2
1 À wá zɩgɩ bwálɩ́ tə à nə mɛ sə à zɩgɩ, à ma ywàń tɩʋ tə yuu nə.
À wá zɩgɩ dɩ̀àn dəkuu bwálɩ́ biritaŋʋ tə yuu,
à dàn à jə́n yoo tə Yɩɩ nə wá swɩ̀n à con,
à ŋʋŋwɩan tə yɩrɩ, də nətʋ tə à nə wá le.
Cɩ́gá tíú waa tə ʋ nə ken Yɩɩ nə, wá pa wá mɩɩ
2 Ba-Yígúrə́-Jə-Tiu le nə, ʋ wʋ́: «Pʋ́pʋ́nɩ́ nɩʋn tə,
bɩ̀rɩ̀ kʋ n tún daborubii yuu wa,
sə ba wànɩ́ kʋ ba kàrɩ̀ mwálɩ́ mwálɩ́.
3 Cɩ́gá, kʋ yɩ nɩʋn kʋ máŋá nə lɩ ka tún, sə kʋ tʋn,
yá kʋ máŋá bɩ̀àn, kʋ bá kwɛ̀.
Kʋ nə dánɩ́, sə n dàn kʋ.
Cɩ́gá, kʋ nii wá sú, kʋ ba tʋ́tʋ̀ná jə,
kʋ máŋá bá kɛ̀ń.
4 Lìù tə ʋ bɩcan nə súə́ də fwìə́,
tə̀lə́ cɩ́gá cwəŋə wa,
yá cɩ́gá tíú wá na mɩɩ Yɩɩ con,
ʋ nə kəni ʋ waa Yɩɩ nə wuuu yɩrɩ.
5 Cɩ́gá, divɛn gɩgarɩ lɩ̀à kʋ dʋga:
Yɩrʋ tíú ba sənbwen zɩga,
ʋ yàá kàń ʋ nii ndə ciru* nə.
Ʋ ba fwìə́ fwa ʋ swí,
ndə tɩan nə ba tɩga swí nətʋ.
Ʋ vaŋa lʋʋ dwíə́ tə mama, ʋ kəni ʋ con,
ʋ kəni lʋʋ lɩ̀à mama duən yáá, ʋ con.
Lɛɛ yɩrə bonu yoo
6 Yá dɩɩn don nə, lɩ̀à təntə mama wá pa
Babɩlɔnə tɩ̀án jì yomaŋʋ.
Ba wá pa ba jì won, ba nə ma də́ bɩyɩrɩ,
də ba ma swɩ̀n zankasɩra.»
Ba wá swɩ̀n, ba wʋ́:
«Nə̀ń kʋ lɛɛ nyɩɛn nʋ̀ʋ̀, kʋ pa ba lɩ̀à tə nə,
ba nə vɩrɩ jɩjə wiən tə nə tà ba mʋ̀ nyiən,
ba jon ba tɩnɩ!
Kʋ nətʋ wá dán kʋ mɛ nətə?
Ba yuu jɩŋa tə dáá zənzən!
7 Lɩ̀à tə á nə jɩŋɩ wiən ba con, wá bà ba dɩ̀ á yuu.
Ba wá zàn dwiən nə, ba pa á vɩvaga,
yá ba də kʋ́ʋ̀ wá vɩrɩ á wiən də dɩ̀àn.
8 Á nə vɩrɩ lʋʋ dwíə́ kapʋpʋ yɩrɩ,
lʋʋ lɩ̀à tə gɩganɩ tə mama wá vɩrɩ aba,
ləzoni tə jana tə yɩrɩ, á nə lwá,
də wʋlʋŋʋ tə yɩrɩ, á nə tʋn lʋʋ nii tə wa,
də tɩʋ tə də kʋ waa lɩ̀à tə mama yɩra.
9 Nə̀ń kʋ lɛɛ nyɩɛn nʋ̀ʋ̀, kʋ pa lìù tə nə,
ʋ nə gɩgɩrɩ lɩ̀à wiən, ʋ kə ʋ dìə̀ wa,
ʋ ma ʋ lwà ʋ sàń baan baan,
sə ʋ ma wànɩ́ ʋ jɛ́n lɛɛ yáá nə!
10 Á tʋtʋnɛɛ tə wá kə cavɩra á dìə̀ tə nə.
Á nə cʋ̀gʋ̀ lʋʋ lɩ̀à kapʋpʋ tə,
kʋ yɩ á tətə yɩra nə á tʋŋa lwanɩ.
11 Cɩ́gá, bírə́ tə kapana wá bubwi,
yá kʋ wá va kʋ zizigi dìə̀ tə baŋɩ wa.
12 Nə̀ń kʋ lɛɛ nyɩɛn nʋ̀ʋ̀, kʋ pa lìù tə nə,
ʋ nə lwá jana, ʋ ma tún tɩʋ dəkuu,
ʋ ga wà cɩ́gá cwəŋə tì, ʋ ma lwà kʋ!
13 Lʋʋ ləzoni gwàrɩ̀ ba tɩ̀àn,
ba tʋŋa ba pɩn mən də́,
yá lʋʋ dwíə́ tə na càn tʋtʋ.
Kʋ nətʋ tə tà Ba-Yígúrə́-Jə-Tiu,
ʋ nə yɩ kwatara Yɩɩ con nə kʋ naŋa naaa?
14 Cɩ́gá, lɩ̀à wá lwarɩ Ba-Yígúrə́-Jə-Tiu dun tə,
tɩa yuu bwálɩ́ mama nə,
ndə nɩ́á nə súə́ mʋʋ nətʋ.
15 Nə̀ń kʋ lɛɛ nyɩɛn nʋ̀ʋ̀, kʋ pa lìù tə nə,
ʋ nə pɩn wiən ʋ jəndon nə, ʋ nyʋn!
N mʋ̀ lìù tə n nə lwá n fwanan tə,
n pa ba nyʋn ba sú, ba bʋbʋnɩ,
sə n ma na ba yaswələ!
16 Cavɩra nə á mʋ̀ Babɩlɔnə tɩ̀án wá də́ kʋ wa,
á bá na dun.
Á də nywɩan á sú, á bʋbʋnɩ,
á ga bɩrɩ á tɩ̀àn swələ!
Ba-Yígúrə́-Jə-Tiu wá pa á nyʋn ʋ lɩŋa tə
nə súə́ ʋ jɩzən wùrú zʋŋa tə,
yá á dun tə wá jì cavɩra!
17 Cɩ́gá, cʋcʋran tə á nə tʋn Liban pún tə wa,
dàń wá yí á də.
Á gʋa kʋ ganaŋa kapʋpʋ,
yá ganaŋa dàń wá kə fən á waa.
Lɛɛ təntə wá yí aba,
ləzoni tə jana tə yɩrɩ, á nə lwá,
də wʋlʋŋʋ tə yɩrɩ, á nə tʋn lʋʋ nii tə yɩra,
də tɩʋ tə də kʋ wa lɩ̀à tə mama yɩra.
18 Woŋwanʋ funə nə yɩ bɛ̀ɛ̀,
kʋ pa cɩnayarʋ fwa kʋ?
Woŋwanʋ tə ba nə nyɩan lugu, ba ma fwa,
yá kʋ kʋ̀nɩ̀ kʋ̀nkʋ̀n, funə nə yɩ bɛ̀ɛ̀,
kʋ pa cɩnayarʋ tə nə fwa kʋ, vwa ʋ tɩ̀àn kʋ nə,
ʋ ja tə ʋ ma fwa kʋ̀nkʋ̀n yɩa, tə nii nə ba swɩ̀n?
19 Nə̀ń kʋ lɛɛ nyɩɛn nʋ̀ʋ̀, kʋ pa lìù tə nə,
ʋ nə swɩ̀n dàʋ̀ con, ʋ wʋ́: «Zàn yɩɩ nə!»
Ʋ ga swɩ̀n kapan con,
kʋ nii nə bá swɩ̀n, ʋ wʋ́: «Zàn dwiən nə!»
Tə wàá yoo tə bɩrɩ naaa?
Sɩ́án də wárʋ́ nə ba ma mwàlɩ̀ tə,
yá tə ba siŋu mancɩn tətə jə.
20 Yá Ba-Yígúrə́-Jə-Tiu mʋ̀ wulə ʋ dìə̀ tə wa,
ka nə yɩ parɩ.
Tɩa tə mama kə sííí, ʋ yáá con!