́-Jə-Tiu dìə̀ tə wa
wá ya culu wiən, ndə nəvwe tə nə,
Yɩɩ joŋi bwálɩ́ tə yáá con.
21 Nəkənə mama,
ka nə wulə Zwerizalɛmə wa,
də Zwida lʋʋ nii tə wa,
wá ya Ba-Yígúrə́-Jə-Tiu,
ʋ nə yɩ kwatara Yɩɩ, cɩcɩ nyiən.
Lɩ̀à tə mama, ba nə twi ba fwa jwəŋə,
wá tì tə, ba ma sàn jwəŋə nàŋá tə.
Yá ywələ kʋ́ʋ̀ bá ya Ba-Yígúrə́-Jə-Tiu,
ʋ nə yɩ kwatara Yɩɩ dìə̀ tə wa,
kʋ máŋá tə wa.